تالدىقورعاندا 2015-2020 جىلدار ارالىعىندا زاڭ بۇزۋشىلىقتارى بار 1014 تۇرعىن ءۇي, 330 قۇجاتسىز پاتەر جەكە ازاماتتارعا سول ۋاقىت ارالىعىندا قىزمەت ەتكەن مەملەكەتتىك قىزمەتكەرەلەر تاراپىنان بەرىلگەن.
سونىمەن قاتار قۇجاتسىز 684 پاتەر حالىقتىڭ الەۋمەتتىك وسال توپتارىنا بەرىلگەن. بۇل ءتىزىم بويىنشا مۇراعاتتىق مالىمەتتەرمەن سالىستىرۋ جۇمىستارى جۇرگىزىلۋدە. ونىڭ 298-ءى «بەرەكە» كوتتەدج قالاشىعىنداعى ءۇي, كوپ قاباتتى ۇيلەردەگى پاتەر سانى 386.
«حالىق تۇرعىن ءۇي بولىمىنە كەلىپ, كەزەككە تۇرعان. بۇل جەمقورلىق تاۋەكەلدەرىن الىپ كەلەدى. سەبەبى كەزەكتە تۇرعان ازاماتتار مەملەكەتتىك قىزمەتكەرلەرمەن تىكەلەي بايلانىسقا شىعىپ وتىرعان. ادەتتە بۇرىن كەزەكتە تۇرعانداردىڭ 30%-ى قايتا تىركەۋدەن وتەتىن. ولاردىڭ دەنى مۇگەدەكتەر, زەينەتكەرلەر جانە الەۋمەتتىك وسال توپتاعى ازاماتتار. الايدا, كەي تۇرعىندار ءوزىنىڭ جەڭىلدىگىن راستاماي كەلگەن. ءتىپتى, ءبىر رەت كەزەككە تۇرىپ, ول تۋرالى ۇمىتىپ كەتكەندەر دە بار. سوندىقتان پاتەرگە مۇقتاج ەمەس ازاماتتاردى انىقتاۋ ءۇشىن, «كەزەكتە» پورتالىن قايتا قاراپ شىعۋ قاجەت», دەدى تالدىقورعان قالاسىنىڭ اكىمى اسەت ماساباەۆ.
جۇمىس بارىسىندا 2054 ازامات تىزىمنەن الىنعان.
وسىلايشا, شىنىمەن باسپاناعا مۇقتاج ازاماتتار الداعى ۋاقىتتا ارمانىنداعى پاتەرگە قول جەتكىزبەك. جالپى تالدىقورعان قالاسىنىڭ كوممۋنالدىق مەنشىگىندە 1993-2020 جىلدارى سالىنعان 3235 تۇرعىن ءۇي بار.
تالدىقورعانداعى تۇرعىن ۇيلەردى بولۋدە اشىقتىقتى ساقتاپ, جەمقورلىقتىڭ الدىن الۋ ماقساتىندا تۇرعىنداردىڭ ءۇي كەزەگى تولىعىمەن «كەزەكتە» پورتالىنا اۋىستىرىلدى. وسىلايشا, ءۇي الۋ كەزىندەگى ءتۇرلى ايلا-ارەكەتتەرگە جول جابىلماق.
ايتا كەتەرلىگى بۇعان دەيىن تۇرعىن ءۇي كەزەگى «Excel» باعدارلاماسىمەن جۇرگىزىلەتىن. تۇرعىن ءۇي كەزەگى جايىندا اقپاراتتى تىركەۋگە تۇرعاندا عانا الاتىن. ال جاڭا پلاتفورما جەمقورلىق تاۋەكەلدەرىنىڭ الدىن الىپ, تۇرعىن ءۇي كەزەگىندەگى قاتەلىكتەردى جويۋعا مۇمكىندىك بەرمەك. «Excel» باعدارلاماسىنداعى تىزىمدەردى تەكسەرۋ بارىسىندا 2 مىڭعا جۋىق سايكەسسىزدىك انىقتالعان. ونىڭ ىشىندە 1044-ءنىڭ دەرەگى قالپىنا كەلتىرىلگەن. 100 ادامنىڭ ءتىزىمى وڭدەلۋدە. ال, 576 تۇرعىننىڭ جسن, مۇگەدەك بالانىڭ جسن جانە كەزەككە تۇرۋى تۋرالى انىقتاماسى جوق.
قازىرگى ۋاقىتتا 16 333 ازامات ءۇي كەزەگىندە تۇر. ونىڭ 6 327-ءى بيۋدجەتتىك ۇيىمداردىڭ قىزمەتكەرى, 10 مىڭنان استامى الەۋمەتتىك ءالسىز توپقا جاتاتىن تۇرعىن.
