ء«بىزدىڭ قوعامدىق ۇيىم بيىل جىل باسىندا قۇرىلدى. ماقسات – پرەزيدەنت جۇكتەگەن تاپسىرمالاردىڭ ورىندالۋ بارىسىن قاداعالاۋ. جۇمىسقا ەكونوميكالىق ىنتىماقتاستىق جانە دامۋ ۇيىمى ەلدەرىنىڭ تاجىريبەسى مەن ءادىس-تاسىلىنە سۇيەنە وتىرىپ كىرىستىك. قوعام تاراپىنان باقىلاۋ جۇرگىزىپ, تالداۋ جاساۋ جۇمىستىڭ تيىمدىلىگىن ارتتىرادى. ارينە, ول ءۇشىن قوعام بەلسەندىلىك تانىتۋ كەرەك. تاعى ءبىر ماڭىزدى جايت كەز كەلگەن قوعامدىق ماسەلەنى شەشۋ ءۇشىن كوشەگە شىعۋدىڭ نەمەسە ايقاي-شۋ شىعارۋ مىندەتتى ەمەس. بيلىك پەن حالىق ءبىر-ءبىرىن ەستي بىلگەن ءجون. ءبىزدىڭ مىندەت حالىقتىڭ مۇڭ-مۇقتاجىن ۇكىمەتكە جەتكىزۋ جانە ماسەلەنىڭ شەشىلۋىن قاداعالاۋ», دەدى «ەل نامىسى» ارنايى مونيتورينگىلىك توبىنىڭ توراعاسى رافاەل گاسانوۆ.
ونىڭ ايتۋىنشا, اتالعان قوعامدىق ۇيىم جۇمىسىنا كەز كەلگەن بەلسەندى ازامات ءوز ۇلەسىن قوسا الادى.
ء«بىزدىڭ باقىلاۋىمىزعا پرەزيدەنت جاريالاعان اۋقىمدى رەفورمالاردان باستاپ, الەۋمەتتىك ماسەلەلەرگە دەيىن كىرەدى. ولاردىڭ قاتارىنا ءادىل سوت شەشىمى; سايلاۋدىڭ ءادىل ءوتۋى; حالىق ءوز ويىن بەيبىت مينينگىلەر وتكىزۋ ارقىلى جەتكىزە ءبىلۋى - تاعى سول سياقتى ماسەلەلەر كىرەدى. 4 ايدىڭ ىشىندە «ەل نامىسى» ارنايى مونيتورينگ توبىنا ەرىكتى مۇشەلەردىڭ سانى ەلىمىز بويىنشا 1 مىڭنان استى. باس شتابىمىز ەلوردادا ورنالاسقان. سونىمەن قاتار وبلىس, اۋدان جانە اۋىل دەڭگەيىندە وكىلدىكتەرىمىز جۇمىس ىستەيدى. ءبىز مەملەكەتتىك ورگانداردىڭ جۇمىسىن تەكسەرمەيمىز جانە باعا بەرمەيمىز. ءبىز ۇكىمەتكە جۇكتەلگەن مىندەتتىڭ ۋاقىتىلى ورىندالۋىن قاداعالايمىز, مونيتورينگ جۇرگىزەمىز», دەيدى ول.
مونيتورينگىلىك توپ باسشىسىنىڭ ايتۋىنشا, قوعامدىق ۇيىمعا ەلىمىزدىڭ تۇكپىر-تۇكپىرىنەن اقپارات كەلىپ تۇسەدى.
«از ۋاقىت ىشىندە ەلىمىزدە شەشىمىن تاپپاي كەلە جاتقان تۇيتكىلدى ماسەلەلەر زەردەلەندى. ماسەلەلەر ءتۇرلى سالانى قامتيدى. بۇگىندە ول بويىنشا ۇكىمەتكە ءتيىستى ۇسىنىمدار بەرىلدى», دەدى رافاەل گاسانوۆ.
