سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, وتكەن جىلدىڭ قىركۇيەك ايىندا پەتروپاۆل تۇرعىنى ينتەرنەتتەگى حابارلاندىرۋ ارقىلى ماگنيتولا ساتىپ الماقشى بولادى. كەلىسىم بويىنشا الدىن الا تولەم جاساپ, 80 مىڭ تەڭگەسىن اۋدارعان. كەيىن «ساتۋشى» بايلانىسقا شىقپاي قويعان.
جەدەل-ىزدەستىرۋ ءىس-شارالارى بارىسىندا پەتروپاۆل قالالىق پوليتسيا باسقارماسى ءبىرىنشى پوليتسيا ءبولىمىنىڭ قىزمەتكەرلەرى كۇدىكتىنى انىقتادى. ول پاۆلودار قالاسىنىڭ 21 جاستاعى تۇرعىنى ەكەن. ءمان-جايدى انىقتاۋ كەزىندە ۇستالعاننىڭ ۇقساس قىلمىستارعا قاتىستىلىعى تەكسەرىلدى. جەدەل ۋاكىلدەر ماتەريالداردى پاۆلودارلىق ارىپتەستەرىنە جىبەردى. كۇدىكتىنىڭ شىعىس قازاقستان جانە باسقا وبلىستاردا جاسالعان 15 ينتەرنەت-الاياقتىققا قاتىسى بولۋى مۇمكىن. قىلمىس جالعان تاۋارعا الدىن الا تولەمدى تالاپ ەتۋ ارقىلى جاسالعان, تاۋار رەتىندە تەحنيكا, اسىل تۇقىمدى مارعاۋلار جانە تاعى باسقالار ۇسىنىلعان.
«بۇگىنگى تاڭدا ينتەرنەت-الاياقتىق بەلەڭ العان. بۇل قىلمىس ءتۇرىن اشۋدا ءوز قيىندىقتارى بار. دەسەك تە ءتيىستى جۇمىستار اتقارىلىپ جاتىر. ماسەلەن, وبلىس اۋماعىندا ءساۋىر ايىنىڭ سوڭىندا وتكىزىلگەن «كونترافاكت» رەسپۋبليكالىق جەدەل-پروفيلاكتيكالىق ءىس-شاراسى اياسىندا بۇرىن جاسالعان 11 ينتەرنەت-الاياقتىق اشىلدى. ينتەرنەتتەگى تاۋار مەن قىزمەت ءۇشىن الدىن الا تولەمدى جىبەرمەي تۇرىپ, تەكسەرگەن ءجون, جۇرتتىڭ پىكىرلەرىنە ءمان بەرگەن دۇرىس», دەدى سقو پد كريمينالدىق پوليتسيا باسقارماسىنىڭ باستىعى مارات جۇماليەۆ.
جالپى جىل باسىنان سقو-دا 279 ينتەرنەت-الاياقتىق تىركەلىپ, بۇگىنگى تاڭدا 77-ءسى, ياعني شامامەن ءار ءۇشىنشىسى عانا اشىلدى.
ايانا توعانبەك
