7 مامىردا قىزىلوردا قالاسىندا اتىس بولدى. وسى دەرەككە بايلانىستى جۇرگىزىلگەن جەدەل-ىزدەستىرۋ ءىس-شارالارى ناتيجەسىندە, التى كۇدىكتى ۇستالىپ, قاماۋعا الىندى. ءتورت كۇدىكتىگە قاتىستى ىزدەۋ جاريالانعان.
«وقيعا بولعان جەردى جانە كۇدىكتىلەردىڭ تۇرعىلىقتى مەكەنجايىن تەكسەرۋ بارىسىندا بەس قارۋ-جاراق, بىرنەشە وق-ءدارى, ەسىرتكى جانە جەتى اۆتوكولىك ايعاق رەتىندە الىنىپ, ءتيىستى ساراپتامالار تاعايىندالدى. بارلىق قاتىسۋشىنىڭ جەكە باسى انىقتالىپ, جابىرلەنۋشى تاراپتىڭ قاۋىپسىزدىگى قامتاماسىز ەتىلدى. جوعارىدا كورسەتىلگەن قىلمىستىق قۇقىق بۇزۋشىلىقتار نەگىزىندە سەگىز قىلمىستىق ءىس, ياعني ادام ءولتىرۋ بويىنشا - 2, بۇزاقىلىق بويىنشا - 2, قارۋدىڭ زاڭسىز اينالىمى بويىنشا 3 ءىس جانە ەسىرتكىنىڭ زاڭسىز اينالىمى بويىنشا ءبىر ءىس تىركەلدى», دەدى قىزىلوردا وبلىسىنىڭ پوليتسيا دەپارتامەنتى باستىعىنىڭ ورىنباسارى بايجان بايگەلدى.
قازىرگى ۋاقىتتا قىلمىستىق ءىستىڭ ءمان-جايىن جان-جاقتى, تولىق جانە وبەكتيۆ تۇردە تەرگەپ-تەكسەرۋ جۇمىستارى جۇرگىزىلىپ جاتىر.
ەسكە سالا كەتەيىك, بۇعان دەيىن قىزىلوردادا اتىستان ءۇش ادام قازا تاۋىپ, تاعى ەكەۋى اۋرۋحاناعا جەتكىزىلگەنى حابارلانعان بولاتىن. قايعىلى وقيعا 7 مامىر كۇنى كەشكە بولعان.
