اتاپ ايتقاندا, قر پرەزيدەنتىنىڭ جارلىعىمەن ىشكى ىستەر ورگاندارىنىڭ 25 قىزمەتكەرى مەملەكەتتىك ناگرادامەن ماراپاتتالدى, 8 باسشى گەنەرال شەنىن الدى. سونداي-اق, ىشكى ىستەر ءمينيسترىنىڭ بۇيرىعىمەن 820 قىزمەتكەر ءتۇرلى ماراپاتقا يە بولدى.
«ەر ازامات ءۇشىن وتان قورعاۋدان ارتىق قاسيەتتى مىندەت جوق. اتا-بابامىز امانات ەتىپ قالدىرعان جەرىمىز بەن ەلدىگىمىزدى ساقتاۋ - ءبىزدىڭ باستى پارىزىمىز. بۇگىندە وسى اماناتتى ارقالاعان ىشكى ىستەر ورگاندارىنىڭ قىزمەتكەرلەرى ەلىنە ايانباي ەڭبەك ەتىپ كەلەدى. ولاردىڭ تىنىمسىز قىزمەتىنە مەملەكەت باسشىسى دا جوعارى باعا بەردى. ول - ادال ەڭبەك پەن انتقا بەرىك بولۋدىڭ جەمىسى», - دەدى ىشكى ىستەر ءمينيسترى مارات احمەتجانوۆ.
ماراپاتقا يە بولعانداردىڭ قاتارىندا ەر ادامدى اجالدان امان الىپ قالعان پاۆلودارلىق پوليتسيا قىزمەتكەرلەرى دانات كاماليەۆ پەن باقىتجان مۇحامبەتوۆ تە بار. قىزمەت بارىسىندا قاۋىپكە باس تىككەن قوس جىگىتكە «ەرلىگى ءۇشىن» مەدالى تابىستالدى.
«2022 جىلدىڭ ناۋرىز ايىندا ءبىزدىڭ ەكيپاجعا ءورت تۋرالى شاقىرتۋ ءتۇستى. وقيعا ورنىندا 2-قاباتتاعى پاتەردىڭ ورتەنىپ جاتقانى انىقتالدى. ءبىز ول جەردەن ەسىنەن تانىپ قالعان ازاماتتى شىعاردىق. وعان العاشقى مەديتسينالىق كومەك كورسەتىپ, كەيىن جەدەل جاردەم بريگاداسىنا تاپسىردىق», - دەيدى پاۆلودار قالالىق پاترۋلدىك پوليتسيا باتالونىنىڭ ينسپەكتورى دانات كاماليەۆ.
«مۇنداي شاراعا ءبىرىنشى رەت قاتىسىپ تۇرمىن. وتە قۋانىشتىمىن. جاڭا گەنەرالداردى قۇتتىقتادىق. باسقا وڭىرلەردەن كەلگەن ارىپتەستەرىمىزبەن تانىستىق», - دەپ اسەرىمەن ءبولىستى پاۆلودار قالالىق پاترۋلدىك پوليتسيا باتالونىنىڭ ينسپەكتورى باقىتجان مۇحامبەتوۆ.
شاراعا كامەلەتكە تولماعاندار ءىسى جونىندەگى ۋچاسكەلىك پوليتسيا ينسپەكتورى بولعان مارقۇم ولجاس رىسبەكتىڭ اتا-اناسى ارنايى شاقىرتىلدى. ول قاۋىپتىڭ الدىن الۋ ءۇشىن كولىكتى توقتاتپاق بولىپ, قىزمەت بارىسىندا قازا تاپتى. ءىى دارەجەلى «ايبىن» وردەنى اتا-اناسىنا تابىستالدى.
«بالام مەكتەپ بىتىرگەننەن ءوزى وسى ماماندىقتى تاڭدادى. ءوز ءىسىن وتە جاقسى كوردى. وقىس جاعداي بولدى. بۇگىن بالامنىڭ ەڭبەگى ءۇشىن وردەن تابىستاپ جاتىر», - دەدى ينسپەكتوردىڭ اناسى گۇلميرا نىلدەباەۆا.
ءىس-شارانىڭ سالتاناتتى بولىمىنەن سوڭ ماراپاتتالعاندار مەن قوناقتار اسكەري-تاريح مۇراجايىنداعى جادىگەرلەردەن تۇراتىن كوشپەلى كورمەنى تاماشالادى. كورمەنى كولىكتەگى پوليتسيا دەپارتامەنتى ۇيىمداستىردى.
