وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى قانات قاشكيروۆتىڭ ايتۋىنشا, بيىل وڭىردە 265 شاقىرىم جولدى جوندەۋ جوسپارلانعان. بايقاعانىمىزداي, جولدىڭ توزۋى جوسپاردان ەكى ەسە ارتىق بولىپ تۇر. بۇلاي جالعاسا بەرسە, ساپاسىز جولداردىڭ سانى ارتاتىنى انىق. كولىك قوزعالىسى دا جىل سايىن ارتىپ كەلە جاتقانىن ەستەن شىعارماعان ءجون.
– وبلىس اۋماعىندا جالپى پايدالانىمداعى اۆتوموبيل جولدارى جەلىسىنىڭ ۇزىندىعى – 3 842 شاقىرىم. مۇنىڭ ىشىندە وبلىستىق ماڭىزى بار اۆتوموبيل جولدارى 1 010 شاقىرىم بولسا, اۋداندىق ماڭىزى بار اۆتوموبيل جولدارى 2 832 شاقىرىمعا تەڭ. بىلتىر وبلىستىق جانە اۋداندىق ماڭىزى بار جولداردى كۇردەلى جانە ورتاشا جوندەۋ بويىنشا 9 ملرد 518 ملن تەڭگە قاراجاتقا 41 جوبا جۇزەگە اسىرىلدى. قۇرىلىس-مونتاجداۋ جۇمىستارىنىڭ ساپاسىن باقىلاۋ شەڭبەرىندە قالالار مەن اۋداندار اكىمدىكتەرى, جولاۋشىلار كولىگى جانە اۆتوموبيل جولدارى باسقارماسى جول اكتيۆتەرى ساپاسى ورتالىعىمەن جالپى سوماسى 117 ملن تەڭگەگە شارت جاسادى. ساپانى باقىلاۋ كەزىندە 5 كەمشىلىك انىقتالىپ, 497 ماتەريالدىڭ سىناماسى الىندى. قازىرگى تاڭدا بارلىق اقاۋلار جويىلدى. بيىل 9 ملرد 240 ملن تەڭگە سوماسىنا جالپى ۇزىندىعى 264 شاقىرىم وبلىستىق جانە اۋداندىق ماڭىزى بار اۆتوموبيل جولىن ورتاشا جوندەۋ بويىنشا 27 جوبانى ىسكە اسىرۋ جوسپارلانۋدا, – دەيدى باسقارما باسشىسى.
ونىڭ ىشىندە تۇرعىندار ۇزاق كۇتكەن جوبالار دا بار. ماسەلەن, گرەس-1 ۋچاسكەسى – باسقامىس اراسىنداعى جول جوندەلسە, اقتوعاي اۋدانىنىڭ تۇرعىندارى ءۇشىن ەكىباستۇز قالاسىنا دەيىنگى جولدىڭ ۇزاقتىعى ەكى ەسەگە جۋىق قىسقارماق. سايكەسىنشە, جولاۋشىلاردىڭ ەكىباستۇزعا جانە ودان ءارى نۇر-سۇلتانعا ءوتۋ ترافيگىن قىسقارتۋعا مۇمكىندىك بار. بۇگىندە 70 كم شاقىرىم جولدىڭ 40 شاقىرىمىندا جۇمىس ءجۇرىپ جاتقان كورىنەدى. جول جۇمىستارىنىڭ ساپاسىن بەيىندى باسقارما عانا ەمەس, وعان قوسا قوعامدىق ۇيىمدار مەن تەحنيكالىق قاداعالاۋ ارقىلى باقىلاۋ جۇرگىزىلمەك.
وبلىس اكىمى ابىلقايىر سقاقوۆ جىل سايىن جولدى جوندەۋگە قوماقتى قاراجات بولىنسە دە, جاقسى كورسەتكىشكە جەتۋ قيىنداي تۇسكەنىن ايتادى. «بۇل – وبلىس ورتالىعىنداعى جىلۋ جۇيەسى سياقتى. 25 شاقىرىم جوندەۋ كەرەك, ءبىز بەس شاقىرىم جوندەيمىز. ال جىل سايىن توزعان بولىگىنىڭ ۇلەسى ارتا بەرەدى. بۇل – قارجى قۇمعا كەتتى دەگەن ءسوز. ونىڭ الدىن الۋ ءۇشىن ءار اۋدانمەن جەكە جۇمىس ىستەۋ كەرەك», دەپ ايماق باسشىسى جولعا جاۋاپتى باسشىلارعا تاپسىرما بەردى.
بەلگىلى بولعانداي, بيىلعى جوسپارعا كىرەبەرىس جولداردى جوندەۋ جۇمىستارىنىڭ باسىم بولىگى ەنبەي قالعان. قانات قاشكيروۆتىڭ ايتۋىنشا, ول جولدارعا از قارجى جۇمسالادى. اۋىلدارعا كىرەتىن جولدىڭ كوبى 1,5-2 شاقىرىم عانا بولعاندىقتان, ونىڭ جوندەۋ جۇمىسى 100 ملن تەڭگەدەن از تۇرادى. ال ءتيىستى مينيسترلىك كوپ قارجى جۇمسالاتىن جوبالارعا عانا باسىمدىق بەرەدى ەكەن.
ابىلقايىر سقاقوۆ باسىمدىق بۇلاي رەتتەلمەۋ كەرەك ەكەنىن ايتتى. مينيسترلىككە حات دايىنداپ, ءوز ۇسىنىستارىن بىلدىرمەك. ايتپەسە, بۇگىندە اۋىلدارعا كىرەبەرىس جولداردى جوندەۋگە ارنالعان جالپى قۇنى 2 ملرد تەڭگەنى قۇرايتىن 22 جوبا دايىن تۇر. رەسپۋبليكالىق بيۋدجەتتەن قاراجات بولىنبەسە, جوبالاردى وبلىستىق بيۋدجەت ارقىلى قارجىلاندىرىپ, 2 جىلعا ءبولىپ تىندىرۋعا تىرىسىپ كورمەك.
