يسلام بايرامۋكوۆتىڭ حالىقارالىق ارەنادا اتوي سالعان كەزى كۇنى كەشەگىدەي كوز الدىمىزدا. بالا كەزىنەن زەرەك بولىپ وسكەن ول اۋەلى سپورتتىڭ سان الۋان ءتۇرىن سەرىك ەتتى. بوس ۋاقىتىندا اقىن-جازۋشىلاردىڭ كىتاپتارىن كوپ وقىپ, وي-ءورىسىن كەڭەيتتى. جانۋارلاردى جاقسى كوردى, ات سپورتىنا قىزىقتى. التىنشى سىنىپتا بالۋاندىق ونەرگە مىقتاپ دەن قويىپ, ەركىن كۇرەستىڭ قىر-سىرىنا قانىقتى. تىرناقالدى تابىستارىنا قول جەتكىزگەننەن سوڭ الماتىداعى رەسپۋبليكالىق وليمپيادالىق رەزەرۆتەر ۋچيليششەسىنە اۋىستى. قازاق سپورتىنىڭ قارا شاڭىراعىندا شەبەرلىگىن شىڭداعان بايرامۋكوۆ ۋاقىت وزا ەلىمىزدىڭ ماڭدايالدى بالۋاندارىنىڭ بىرىنە اينالدى.
يسلامنىڭ بۇل سالادا جەتكەن جەتىستىكتەرى زور. اتاپ ايتساق, ازيا چەمپيوناتىندا 1 التىن, 3 كۇمىس جانە 1 قولا مەدالدى ولجالادى. ازيا ويىندارىندا قولا مەدالدى يەلەندى. ورتالىق ازيا جانە شىعىس ازيا ويىندارىندا باس جۇلدەنى قانجىعاسىنا بايلادى. باقانداي 10 جىلدان اسا ۋاقىت بويى 90 جانە 97 كيلو سالماق دارەجەلەرى بويىنشا ەلىشىلىك جارىستاردا قارسىلاس شاق كەلتىرمەي, كوپتەگەن حالىقارالىق تۋرنيرلەردە اتوي سالدى. قاراشاي جىگىتىنىڭ سپورتتىق مانسابىنداعى ەڭ زور تابىسى – وليمپيا ويىندارىنىڭ كۇمىس مەدالى. عاسىرلار توعىسىندا سيدنەيدە الاۋى تۇتانعان ءدۇبىرلى دودادا نەبىر اپايتوستەردى جولىنان ىعىستىرعان بايرامۋكوۆ فينالدا رەسەيدىڭ داڭقتى بالۋانى, الەم جانە ەۋروپا چەمپيونى ساعيت مۇرتازاليەۆكە ەسە جىبەردى. ەرەن ەڭبەگى مەملەكەت تاراپىنان جوعارى باعالانعان ايگىلى بالۋان «پاراسات» وردەنىمەن ماراپاتتالدى.
ۇلكەن سپورتتان قول ۇزگەننەن كەيىن بايرامۋكوۆ باپكەرلىكتىڭ قامىتىن كيدى. جاستارعا بار بىلگەنىن ۇيرەتىپ, بوزكىلەمدە جيعان مول تاجىريبەسىمەن ءبولىستى. بىرەر جىل ۇلتتىق كوماندامىزدىڭ باپكەرلەر قۇرامىندا دا بولدى. بىراق يسلام ءىلياس ۇلى تەك سپورتپەن عانا شەكتەلىپ قالعان جوق. ول الماتى قالالىق ءماسليحاتىنىڭ دەپۋتاتى رەتىندە قوعامدىق جۇمىستارعا بەلسەنە ارالاستى. ءبىر عانا مىسال, ءدال وسى ازاماتتىڭ تىكەلەي ىقپالىنىڭ ارقاسىندا الماتىداعى يپپودروم ىسىرىلىپ, قيراتىلۋدان امان قالىپ, كۇنى بۇگىنگە دەيىن ەل يگىلىگى ءۇشىن قىزمەت ەتۋدە. كەيىپكەرىمىز قازاقستان حالقى اسسامبلەياسىنىڭ جانىنداعى قاراشاي-بالقارلاردىڭ «بىرلىك» قوعامدىق بىرلەستىگى توراعاسىنىڭ ورىنباسارى قىزمەتىن اتقاردى. بۇل رەتتە اتاقتى سپورتشىنىڭ كەڭ-بايتاق قازاق دالاسىن مەكەن ەتكەن كوپتەگەن ۇلت پەن ۇلىستىڭ بىرلىگى مەن بەرەكەسى ارتىپ, تاتۋلىعى مەن ىنتىماعىنىڭ نىعايۋىنا قوسقان ۇلەسى بار.
يسلام بايرامۋكوۆتىڭ ات سپورتىنا ءبىر بۇيرەگى بۇرىپ تۇرادى. بوزكىلەممەن قوش ايتىسقاننان سوڭ ول اتبەگى رەتىندە دە تانىلدى. وليمپيادا جۇلدەگەرى باپتاعان سايگ ۇلىكتەر قازاقستاندا عانا ەمەس, الىس-جاقىن شەت مەملەكەتتەردە وتكەن ءدۇبىرلى دودالاردا دارالاندى.
سۇيىكتى ىسىنەن قول ۇزگەنىنە ءبىراز جىل وتسە دە, رەسپۋبليكالىق جانە حالىقارالىق دەڭگەيدەگى جارىستاردا يسلامدى ءجيى كەزىكتىرىپ ءجۇرمىز. ءوزىنىڭ ءىزباسارلارىن ۇنەمى قولداپ, قولپاشتاپ جۇرەدى. ەركىن كۇرەستىڭ جاي-كۇيى جايىندا اڭگىمە قوزعالسا, ويىن بۇكپەسىز ايتىپ, اقتارىلا سويلەيدى. شىنشىلدىق پەن اقيقاتقا جانى جاقىن ازامات ەل سپورتىنداعى شەشىمىن تاپپاي جاتقان ماسەلەلەر جايىندا بيىك مىنبەرلەردەن سان مارتە اشىنا سويلەگەنىن دە كوردىك. باق وكىلدەرىنە بەرگەن سۇحباتتارىندا وسى سالانىڭ باسى-قاسىندا جۇرگەن دوكەيلەردى تالاي رەت سىن ساداعىنا الدى. ەشكىمنىڭ لاۋازىمى مەن شەن-شەكپەنىنە قاراپ جاتقان بايرامۋكوۆ جوق. شىرىلداپ شىندىقتى ايتىپ, ءار كەز ادىلدىكتى ارقاۋ ەتۋدە. ويتكەنى ول ءوزىنىڭ ومىرلىك سەرىگىنە اينالعان سپورت ءتۇرىنىڭ قۇردىمعا كەتكەنىن قالامايدى. يسلام قازاق ەلىنىڭ ءور مىنەزدى ۇلدارىن تەك بيىك بەلەستەردەن عانا كورگىسى كەلەدى.
يسلام ءىلياس ۇلىن «سەگىز قىرلى, ءبىر سىرلى ازامات» دەپ ايتساق, ەشكىم داۋلاسا قويماس. ول قازاق ءتىلىن جەتىك مەڭگەرگەن. سوزگە شەشەن. ءتىلى وتكىر, ويى جيناقى, ورەسى بيىك. ماقالداپ, ماتەلدەپ سويلەگەندە, تامسانباي تىڭداۋ مۇمكىن ەمەس. ونىڭ وسى قاسيەتتەرىن ءبىز تەلەديدار ارقىلى وليمپيا ويىندارى مەن الەم چەمپيوناتتارى سەكىلدى بايراقتى باسەكەلەردەن تىكەلەي رەپورتاج جۇرگىزۋ بارىسىندا انىق بايقادىق. ادەتتە ستۋدياعا قۇرمەتتى قوناق نەمەسە ساليقالى ساراپشى رەتىندە شاقىرىلاتىن بايرامۋكوۆ بىردەن ءوزىنىڭ كاسىپقويلىعى مەن بىلىمدىلىگى, شەشەندىگى مەن تاپقىرلىعى جانە كەرەمەت ءسوز ورامدارىمەن كورەرمەندەردى باۋراپ الادى. مىنە, وسىدان كەيىن «تالانتتى ادام بارلىق جاعىنان تالانتتى» دەگەن سوزگە سەنبەي كورىڭىز...
