ماسەلەن, 26 ساۋىردە اتىراۋ قالالىق اكىمدىگىنە قاراستى قايىرشاقتى اۋىلدىق وكرۋگىندەگى بەزىمياننىي كولىندە بالىقتىڭ قىرىلۋ دەرەگى تىركەلدى. وسىعان بايلانىستى اتالعان سۋ ايدىنىنا ارنايى قۇرىلعان كوميسسيا قۇرامىندا «جايىق-كاسپي» وبلىسارالىق باسسەيندىك بالىق شارۋاشىلىعى ينسپەكتسياسىنىڭ ينسپەكتورلارى جىبەرىلدى. ينسپەكتورلار بالىقتىڭ قايراڭعا شىعىپ, السىرەپ قالعانىن انىقتادى.
– بالىقتىڭ قىرىلۋىنا قايراڭعا شىعىپ قالعانى سەبەپ بولۋى مۇمكىن. السىرەگەن بالىقتاردى قۇتقارۋ جۇمىستارى جۇرگىزىلدى. سوڭعى بەس كۇن بويى بەزىمياننىي كولىنە سۋ كەلىپ جاتىر. ولگەن بالىقتاردى سانيتارلىق تالاپقا ساي جويۋ قولعا الىندى, – دەيدى ينسپەكتسيا باسشىسى نۇرلىبەك گايسين.
وبلىستىق بالىق شارۋاشىلىعى باسقارماسىنىڭ باسشىسى ارتۋر سادىبەك ۇلىنىڭ مالىمەتىنشە, كوكتەمدە بالىقتار ۋىلدىرىق شاشۋ ءۇشىن قولايلى ءورىس ىزدەيدى. بەزىمياننىي كولىندە قىرىلعان بالىق كانالعا كەلىپ, تىرەلىپ قالعان. سول سەبەپتەن, بالىقتاردىڭ ۋىلدىرىق شاشۋ ورنىنا ەركىن كىرۋى ءۇشىن قايىرشاقتى وكرۋگى اۋماعىنان 800 مەتر كانال قازىلدى. كانالدىڭ تەرەڭدىگى – شامامەن 1 مەتر.
بالىق شارۋاشىلىعى كوميتەتى توراعاسىنىڭ ورىنباسارى ايان باحيانوۆتىڭ مالىمەتىنە سۇيەنسەك, بىلتىر سۋ ايدىندارىندا 12 توننا بالىق قىرىلعان. ال بيىلعى 26 ساۋىردە بەزىمياننىي كولىنەن 65 كيلو ءولى بالىق جينالدى. بالىقتىڭ قىرىلۋ دەرەگى 29 ساۋىردە ماحامبەت اۋدانىنداعى الماعامبەت كولىندە دە تىركەلدى. بۇل كولدە ولگەن بالىقتىڭ مولشەرى 507 كيلونى قۇرادى.
– جايىق وزەنىنە كوكتەمگى تاسقىن سۋ 24 ساۋىردە كەلە باستادى. قازىر يندەر اۋدانىندا جايىق وزەنىنە تاياۋ ورنالاسقان 22 كولدىڭ تورتەۋىنە سۋ كەلدى. ال ماحامبەت اۋدانىنداعى 18 كولدىڭ التاۋىنا سۋ شىقتى. بالىقتىڭ قىرىلۋىنىڭ باستى سەبەبى جايىق وزەنىنىڭ ساعاسىنا شىعىپ, سۋ ايدىنىنا قايتا ورالا الماۋىنان بولعان. ويتكەنى ساعالارعا سۋ تەز كەلىپ جاتىر. سۋ كەرى قايتقاندا, وتتەگى دە ازايعان, – دەيدى ايان باحيانوۆ.
وبلىستىق بالىق شارۋاشىلىعى باسقارماسىنىڭ باسشىسى ارتۋر سادىبەك ۇلىنىڭ ايتۋىنشا, ماحامبەت اۋدانىنداعى الماعامبەت كولىنە 10 جىلدان بەرى سۋ شىقپاعان. سۋسىز قالعان كولدە جىڭعىل ءوستى. بيىل بۇل كولگە سۋ كەلدى. كولگە سۋمەن بىرگە شىققان بالىق جىڭعىلدىڭ اراسىندا قالىپ قويعان, – دەپ ءمالىم ەتتى ارتۋر سادىبەك ۇلى.
ونىڭ ايتۋىنشا, الماعامبەت كولىندە بالىقتاردى قۇتقارۋ جۇمىسىنا جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنان 40 ينسپەكتور, العا اۋىلدىق وكرۋگىنەن 8 ادام تارتىلدى. قازىر وڭىردە 200-دەن استام سۋ ايدىنى بار. ونىڭ 70-كە جۋىعى قاۋىپتى ايدىن قاتارىنا جاتقىزىلعان.
