فۋتبول: پرەمەر-ليگانىڭ كەزەكتى تۋرى وينالدى

بۇگىن, 13 ءساۋىر كۇنى فۋتبولدان پرەمەر-ليگا چەمپيوناتىنا 6-تۋر ويىندارى وينالدى. بۇل تۋرالى egemen.kz حابارلادى. بۇل كۇنى ەڭ قىزىقتى ويىن قىزىلوردادا وينالدى. مۇندا دميتري يۋگايدىڭ شاكىرتتەرى پاۆلوداردىڭ «ەرتىسىن» تالقانداپ شىقتى – 4:2! بىراق ونىڭ باسىندا قوناقتاردىڭ دەسى باسىم شىقتى. ولار 5-مينۋتتا-اق العاشقى گولدارىن سالىپ ۇلگەردى (يگور يۋرين). سىربويىلىقتار تەك 20-مينۋتتا عانا ەسەپتى پەنالتيدەن تەڭەستىرە الدى (دۋشان ساۆيچ). الايدا, قوناقتار 6 مينۋتتان كەيىن تاعى العا شىقتى. بۇل جولى كونستانتين دۋدچەنكو كوزگە ءتۇستى. قايسارلىقتار 42-مينۋتتا سەرگەي سترۋكوۆتىڭ كومەگىمەن ەسەپتى قايتا تەڭەستىردى. ال ەكىنشى تايمداعى تەك گولدا الاڭ يەلەرىنىڭ ەنشىسىندە بولدى. ولاردى انتون زەمليانۋحين مەن دۋشان ساۆيچ 48 جانە 66-مينۋتتاردا سالدى. تۋردا ەڭ تەز گول سالعان شىمكەنتتىكتەر بولدى. ءوز الاڭىندا «اقتوبەنى» قابىلداعان «ورداباسى» ماتچتىڭ 2-مينۋتىندا قارسىلاس قاقپانىڭ قۇلپىن اشتى. ونى كوماندانىڭ مەرگەن شابۋىلشىسى ەدين يۋنۋزوۆيچ ءتۇسىردى. الايدا, وسىدان كەيىن قارسىلاستار قايتىپ كوزگە تۇسە المادى. وسىلايشا ويىن باسىندا سالىنعان جالقى دوپ كەزدەسۋدىڭ سوڭعى ناتيجەسى دە بولدى. استانادا جەرگىلىكتى «استانا» كومانداسى قوستانايدىڭ «توبىلىن» قابىلداپ, 1:0 ەسەبىمەن جەڭدى. ويىن ونشالىقتى قىزىقتى بولىپ وتكەن جوق. ول ەكى جاقتىڭ شامالاس, تەڭ ەكەنىن كورسەتتى. ال كەزدەسۋ تاعدىرىن شەشىپ كەتكەن جالعىز گولدى الاڭ يەلەرى پەنالتيدەن سالدى. ونى دامير كوياشەۆيچ 79-مينۋتتا ءوز ەسەبىنە جازدى. تالدىقورعاندا «جەتىسۋعا» قارسى ويناعان قاراعاندىنىڭ «شاحتەرى» باسىمدىق تانىتتى. سوڭعى ويىندا ءوزىن تاباندى ۇجىم رەتىندە كورسەتە باستاعان وماري تەترادزەنىڭ جىگىتتەرى ويلاماعان جەردەن 1:2 بولىپ ۇتىلىپ قالدى. ال بۇل ەسەپ كەزدەسۋدىڭ 28-مينۋتىندا جازىلدى. ماتچتىڭ ەسەبىن تالدىقورعاندىقتار 16-مينۋتتا سەرگەي شاففتىڭ كومەگىمەن اشتى. بىراق بۇعان قوناقتار ىعا قويمادى. قايتا تىڭعىلىقتى ويناۋعا كوشكەن ولار 5 مينۋتتان كەيىن ماقسات بايجانوۆتىڭ ارقاسىندا تارازى باسىن تەڭ ەتتى. ال 7 مينۋت وتكەندە, توقتار جاڭعىلىشباي كەنشىلەردى العا شىعاردى. اتىراۋدا جەرگىلىكتى «اتىراۋ» سەمەيدىڭ «سپارتاگىن» 2:1 ەتىپ تىزە بۇكتىردى. ءبىرىنشى گول 8-مينۋتتا الاڭ يەلەرىنىڭ ۇرۋىمەن پەنالتيدەن سالىندى (فيليپپ رۋديك). مەيماندار 61-مينۋتتا وسىنىڭ قارىمتاسىن قايتاردى (نەمانيا چوۆيچ). ال ماتچ بىتۋگە 5 مينۋت قالعاندا, سەرگەي گريدين اتىراۋلىقتارعا جەڭىس كىلتىن ۇستاتتى. ەڭ سوڭىنان الماتىدا «قايرات» پەن «تاراز» اراسىنداعى كەزدەسۋ دە قىزىقتى ءوتتى. مۇندا الماتىلىقتار بيىلعى چەمپيوناتتاعى ءبىرىنشى جەڭىسىنە جەتتى. ەسەپ – 3:1! ۆلاديمير ۆايستىڭ ۇلاندارى ويىن باسىنان العا ۇمتىلدى. ولار ەسەپتى دە ءبىرىنشى بولىپ اشتى. ونى جاركو ماركوۆيچ 36-مينۋتتا ءتۇسىردى. 43-مينۋتتا يوسيپ كنياجەۆيچ  ەسەپتى ۇلعايتتى. قوناقتار 70-مينۋتتا ءبىر دوپتىڭ قارىمىن قايتاردى (الەكسەي ششەتكين). ويىنداعى سوڭعى گولدى ماتچ سوڭىنداعى قوسىمشا ۋاقىتتا الەكساندر كيسليتسىن سالدى. دامير قوجامقۇل. دەرەككوز: egemen.kz. فوتو: vesti.kz.