جوبانىڭ نەگىزگى ماقساتى – ەسىرتكى قىلمىسىنا قارسى ءىس-قيمىلدى جۇرگىزۋ جانە جاستار اراسىندا سينتەتيكالىق ەسىرتكىلەردىڭ تارالۋىنىڭ, پايدالانىلۋىنىڭ الدىن الۋ.
«سوڭعى جىلدارى ەسىرتكىنىڭ تارالۋىنا قارسى كۇرەس سالاسىنداعى جاعداي وزگەردى. ءداستۇرلى ەسىرتكىنى سينتەتيكالىق ەسىرتكى دەپ اتالاتىن جاڭا پسيحوتروپتىق زاتتار اۋىستىردى. ولار باعاسىنىڭ ارزاندىعىمەن, ايقىن پسيحوتروپتىق اسەرىمەن, تاۋەلدىلىكتىڭ جىلدام قالىپتاسۋىمەن ەرەكشەلەنەدى», دەدى «سەرعالي-تۇركىستان» رقب ءتورايىمى شولپان ۋسمانوۆا جوبانى تانىستىرۋ بارىسىندا.
جوبا اياسىندا ەلىمىزدىڭ دەنساۋلىق ساقتاۋ, ىشكى ىستەر ورگاندارىنىڭ ماماندارى, پسيحولوگتار, ناركولوگيالىق قىزمەت ماماندارى ەلىمىزدىڭ ورتا, ارنايى ورتا جانە جوعارى وقۋ ورىندارىندا وقۋشىلار مەن ستۋدەنت جاستار اراسىندا سينتەتيكالىق ەسىرتكىنى قولدانۋدىڭ قاۋىپتىلىگى مەن ولاردىڭ سالدارىن ءتۇسىندىرۋ ءىس-شارالارىن وتكىزەدى.
سونداي-اق جوبا اياسىندا قازاقستاندىقتار قوڭىراۋ شالىپ, ەسىرتكىنى پايدالانۋ نەمەسە وتكىزۋ فاكتىلەرى تۋرالى حابارلاي الاتىن قىزمەتتى قۇرۋ كوزدەلگەن.
«مامىر ايىنىڭ باسىندا ءبىز ءانونيمدى وتىنىمدەردى قابىلدايتىن قىزمەتتى ىسكە قوسۋدى جوسپارلاپ وتىرمىز. وتىنىمدەردى ەكى ارنا ارقىلى قابىلدايمىز. بۇل: Telegram-داعى چات-بوت جانە WhatsApp-توبى. بارلىق وتىنىمدەردى قۇرامىندا قۇقىق قورعاۋ ورگاندارىنىڭ قىزمەتكەرلەرى بار ارەكەت ەتۋ توبى پىسىقتايتىن بولادى. سونداي-اق اتالعان ارنالاردا زاڭگەرلەر مەن پسيحولوگتاردىڭ ونلاين - كونسۋلتاتسيالارى قولجەتىمدى بولادى», دەدى ش. ۋسمانوۆا.
سونىمەن قاتار, جوبا اياسىندا جاستار اراسىندا ناشاقورلىقتىڭ الدىن الۋعا باعىتتالعان شاعىن گرانتتار كونكۋرسى, ەسىرتكىنىڭ دەنساۋلىققا زيانىن, قۇقىقتىق سالدارىن ءتۇسىندىرۋ جونىندەگى ءىس-شارالار ۇيىمداستىرىلادى دەپ كۇتىلۋدە.
ناشاقورلىق پەن ەسىرتكى بيزنەسىنە قارسى ءىس-قيمىلعا باعىتتالعان قىزمەتتى ۇيلەستىرۋ جونىندەگى وڭىرلىك شتابتاردىڭ وكىلدەرى ءۇشىن ارنايى ترەنينگتەر وتكىزىلەدى.
