بىرىنشىلىككە 14 وبلىس پەن 3 قالادان 1000-عا جۋىق بالۋان قاتىستى.
جارىستىڭ شىمىلدىعىن اشقان شىمكەنت قالاسى اكىمىنىڭ ورىنباسارى ماقسۇت يساحوۆ سپورتشىلارعا ساتتىلىك تىلەدى.
– مەملەكەت باسشىسى قاسىم-جومارت توقاەۆ 2022 جىلدى «بالالار جىلى» دەپ جاريالاعان بولاتىن. ول «بالالارعا ەرەكشە نازار اۋدارۋ كەرەك. سەبەبى ولاردىڭ اماندىعى – مەملەكەتىمىزدىڭ جارقىن بولاشاعىنىڭ سەنىمدى كەپىلى. وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعى – بۇل ءبىزدىڭ جالپىۇلتتىق مىندەتىمىز» دەپ اتاپ ءوتتى. بيىلعى بىرىنشىلىككە قاتىسىپ جاتقان بالعىندار پرەزيدەنتتىڭ سەنىمىنەن شىعىپ, شىدامدىلىق پەن ەپتىلىكتىڭ ارقاسىندا بيىك شىڭداردى باعىندىرا الادى دەپ ويلايمىن, – دەدى ماقسۇت پەرنەباي ۇلى.
ال Qazaq kuresi اسسوتسياتسياسىنىڭ باس ديرەكتورى ەربول مىرزابوسىنوۆ بۇگىنگى تاڭدا ۇلتتىق كۇرەستىڭ دامۋى تۋرالى توقتالىپ, جارىستىڭ ماڭىزدىلىعىن اتاپ ءوتتى.
– بۇگىنگى تاڭدا قازاق كۇرەسى ەلىمىزدە, ونىڭ ىشىندە وڭتۇستىك ايماقتاردا بەلسەندى دامۋدا. ءوزىنىڭ ەجەلگى جانە بەرىك كۇرەس داستۇرىمەن تانىلعان شىمكەنت قالاسىندا بۇل جارىستىڭ ءوتۋىنىڭ نەگىزگى سەبەبى دە وسى. مەملەكەت باسشىسى بۇقارالىق سپورتتى دامىتۋ قاجەتتىگىن از ايتقان جوق. ەلىمىزدىڭ بارلىق جەرلەرىندە سپورتتىق ينفراقۇرىلىم قارقىندى دامىپ كەلەدى, سپورتپەن بەلسەندى اينالىساتىن ادامدار كوبەيدى. ەڭ باستىسى سالاۋاتتى ءومىر سالتىنىڭ مادەنيەتى قالىپتاسىپ جاتىر, – دەدى ەربول قۋانتاي ۇلى.
جابىق جەڭىل اتلەتيكالىق مانەج سپورت كەشەنىندە وتكەن چەمپيوناتتا جوعارى ۇلتتىق ساناتتاعى تورەشى ازامات ەرادىلوۆ باستاعان 50-گە جۋىق مامان تورەشىلىك جاسادى.
جارىس قورىتىندىسى بويىنشا, 2007-2008 جىلدارى تۋعان جاسوسپىرىمدەر اراسىندا عالىمجان بەكبەرگەن (38 كگ, جامبىل وبل), سايات بالعاباي (42 كگ, تۇركىستان وبل), ەرنۇر باتىرعالي (46 كگ, تۇركىستان وبل), شەرحان اسقاربەك (50 كگ, اتىراۋ وبل), ماعجان سۇلتانيا (55 كگ, قاراعاندى وبل), ەرداۋلەت ابدۋمۋتاليپوۆ (60 كگ, قىزىلوردا وبل), تەمىرلان ماۋلەنقۇل (65 كگ, قاراعاندى وبل), داستان ءاشىموۆ (70 كگ, قىزىلوردا وبل), الىشەر سليامجانوۆ (75 كگ, ماڭعىستاۋ وبل), شىڭعىس ەرجان ۇلى (75+ كگ, الماتى) چەمپيون اتاندى.
2005-2006 جىلعى جاستار اراسىندا بارلىق بەلدەسۋلەردە قارسىلاسىنان باسىم تۇسكەندەر بار. ۇلدار اراسىندا ازامات ءامىرحان (65 كگ, شىمكەنت), ولجاس جوسپار (70 كگ, جامبىل وبل), داۋىرسەيىتحان تەمىرحان (76 كگ, تۇركىستان وبل), شاحنياز اعىباەۆ (82 كگ, قوستاناي وبل) جانە ساردار ءابدىساميت ۇلى (82+ كگ, تۇركىستان وبل) جەڭىستىڭ بيىك تۇعىرىنا كوتەرىلدى.
ال 2005-2006 جىلعى قىزداردىڭ ناتيجەسى تومەندەگىدەي: سابينا ءۋاليحان (36 كگ, شىمكەنت), قۇندىز الماعانبەتوۆا (40 كگ, قىزىلوردا وبل), گۇلحان شىڭعىسحان (44 كگ, اتىراۋ وبل), نۇراي باقىت (48 كگ, قىزىلوردا وبل), بوتاگوز ءادىلحانوۆا (52 كگ, شقو), ماۋليتيا الەمبەكقىزى (56 كگ, شقو), زارينا مۇراداسىل (60 كگ, قىزىلوردا وبل), انيسا يباتوللا (60+ كگ, اتىراۋ وبل) ءوز سالماقتارىندا جەڭىسكە جەتتى.
جارىس ۇيىمداستىرۋشىلارى – مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى, Qazaq kuresi اسسوتسياتسياسى, شىمكەنت قالاسىنىڭ دەنە شىنىقتىرۋ جانە سپورت باسقارماسى.
