بالىق شارۋاشىلىعى كوميتەتىنىڭ رەسمي وكىلى اسلان جەڭىس ۇلىنىڭ ايتۋىنشا, «امانگەلدى اتىنداعى» جشس بالىقشىلارىنىڭ تورىنا تۇسكەن الىپ قورتپانى كاسپي تەڭىزىنە جىبەرۋگە شەشىم قابىلداندى. سالماعى – 197 كيلو, ۇزىندىعى 2 مەتر 47 سم بولاتىن بۇل بالىقتى بالىقشىلار مەملەكەتتىك تاپسىرىس اياسىندا اۋلاعان ەدى.
«وتكەن اپتادا «جايىق-اتىراۋ» بەكىرە شاباعىن ءوسىرۋ زاۋىتىنىڭ ماماندارى قورتپادان جاساندى جولمەن 35 كيلو قارا ۋىلدىرىق الدى. بۇل – 1,2 ملن دانا ۋىلدىرىق. زاۋىت ماماندارى ۋىلدىرىقتى ۇرىقتاندىرىپ, شاباق كەزەڭىنە دەيىن ينكۋباتسيالاۋعا ارنالعان اپپاراتتارعا ورنالاستىردى. ۋىلدىرىقتان جەتىلدىرىلەتىن شاباقتار الدىمەن باسسەيندەردە وسىرىلەدى. كەيىن تابيعي ورتاعا جىبەرۋگە دايىن بولعانعا دەيىن ارنايى توعاندارعا اۋىستىرىلادى. شاباقتاردىڭ ورتاشا سالماعى 3 گراممدى قۇراعان سوڭ تابيعي ورتاعا جىبەرىلەدى», دەيدى اسلان جەڭىس ۇلى.
