الدىمەن 15-ءشى شاعىن اۋدانداعى قۇرىلىسى اياقتالعان 80 پاتەرلى تۇرعىن ۇيگە بارعان ايماق باسشىسى قۇرىلىس جۇمىستارىنىڭ ساپاسىن تەكسەرىپ, بىرقاتار ەسكەرتۋ ايتتى.
تۇرعىن ءۇي اۋلاسىن اباتتىندىرۋعا دا ايرىقشا نازار اۋدارۋدى تاپسىردى.
مەردىگەر نىساندى الداعى ءبىر ايدا تولىعىمەن تاپسىرماق.
بۇدان سون نۇرجان نۇرجىگىتوۆ «بۋرىل» القابىنا ات باسىن بۇرىپ, جولداردى اسفالتتاۋ جۇمىستارىمەن تانىستى. جولاي كەزدەسكەن تۇرعىنداردىڭ ساۋالىنا جاۋاپ بەرگەن وبلىس اكىمى جول سالۋ جۇمىستارى كەزەڭ-كەزەڭىمەن اتقارىلاتىنىن جەتكىزدى. مەملەكەتتىك ساراپتامادان شىققان سوڭ 1-2 جىلدا كوشەلەردى اسفالتتاۋ باستالماق.
№54 ورتا مەكتەپ جوندەۋدى قاجەت ەتەدى. جوبالىق سىيىمدىلىعى 1200 ورىندى قۇرايتىن وقۋ ورداسىندا قازىرگى تاڭدا 2100-دەن اسا بالا ءبىلىم الىپ جاتىر.
ايماق باسشىسى مەكتەپ عيماراتىن, اۋلاسىن ارالاپ كورىپ, سانيتارلىق توراپ پەن اۋلاداعى تازالىققا قاتىستى بىرقاتار ەسكەرتپەلەر ءبىلدىردى. ال كۇردەلى جوندەۋ بويىنشا زەردەلەپ, جان-جاقتى شارالار قابىلداۋ ءۇشىن جاۋاپتىلارعا ناقتى تاپسىرمالار جۇكتەدى.
كەلەسى كەزەكتە نۇرجان نۇرجىگىتوۆ №1 ارناۋلى الەۋمەتتىك قىزمەتتەر ۇسىنۋ ورتالىعىنىڭ جاي-كۇيىمەن تانىستى. ورتالىق باسشىلىعىنا كەلۋشىلەرگە تۇرمىستىق, مەديتسينالىق, پسيحولوگيالىق, ەڭبەك, مادەني, ەكونوميكالىق, قۇقىقتىق قىزمەتتەردى ساپالى تۇردە ۇسىنۋ كەرەكتىگىن باسا ايتتى. نىساننىڭ سپورت الاڭشاسى جانە اسحاناسىن جوندەۋ ماسەلەسى نازارعا الىندى.
اسقاروۆ كوشەسىنىڭ سوڭىنداعى قۇرىلىسى ءجۇرىپ جاتقان 600 ورىندىق ورتا مەكتەپكە بارعان وبلىس اكىمى مەردىگەرگە جۇمىستاردى ساپالى ءارى بەكىتىلگەن كەستەگە سايكەس جۇرگىزۋدى تاپسىردى. قالا باسشىلىعى مەن ءتيىستى باسقارمالارعا مەپتەپكە كەلەتىن جول سالۋ جانە سۋ ماسەلەسىن شەشۋ بويىنشا شارالار قابىلداۋ كەرەكتىگىن ەسكەرتتى.
ايماق باسشىسىنىڭ جۇمىس ساپارى «پوليەتيلەن-اگرو» جشس-ءنىڭ جاڭا تسەحىندە تۇيىندەلدى. كوپجىلدىق جىلى-جاي پلەنكالارىن, مۋلچاعا ارنالعان پلەنكا ونىمدەرىن, گەومەمبرانا, پوليپروپيلەندى قاپشىقتار مەن تورلى قاپشىقتار, پوليپروپيلەندى ءجىپ وندىرۋمەن اينالىساتىن كاسىپورىندا 59 ادام جۇمىس ىستەيدى. ونىمدەر ەلىمىزدىڭ بارلىق وڭىرىنە جانە كورشى قىرعىز رەسپۋبليكاسىنا جىبەرىلەدى.
