سۋرەتتى تۇسىرگەن ج.جۇمابەكوۆ
جيىن بارىسىندا ەرلان قوشانوۆ فراكتسيا مۇشەلەرىنە پرەزيدەنت قاسىم-جومارت كەمەل ۇلى توقاەۆتىڭ قحا سەسسياسى بارىسىندا كونستيتۋتسياعا وزگەرىستەر ەنگىزۋ بويىنشا بۇكىلحالىقتىق رەفەرەندۋم وتكىزۋ تۋرالى باستاماسىنىڭ ماڭىزدىلىعىنا ەرەكشە نازار اۋداردى.
– بۇل جان-جاقتى سارالانعان تاريحي شەشىم. ءبىز مەملەكەت قۇرۋدىڭ جاڭا كەزەڭىنە اياق باسقالى تۇرمىز. ول – ازاماتاردىڭ ساياساتقا ارالاسۋ مۇمكىندىگىن كەڭەيتۋگە باعىتتالعان ەلىمىزدىڭ قوعامدىق-ساياسي جۇيەسىنىڭ ترانسفورماتسياسى. الداعى وزگەرىستەردىڭ اۋقىمىن ەسكەرە وتىرىپ, وعان كۇللى حالىقتىڭ قاتىسۋى وتە ماڭىزدى. سوندىقتان مەملەكەت باسشىسى رەفەرەندۋم وتكىزۋدى ۇسىندى, – دەدى ەرلان قوشانوۆ.
ءماجىلىس توراعاسى اتاپ وتكەندەي, قازاقستان مەملەكەت پەن قوعامنىڭ ءوزارا ءىس-قيمىلىنىڭ جاڭا مودەلىنە كوشۋدە. ول وزگەرىستەردىڭ اۋقىمى ەسكەرىلە وتىرىپ, «ەكىنشى رەسپۋبليكا» دەپ اتالدى.
ە.قوشانوۆ ءماجىلىس دەپۋتاتتارىنا دا زور جاۋاپكەرشىلىك جۇكتەلىپ وتىرعانىن ايتىپ, ولاردىڭ ءتۇسىندىرۋ جۇمىستارىنا قاتىسۋى ماڭىزدى ەكەنىن اتاپ ءوتتى.
– ءبىزدىڭ مىندەتىمىز – مەملەكەت باسشىسى ۇسىنعان ساياسي رەفورمالاردى حالىققا دۇرىس جەتكىزۋ, – دەدى پالاتا توراعاسى.
سونىمەن قاتار ەرلان قوشانوۆ ءماجىلىس دەپۋتاتتارىنا وڭىرلەردەگى ءتۇرلى ديالوگ الاڭدارىندا, ەڭبەك ۇجىمدارىندا جانە دارىگەرلەر, مۇعالىمدەر, جاستار, قوعامدىق كوشباسشىلارمەن, سونداي-اق عىلىمي-ساراپشىلىق ورتا وكىلدەرىمەن كەزدەسۋلەر وتكىزۋدىڭ قاجەتتىگىنە نازار اۋداردى. سونداي-اق بارلىق رەفورمالاردىڭ قوعام مەن ءاربىر ازامات ءۇشىن ماڭىزىن قاراپايىم تىلمەن جەتكىزۋگە ءتيىس ەكەنىن اتاپ ءوتتى.
بۇل رەتتە ءماجىلىس سپيكەرى دەپۋتاتتاردىڭ ساپارى قالالار مەن اۋداندارعا عانا ەمەس, سونداي-اق ءارتۇرلى ساناتتاعى ازاماتتاردى بارىنشا قامتي وتىرىپ, شالعاي ەلدى مەكەندەرگە شىعۋىن ۇيىمداستىرۋدى تاپسىردى.
