مينيستر ءوز سوزىندە وڭىرلىك رەكتورلار كەڭەسىن دامىتۋعا, ستۋدەنتتەر مەن وقىتۋشىلاردىڭ اكادەميالىق ۇتقىرلىعىن جەتىلدىرۋگە, ماماندىقتاردى بەيىمدەۋگە قاتىستى بىرقاتار تاپسىرما بەردى.
وتىرىس بارىسىندا رەكتورلار كەڭەسىنىڭ توراعاسى ەرلان سىدىقوۆ وتكەن جىلعى قىزمەت جانە بيىلعى جۇمىس جوسپارلارى تۋرالى حاباردار ەتتى. ونىڭ سوزىنە سۇيەنسەك, 7 وڭىرلىك رەكتورلار كەڭەسى قۇرىلىپ, الماتى مەن نۇر-سۇلتان قالالارىندا جانە 5 وڭىردە ونىڭ وتىرىستارى وتەدى. حالىقارالىق ىنتىماقتاستىق وڭ جولعا قويىلدى. ۋكراينا جوعارى وقۋ ورىندارى رەكتورلارىنىڭ كەڭەسىمەن, قىرعىزستان جوعارى وقۋ ورىندارى قاۋىمداستىعىمەن كەلىسىمدەرگە قول قويىلدى جانە رف, ءازىربايجان, وزبەكستان, ۆەنگريا, تۇركيا رەكتورلارىنىڭ كەڭەستەرىمەن دە ىنتىماقتاستىق تۋرالى قۇجاتقا قول قويۋ جوسپارلانۋدا.
رەكتورلار كەڭەسى قازاقستاندىق جوو-نىڭ QS حالىقارالىق رەيتينگسىنىدە قاتىسۋىن كەڭەيتۋ جۇمىستارىن جۇرگىزۋدە. ورتا ازيا مەملەكەتتەرىندەگى جوو رەكتورلارىنىڭ بىرلەسكەن قىزمەتى تۋرالى كەلىسىمگە قول جەتكىزىلدى.
«حالىق ۇنىنە قۇلاق اساتىن مەملەكەت» قاعيداسىن جۇزەگە اسىرۋ باعىتىندا بىرىڭعاي اقپاراتتىق-تالداۋ الاڭى رەتىندە قازاقستان جوو كونسورتسيۋمىن قۇرۋ ماسەلەسى تالقىلانۋدا. جيىن بارىسىندا رەكتورلار كەڭەسىنىڭ بيىلعى جۇمىس جوسپارىنىڭ باستى باعىتتارى قاراستىرىلدى. وقۋ ءۇردىسىن جاڭعىرتۋ جانە جوو عىلىمىن دامىتۋ ماسەلەلەرىنە باسىمدىق بەرىلمەك. سكولكوۆو جوعارى باسقارۋ مەكتەبىمەن بىرلەسە جوعارى ءبىلىم سالاسىندا باسقارۋشى-مەنەدجەرلەردى دايارلاۋ بويىنشا ارنايى باعدارلاما ازىرلەندى.
ەلىمىزدەگى ەڭ ۇزدىك سالالىق ورتالىقتاردا جاس ماماندار مەن ستۋدەنتتەردى تاعىلىمدامادان وتكىزۋ بويىنشا «تالىمگەر» باعدارلاماسى قولعا الىنباق.
ەرلان سىدىقوۆتىڭ ايتۋىنشا, احمەت بايتۇرسىن ۇلىنىڭ تۋعانىنا 150 جىل تولۋىنا بايلانىستى قازاقستاندا «احمەت بايتۇرسىن ۇلى جانە الاش قۇندىلىقتارى» تاقىرىبىندا جالپىرەسپۋبليكالىق ديكتانت وتەدى.
كەڭەستىڭ تاعى ءبىر باستاماسى – جوعارى وقۋ ورىندارىنىڭ قىزمەتىن تسيفرلاندىرۋدىڭ ۋنيۆەرسيتەتتىك الگوريتمىن ەنگىزۋ, بۇل ەل ۋنيۆەرسيتەتتەرىنىڭ بارلىق قىزمەتىن تولىققاندى تسيفرلاندىرۋعا كوشۋدىڭ بىرىڭعاي پلاتفورماسىن قالىپتاستىرۋعا مۇمكىندىك بەرەدى.
باسقوسۋ سوڭىندا رەكتورلار كەڭەسىنىڭ شەشىمىمەن حيميا عىلىمدارىنىڭ دوكتورى, پروفەسسور, قر ۇعا اكادەميگى ەرەجەپ مامبەتقازيەۆكە جانە بيولوگيا عىلىمدارىنىڭ دوكتورى, پروفەسسور جاسۇلان شايماردانوۆقا «قازاقستان رەسپۋبليكاسىنىڭ قۇرمەتتى رەكتورى» اتاعى بەرىلدى.
ايتا كەتسەك, قازاقستان رەسپۋبليكاسى جوعارى وقۋ ورىندارى رەكتورلارىنىڭ كەڭەسى 2015 جىلعى مامىردا قۇرىلدى. ونىڭ ماقساتى – جوعارى جانە جوعارى وقۋ ورنىنان كەيىنگى ءبىلىم بەرۋدى دامىتۋ ماسەلەلەرى بويىنشا جوعارى وقۋ ورىندارىنىڭ قىزمەتىن ۇيلەستىرۋ, ءبىلىم بەرۋ پروتسەستەرىن ۇيىمداستىرۋ بويىنشا وڭ تاجىريبەنى جيناقتاۋ جانە تاراتۋ, جوعارى ءبىلىم بەرۋ جۇيەسىن جەتىلدىرۋ.
