كريمينالدىق پوليتسيانىڭ مالىمەتىنشە, 1993 جىلى تۋعان ك.ەسىمدى ازامات قازاقستاندىقتاردى الداپ كەلگەن بىرنەشە قىلمىسكەرمەن بىرلەسىپ جۇمىس ىستەگەن.
«ماسەلە ازاماتتارعا قوڭىراۋ شالىپ, وزدەرىن بانك قىزمەتكەرى رەتىندە تانىستىراتىن تەلەفون الاياقتارى تۋرالى بولىپ وتىر. ودان ءارى ولار, وزدەرىنىڭ اتىنان بىرەۋ ونلاين نەسيە بەرمەكشى ەكەندىگىن حابارلايدى. ەگەر جابىرلەنۋشى قۋلىققا ءتۇسىپ قالسا, وندا قوڭىراۋ شالۋشى جيناقتى «رەزەرۆتىك شوتقا» اۋدارۋدى ۇسىنادى, وسىلايشا قىلمىسكەر باسقا ادامداردىڭ اقشاسىن وزىنە اۋدارىپ وتىرعان. ءدال وسىنداي «رەزەرۆتىك شوتتاردى» ك.ەسىمدى ازامات قامتاماسىز ەتتى. دالىرەك ايتساق, ول ادامداردى تاۋىپ, ولاردىڭ كارتالارى ارقىلى اقشا الۋدى ۇسىنىپ, وسى ارقىلى قوماقتى قارجى الۋعا بولاتىنىن انىقتاپ وتىرعان. رۇقسات ەتىلگەن ءتىنتۋ كەزىندە كۇدىكتىدەن ءارتۇرلى ەكىنشى دەڭگەيلى بانكتەردىڭ 157 كارتاسى تاركىلەندى», دەدى الماتى قالالىق پوليتسيا دەپارتامەنتى باستىعىنىڭ ورىنباسارى, پوليتسيا پولكوۆنيگى بەرىك ابىلبەكوۆ.
سونىمەن قاتار جالدامالى پاتەردە ك.ەسىمدى ازاماتپەن بىرگە تاعى ءۇش ەر ادام ۇستالدى. ولار 23 جانە 25 جاستاعى شىعىس قازاقستان, پاۆلودار وبلىستارىنان كەلگەن ازاماتتار.
«بۇل ادامداردىڭ مىندەتتەرىنە كارتوچكالارعا تۇسكەن اقشانى قولما-قول اقشاعا اينالدىرۋ كىردى. قازىرگى ۋاقىتتا جوعارىدا اتالعان ازاماتتاردىڭ وسىعان ۇقساس باسقا دا قىلمىستارعا قاتىستىلىعىن انىقتاۋ بويىنشا تەرگەۋ شارالارى جۇرگىزىلۋدە. كىنالىلەر جاۋاپقا تارتىلىپ, ازاماتتاردان اقشا الۋدىڭ تىزبەگى تولىقتاي بەلگىلى بولادى», دەدى بەرىك ابىلبەكوۆ.
ايانا توعانبەك
