قۇب توراعاسى ءپىرماتوۆتىڭ ايتۋىنشا, قازىرگى جاعدايدا ينفلياتسيانىڭ ءوسۋ ءۇردىسىن كەرى قايتارۋ ءۇشىن بازالىق مولشەرلەمەنى ارتتىرۋ قاجەت. بۇل رەتتە بازالىق مولشەرلەمەنىڭ دەڭگەيىنە قاتىستى شەشىم تەڭدەستىرىلگەن جانە بۇل شەشىم ونىڭ ەكونوميكالىق بەلسەندىلىككە اسەرىن ەسكەرە وتىرىپ قابىلدانادى.
ء«بىز بۇدان نەسيەلەۋگە جانە ەكونوميكالىق وسۋگە ايتارلىقتاي قاۋىپ توندىرمەيتىنىن كورىپ وتىرمىز, بىراق ينفلياتسيانى باقىلاۋ ءۇشىن اسا ماڭىزدى. بەلگىلەنگەن بازالىق مولشەرلەمە دەڭگەيىنە قاتىستى ايتاتىن بولساق, قازىرگى ۋاقىتتا وڭتايلى شەشىم بولعانى ءسوزسىز جانە بۇگىنگى قالىپتاسقان جاعدايعا تولىقتاي سايكەس كەلەدى. جۇمسارتىلعان اقشا-كرەديت ساياساتى ءبىر مەزەتتىك كۇماندى پايداعا كەنەلتۋى مۇمكىن, بىراق ۇزاق مەرزىمدى پەرسپەكتيۆادا ونىڭ سالدارى قايتارىمسىز بولادى», دەدى ءپىرماتوۆ قۇب-تىڭ ءباسپاسوز-بريفينگى كەزىندە.
بريفينگتە ايتىلعان مالىمەتكە سايكەس, نەسيەلەندىرۋ كولەمىنىڭ وسۋىنە قاراپ ەكونوميكالىق بەلسەندىلىكتى باعالاۋعا بولادى. ماسەلەن, ءبىرىنشى توقساندا ەكونوميكاعا بەرىلگەن جاڭا كرەديتتەردىڭ كولەمى 2021 جىلدىڭ وسى كەزەڭىمەن سالىستىرعاندا 25,3 پايىزعا ۇلعايعان, ونىڭ ىشىندە بيزنەسكە - 19,6 پايىز, حالىققا - 32,5 پايىز.
«دەگەنمەن, 2022 جىلعى ناۋرىزدىڭ قورىتىندىسى كورسەتكەندەي, بەلگىسىزدىك بەلەڭ الىپ, نەسيە بەرۋ شارتتارى وزگەرىپ جاتقان جاعدايدا مولشەرلەمەنىڭ كوتەرىلگەنى كرەديتتەۋ ءۇشىن تەجەۋشى فاكتور بولمايدى», دەدى ءپىرماتوۆ.
ۇلتتىق بانكتىڭ اقشا-كرەديت ساياساتى جونىندەگى كوميتەتىنىڭ بازالىق مولشەرلەمە بويىنشا كەزەكتى جوسپارلى شەشىمى 2022 جىلى 6 ماۋسىمدا نۇر-سۇلتان ۋاقىتى بويىنشا ساعات 15:00-دە جاريالانادى.
ايتا كەتەيىك, ۇلتتىق بانكتىڭ اقشا-كرەديت ساياساتى جونىندەگى كوميتەتى (قۇب) 25 ساۋىردە بازالىق مولشەرلەمەنى + / - 1,00 پ. ت. پايىزدىق دالىزىمەن جىلدىق 14 پايىز دەڭگەيىندە بەلگىلەۋ تۋرالى شەشىم قابىلدادى.
