بۇگىنگى اڭگىمە بەلگىلى سۋرەتشى مولداحمەت كەنباەۆتىڭ «تىركەمەشى» كارتيناسى جايىندا بولماق. تىڭ يگەرۋ كەزەڭى كسرو تاريحىنىڭ اجىراماس بولىگىنە اينالدى. ءتىپتى كوركەمسۋرەت وقۋ ورنىن اياقتاعاننان كەيىن ءوز ەركىمەن تىڭعا كەلىپ جاتقان تانىمال سۋرەتشىلەردىڭ شىعارماشىلىعىنا دا ارقاۋ بولدى. كەڭەس يدەولوگياسى بەينەلەۋ ونەرىنە دە تاقىرىپتىق تۇرعىدان تۇساۋ سالدى.
قىلقالام شەبەرى مولداحمەت كەنباەۆ ۆ.ي.سۋريكوۆ اتىنداعى ماسكەۋ كوركەمسۋرەت ينستيتۋتىنىڭ سوڭعى كۋرسىندا وقىپ جۇرگەنىندە تىڭعا ءوزىنىڭ ءبىر توپ كۋرستاسىمەن كەلگەن. ويتكەنى جاڭا استىققا جەر يگەرۋ ءوزىنىڭ تۋعان ولكەسى قازاقستان جەرىندە باستالىپ جاتقان ەدى. تىڭعا جاساعان ساپارى سۋرەتشى ءۇشىن ماڭىزدى ءرول اتقاردى. سولتۇستىك قازاقستاندا, ەسىل وزەنىنىڭ كورىكتى جاعالاۋىندا العاشقى تىڭ يگەرۋشىلەردىڭ ءومىرى مەن شوپانداردىڭ ەڭبەگى تۋرالى سۋرەت سالۋ يدەياسى پايدا بولادى.
سۋرەتكەر «تىركەمەشى» كارتيناسىندا تراكتور سۇيرەپ بارا جاتقان سوقانىڭ رولىندە وتىرعان نازىك قىزدى بەينەلەيدى. ۇشى-قيىرى جوق قازاق دالاسىندا ىمىرت جامىلا باستاعان كەز, ايدالعان جەردىڭ اتىزدارى كوكجيەككە دەيىن سوزىلىپ جاتىر, جەل قىزدىڭ بۇرىمدارىن, ءشوپتى تەربەتىپ تۇر.
وسى ساتتە اۆتور بار نازاردى قىزعا اۋدارتادى. ول – ءتۇس پەن ولشەمى تابىلعان كومپوزيتسيالىق ورتا. قىزدىڭ تۇلعاسى كومپوزيتسياداعى ەڭ ءىرى ەلەمەنت جانە ونىڭ قاراقوڭىر ءتۇسى اشىق اسپان مەن كۇڭگىرت ءشوپتىڭ فونىندا ايقىن ەرەكشەلەنگەن. ايدالعان جەردىڭ اتىزدارىن كەسكىلەگەن سوقانىڭ تىستەرى ىرعاق تۋدىرىپ تۇر. ول جەڭىل ءارى سىزىقتىق كورىنىستەردى پايدالانا وتىرىپ, كەڭىستىككە تەرەڭدىك بەرەدى. سول ارقىلى دالانىڭ شەكسىزدىگىن سەزدىرەدى.
شىن مانىندە, سۋرەتشى ءوز كارتينالارىندا قاراپايىم ەڭبەككەرلەردىڭ, العاشقى تىڭ يگەرۋشىلەردىڭ, كولحوزشىلاردىڭ ەڭبەكتەرىن كورسەتە بىلگەن. سوقانىڭ نە كومبايننىڭ رۋلىندە وتىرىپ-اق, ەگىستىكتەن سارى التىننىڭ ماساقتارىن جيناپ, بولماسا مال شارۋاشىلىعىمەن اينالىسىپ-اق, شىعارماشىلىق قۋانىشىن سەزىنۋگە بولاتىنىن ايقىندايدى.
