جۋىردا كارديولوگيا جانە ىشكى اۋرۋلار عزي-دا رەسەيدىڭ جەتەكشى مەدسي Premuim كومپانياسىنىڭ پروفەسسورى, مەديتسينا عىلىمدارىنىڭ دوكتورى پەتر ششەرباكوۆتىڭ قاتىسۋىمەن گاستروەنتەرولوگتەر مەن ەندوسكوپيست دارىگەرلەر ءۇشىن شەبەرلىك ءدارىسى ءوتتى. سونداي-اق شەبەرلىك ساعاتىندا اششى ىشەكتى زەرتتەۋدىڭ «التىن ستاندارتى» سانالاتىن Smart Capsule بەينەكاپسۋلالىق ەندوسكوپيانىڭ تۇساۋى كەسىلدى.
«2014 جىلدان باستاپ ينستيتۋتتا قازاقستاندا تۇڭعىش رەت بەينەكاپسۋلالىق ەندوسكوپيا جاسالىناتىندىقتان, وسى بىرەگەي زەرتتەۋدى جۇرگىزۋدە تاجىريبە جيناقتالدى. بەينەكاپسۋلالىق ەندوسكوپيا – بۇل گاسترو جانە كولونوسكوپيانىڭ ءداستۇرلى ادىستەرىنە قولجەتىمسىز جىڭىشكە ىشەك اۋماعىن كورۋگە مۇمكىندىك بەرەتىن كاپسۋلانىڭ كومەگىمەن اسقازان-ىشەك جولدارىن زەرتتەۋدىڭ زاماناۋي ءادىسى. زەرتتەۋدىڭ ەرەكشەلىگى –
ىشەك تولىعىمەن تەكسەرىلەدى. پاتسيەنت جايسىزدىقتى سەزىنبەيدى, زەرتتەۋ جۇرگىزۋ ءۇشىن ناركوز جاساۋدىڭ قاجەتتىلىگى جوق. پروتسەدۋرا ەشقانداي اۋىرتپالىقسىز وتەدى. بەينەكاپسۋلا ءبىر رەت قانا قولدانىلاتىندىقتان, پاتسيەنتتىڭ جۇقتىرۋ مۇمكىندىگىن بولدىرمايدى. زەرتتەۋدى امبۋلاتوريالىق جاعدايدا دا, سونداي-اق ستاتسيونار جاعدايىندا دا جۇرگىزۋگە بولادى», دەدى ينستيتۋتتىڭ باسقارما ءتورايىمى, پروفەسسور روزا قۋانىشبەكوۆا.
MEDSI Premuim كلينيكاسى ديرەكتورىنىڭ ورىنباسارى پەتر ششەرباكوۆ زاماناۋي كاپسۋلالار جاساندى ينتەللەكت جۇيەسىمەن جابدىقتالعانىن, كەسكىن ساپاسى دا ايتارلىقتاي جاقسارعانىن اتادى. سونداي-اق ول قازاقستاندىق ماماندار – ەندوسكوپيستەردىڭ دايىندىعى جاقسى ەكەنىنە دە توقتالدى.
ء«ار مامان ءوز ءبىلىمىن ۇنەمى جاڭارتىپ, جاڭا داعدىلاردى يگەرىپ, مەديتسينا سالاسىنداعى يننوۆاتسيالار تۋرالى حاباردار بولۋعا ءتيىس. دارىگەرلەرىمىز پاتسيەنتتەردىڭ ساپالى, دەر كەزىندە جانە بىلىكتى مەديتسينالىق كومەك الۋى ءۇشىن ۇنەمى ماشىقتارىن جەتىلدىرىپ, شەبەرلىك دارىستەرگە, سەمينارلارعا قاتىسىپ, تاجىريبە الماسىپ وتىرادى», دەيدى روزا توحتاناليقىزى.
كلينيكانىڭ ەندوسكوپيا جانە ينتەرۆەنتسيالىق گاستروەنتەرولوگيا بولىمشەسىنىڭ مەڭگەرۋشىسى ۆلاديسلاۆ زەلينسكي Smart Capsule بەينەكاپسۋلالىق ەندوسكوپيا قالاي قولدانىلاتىنىن تومەندەگىدەي ءتۇسىندىردى. اسقازان-ىشەك جولدارىن پروتسەدۋراعا دايىنداعاننان كەيىن, زەرتتەۋ جۇرگىزگەن كۇنى پاتسيەنتتىڭ بەلىنە جازىپ وتىراتىن قوندىرعى ىلىنەدى. پاتسيەنت ادەتتەگى تابلەتكا سەكىلدى كاپسۋلانى جۇتادى. كاپسۋلا تابيعي تۇردە اسقازان-ىشەك جولىمەن قوزعالادى, ورناتىلعان كامەرا سۋرەتكە تۇسىرەدى, بارلىق اقپارات جازىپ وتىراتىن قۇرىلعىعا جىبەرىلەدى. ادەتتە, الىنعان جازبانىڭ ۇزاقتىعى 14-15 ساعاتتى قۇرايدى. ەندوسكوپيست دارىگەر الىنعان مالىمەتتەردى تالداپ, قورىتىندى بەرەدى. كاپسۋلا ءبىراز ۋاقىتتان كەيىن اعزادان ءوزى تابيعي جولمەن شىعادى.
«كەشە ءبىز زەرتتەۋگە كىرىسىپ كەتتىك. بۇگىن ماسكەۋلىك ارىپتەسپەن بىرگە الگوريتمدەردىڭ كومەگىمەن پاتسيەنتتىڭ بەينە جانە فوتو سۋرەتتەرىمەن جۇمىس ىستەيتىن بولامىز, الىنعان دەرەكتەردى زەرتتەپ, قورىتىندىسىن بەرەمىز», دەيدى دارىگەر.
زەرتتەۋدىڭ وسى ءادىسى تەمىر جەتىسپەۋشىلىگى انەمياسى سالدارىنان جىڭىشكە ىشەكتەن قان كەتۋ, جاسىرىن قانعا ءناجىستىڭ وڭ ناتيجەسىنىڭ بولۋى, جىڭىشكە ىشەكتىڭ قابىنىپ اۋرۋى, ونىڭ ىشىندە كرون اۋرۋىنا جانە جىڭىشكە ىشەك ىسىگىنە كۇدىك تۋىنداعان جاعدايدا, تۇقىم قۋالايتىن پوليپوزدارى بار پاتسيەنتتەرگە, ءىشتىڭ تۇسىنىكسىز اۋرۋى مەن باسقا دا بەلگىسىز ەتيولوگيادا, جىلدام سالماق جوعالتۋ جاعدايىندا كورسەتىلەتىنىن ايتا كەتكەن ءجون. بەينەكاپسۋلا اششى ىشەكتى مەيلىنشە مۇقيات زەرتتەيدى.
كاپسۋلالىق ەندوسكوپيا جىڭىشكە ىشەك اۋرۋلارىن دياگنوستيكالاۋدىڭ «التىن ستاندارتى» دەسەك تە بولادى.
