ناۋرىزدا Astana International Exchange – AIX-تەگى ساۋدا-ساتتىق 7 645 505 دوللاردى قۇرادى. اقپاندا بۇل كورسەتكىش 13 195 870 دوللارعا تەڭ ەدى. ءبىرىنشى توقساننىڭ قورىتىندىسى بويىنشا «استانا» حالىقارالىق قارجى ورتالىعىنىڭ بيرجاسىنداعى ساۋدا-ساتتىق كولەمى 10 703 210 دوللارعا نەمەسە 24,8 پايىزعا تومەندەگەن.
ناۋرىز ايىنىڭ سوڭىندا AIX-تە ۇلەستىك قۇرالدار ليستينگى بار كومپانيالاردىڭ جالپى نارىقتىق كاپيتالداندىرىلۋى («قازاتومونەركاسىپ», Polymetal, «حالىق بانكى», Ferro-Alloy Resources Limited, «بانك تسەنتركرەديت», Kaspi.kz) 22,7 ملرد دوللاردان استى.
وتكەن ايدا AIXQI يندەكسى قالپىنا كەلە باستادى. يندەكستىڭ ءمانى 801.1 پۋنكتتەن 932.51 پۋنكتكە (+16,4 پايىز) دەيىن ءوستى. 9 كومپانيانىڭ 5-ءى ايدى جاسىل ايماقتا اياقتادى. ايدىڭ قورىتىندىسى بويىنشا, Central Asia Metals اكتسيالارى ايتارلىقتاي ءوستى (+13,15 پايىز). ناۋرىزدا كومپانيا 2021 جىلعى قىزمەتىنىڭ ناتيجەلەرىن جاريالادى. وندا ءتۇسىمنىڭ, تازا پايدانىڭ وسكەنى, اكتسيونەرلەرگە ديۆيدەندتىك تولەمدەر مولشەرىنىڭ ارتقانى جانە باسقا دا قارجى ولشەمدەرىنىڭ جاقسارعانى ايتىلعان.
ناۋرىزدا «قازاتومونەركاسىپتىڭ» اكتسيالارى 9,88 پايىزعا ءوستى. وتكەن ايدا ۇلتتىق كومپانيا الەمدىك ۋران باعاسىنىڭ رەكوردتىق وسۋىنە قاراماستان ءتۇسىمىنىڭ تومەندەگەنى تۋرالى ەسەپ بەردى. بۇعان ۋراندى ۇزاق مەرزىمدى كەلىسىمشارتتاردا بەلگىلەنگەن باعاعا سايكەس جەتكىزۋى كەرى اسەر ەتكەن.
«بانك تسەنتركرەديت» اكتسيالارى 3,73 پايىزعا ءوستى, ال «حالىق بانكتىڭ» اكتسيالارى -1,02 پايىزعا تومەندەدى. وتاندىق بانك سەكتورى قاڭتار وقيعالارىنان كەيىن شامالى السىرەپ قالدى. ناۋرىزدا قالپىنا كەلە باستادى. ءبىرىنشى توقسانداعى قارىز الۋشىلاردىڭ كرەديتتىك بەلسەندىلىگىنىڭ تومەندىگىنە جانە ۇلتتىق بانكتىڭ اقشا-كرەديت ساياساتىن قاتاڭداتۋ جونىندە ءبىر جىلدا ەكىنشى رەت قابىلداعان شەشىمىنە قاراماستان (بازالىق مولشەرلەمەنىڭ بىردەن 13,50 پايىزعا دەيىن ءوسۋى) اقپان ايىندا نەسيە پورتفەلى 3,26 پايىزعا دەيىن ءوستى.
Kcell (0,59 پايىز) مەن «قازاقتەلەكوم» (0,16 پايىز) اكتسيالارى ناۋرىزدا ءوسىم كورسەتتى. KazTransOil اكتسيالارى -3,43 پايىز جوعالتتى. Kaspi.kz اكتسيالارى 15,44 پايىزعا تومەندەدى. كومپانيا لوندون قور بيرجاسىندا ليستينگتەن وتكەن جاھاندىق دەپوزيتارلىق قولحاتتاردى كەرى ساتىپ الۋ باعدارلاماسىن ىسكە قوسۋ مۇمكىندىگى تۋرالى حابارلادى. كومپانيا باسشىسىنىڭ مالىمدەۋىنشە, اعىمداعى نارىقتىق كاپيتالداندىرۋ Kaspi.kz قىزمەتىنىڭ ناتيجەلەرىن ءتيىستى تۇردە كورسەتپەيدى. كومپانيا ورتامەرزىمدى پەرسپەكتيۆادا ءوسۋ تراەكتورياسىنىڭ كەلەسى كەزەڭى ءۇشىن نەعۇرلىم قولايلى بيرجادا ليستينگتى قامتاماسىز ەتۋگە شارالار قابىلدايدى دەپ كۇتىلۋدە.
رەسەيگە جاسالعان سانكتسيالىق قىسىم Polymetal باعاسىنا كەرى اسەرىن تيگىزۋدە. ناۋرىز جانە اقپان ايلارىندا كومپانيا اكتسيالارى -13,06 جانە -65,63 پايىزعا تومەندەدى. دەسە دە رەسمي مالىمدەمەگە سۇيەنسەك, سانكتسيالار كومپانيانىڭ قىزمەتىنە ايتارلىقتاي اسەر ەتپەگەن. Polymetal-عا ناقتى سانكتسيا سالىنۋى ەكىتالاي. بىراق مۇنى جوققا شىعارۋعا دا بولمايدى.
