سابيلەردىڭ اتا-اناسىن العاشقى بولىپ وبلىس اكىمى نۇرلىبەك نالىباەۆ قۇتتىقتاپتى. ايماق باسشىسىنىڭ سالەمى مەن نارەستەلەرگە سىي-سياپاتتى وبلىستىق ىشكى ساياسات باسقارماسىنىڭ باسشىسى ميرا قازبەكوۆا مەن وبلىستىق دەنساۋلىق ساقتاۋ باسقارماسىنىڭ جەتەكشىسى ءسابيت پازىلوۆ تابىستادى.
– ءوڭىر باسشىسىنىڭ «دۇنيە ديدارىنا كەلىپ, اۋلەتتى قۋانىشقا بولەگەن باۋىر ەت بالاپاندارىڭىز ەلىنە ەلەۋلى, ۇلتقا ادال قىزمەت ەتەر ازامات اتانسىن. شاڭىراقتارىڭىزدى قۋانىشقا كەنەلتىپ جاتقان ۇشەمدەردىڭ باۋى بەرىك, ءومىر جاسى ۇزاق بولسىن. اتا-اناسىنىڭ ءۇمىتىن اقتايتىن, بولاشاعى جارقىن, باقىتتى بالالار بولىپ ءوسىپ, ەر جەتسىن» دەگەن تىلەگىنە ريزامىز. جالپى, مەنىڭ انام 9 قۇرساق كوتەرگەن, مەن ءۇيدىڭ كەنجەسىمىن. كەزىندە انامنىڭ سىڭارى تۋا سالا شەتىنەپ كەتكەن ەكەن, كەلىنشەگىمنىڭ ناعاشىلارى اراسىندا ەگىزدەر بار. سوندىقتان دا بىلتىر دۇنيەگە ەگىزدەر كەلگەندە «تۇقىمدا بار عوي» دەسكەنبىز. قازىر ولار اياعىن اپىل-تاپىل باسىپ ءجۇر. ال مىنا سابيلەردىڭ ۇشەم ەكەنىن العاش بىلگەندە سەنەر-سەنبەسىمىزدى بىلمەي قالدىق, – دەيدى قۋانىشتان تولقىعان باقىتبەك.
ۇشەمدەردىڭ اكەسى باقىتبەك قياسوۆ جەكە كولىگىمەن جۇك تاسيدى. انالارى ەلۆيرا ابدىعاپپاروۆا زاڭگەرلىك ماماندىعىن بالانىڭ بازارىنا ايىرباستاعان باقىتتى جان.
جاساي بەرىڭدەر, قازاقتىڭ التىن قۇرساق انالارى!
