35 جاستاعى ارگەنتينانىڭ ارلانى سانتياگو پونزينيببيو 77 كيلو سالماق دارەجەسىندەگى ەڭ مىقتى نوكاۋتەر دەپ تانىلدى. ول 33 كەزدەسۋىنىڭ 28-ءىن مەرزىمىنەن بۇرىن اياقتاعان ەكەن. ەكىنشى جانە ءۇشىنشى ورىنداردا – برازيليالىق ۆيسەنتە لۋكە مەن امەريكالىق حورحە ماسۆيدال. العاشقىسى 19 (30 كەزدەسۋ), ەكىنشىسى 18 (51 كەزدەسۋ) قارسىلاسىن ەسىنەن تاندىردى. ءتورتىنشى ساتىعا 15 رەت (15 كەزدەسۋ) ايقىن جەڭىسكە قول جەتكىزگەن شاۆقات راحمونوۆ جايعاستى. وسى ورايدا, قازاق سپورتشىسى جوعارىدا ەسىمدەرى اتالعانداردان الدەقايدا از باسەكە وتكىزگەنىن ەسكەرگەن ءجون. جانە دە شاۆقات ءوز جەكپە-جەكتەرىنىڭ بارلىعىندا جەڭىسكە جەتتى. ال پونزينيببيو (5 رەت), لۋكە (8 رەت) مەن حورحە ءماسۆيدالدىڭ (16 رەت) ءبىر ەمەس, بىرنەشە رەت جەڭىلىستىڭ كەرمەك ءدامىن تاتقانىن كوزىمىز كوردى. وسى جاعىنان الساق, قانداسىمىزدىڭ وزگەلەردەن كوشىلگەرى ەكەنى ەش داۋ تۋعىزبايدى. ويتكەنى راحمونوۆ 100 پايىزدىق كورسەتكىشكە قول جەتكىزىپ وتىر. سونداي-اق ۇزدىكتەر تىزىمىندە گيلبەرت بەرنس (25 كەزدەسۋ, 20 جەڭىس, 15 نوكاۋت), لي دجينگليانگ (25-18-16), مايكل كەزا (24-18-11), حامزات چيماەۆ (11-11-10), دجەفف نيل (18-14-11) جانە كامارۋ ۋسمان (21-20-10) سىندى ساڭلاقتار بار.
قارسىلاستارىن ەسىنەن تاندىرعان سويقان سوققىلى سپورتشىلاردىڭ رەيتينگىندە شاۆقات راحمونوۆ جەتىنشى ورىندا نىق تۇر. باسەكە بارىسىندا ول سەگىز قارسىلاسىن سۇلاتىپ سالىپ, اۋىر نوكاۋتقا جىبەردى. ازىرگە حورحە ماسۆيدال (16 نوكاۋت), سانتياگو پونزينيببيو (15), ۆيسەنتە ليۋكە (11), لي دجينگليانگ (9), كامارۋ ۋسمان (9) جانە دجەفف نيل (8) عانا جەرلەسىمىزدەن وزىپ تۇر.
سابميشن, ياعني «قىلقىندىرۋ» نەمەسە «اۋىرتۋ» ءتاسىلى ارقىلى جەڭىسكە جەتكەن جامپوزداردىڭ تىزىمىندە شاۆقات ۇزدىك بەستىكتى تۇيىندەۋدە. ول جەتى جەكپە-جەگىندە جوعارىدا ايتىلعان ادىستەردى قولدانىپ, قارسى كەلگەندەردى تىرپ ەتكىزبەي ۇتتى. كۇرەس ونەرىنىڭ ءتاسىلىن ەڭ كەرەمەت قولدانىپ جۇرگەندەر قاتارىندا مايكل كەزا (11 سابميشن), كامارۋ ۋسمان (8), گيلبەرت بەرنس (8) جانە ۆيسەنتە لۋكە (8) بار.
UFC-دەگى جارتىلاي ورتا سالماق دارەجەسىنىڭ جالپى رەيتينگىندە الاشتىڭ ماقتان تۇتار ازاماتى ازىرگە 15-ورىندى يەلەنۋدە. بۇل – قازاقستاندىق جەكپە-جەك شەبەرلەرى اراسىنداعى ەڭ ۇزدىك كورسەتكىش. وسى سالماقتىڭ تەڭدەسسىزى – 35 جاستاعى كامارۋ ۋسمان. ول اقش-تا تۋىپ-وسكەنىمەن, اكە-شەشەسى نيگەريادان قونىس اۋدارىپ كەلگەن. چەمپيوندىق بەلبەۋ ءدال ۋسمانعا تيەسىلى. ونى 34 جاستاعى كاليفورنيا شتاتىنىڭ تۋماسىن كولبي كوۆينگتون وكشەلەپ كەلەدى. كوۆينگتون رەيتينگتە ءبىرىنشى ورىندى يەلەنۋدە. ەكىنشى جانە ءۇشىنشى ساتىلارعا ۇلىبريتانيالىق لەون ەدۆاردس پەن شۆەتسيالىق حامزات چيماەۆ جايعاستى. ودان كەيىنگى ورىنداردا برازيليالىق گيلبەرت بەرنس پەن امەريكالىق ۆيسەنتە لۋكە. 6-12 ورىنداردىڭ بارلىعىنا تەگىستەي اقش فايتەرلەرى تۇراقتادى. ولار – بەلال مۋحامماد, ستيۆەن تومپسون, حورحە ماسۆيدال, شون برەيدي, نيل مەگني, مايكل كەزا جانە دجەفف نيل. سونداي-اق قىتايلىق لي دجينگليانگ پەن ارگەنتينالىق سانتياگو پونزينيببيو ۇزدىك 15 سپورتشىنىڭ ساناتىندا.
