2025 جىلعا قاراي «جاسىل قازاقستان» ۇلتتىق جوباسى اياسىندا 2 ملرد جاڭا اعاش وتىرعىزۋ ماقساتىنا قول جەتكىزۋگە شەتەلدىك ديپلوماتتار دا ءوز ۇلەستەرىن قوستى. سەنبى كۇنى نۇر-سۇلتان قالاسىنداعى بوتانيكالىق ساياباقتا ديپلوماتيالىق وكىلدىكتەردىڭ قىزمەتكەرلەرى مەن ولاردىڭ وتباسى مۇشەلەرى 50 ءتۇپ كوشەت وتىرعىزدى.
ءبىر قىزىعى, ءبىر كۇن بۇرىن, 22 ساۋىردە بۇكىل الەم قامقورلىق پەن قورشاعان ورتانى قورعاۋدى بەينەلەيتىن جەر كۇنىن اتاپ ءوتتى.
«پرەزيدەنت قاسىم-جومارت توقاەۆ قازاقستاننىڭ جاسىل ترانسفورماتسياسى اياسىندا 5 جىل ىشىندە 2 ملرد اعاش وتىرعىزۋعا كومەكتەسۋگە مىندەتتەمە الدى. ءبىز ارىپتەستەرىمىزبەن بىرلەسىپ نۇر-سۇلتان بوتانيكالىق باعىندا اعاشتار وتىرعىزىپ, 22 ساۋىردەگى جەر كۇنىن اتاپ وتتىك», دەدى ۇلىبريتانيا ەلشىسى كەتي ليچ.
ەۋروپالىق وداق ميسسياسىنىڭ باسشىسى كەستۋتيس يانكاۋسكاس: « ۇلى دالانى كوگالداندىرۋعا جانە كليماتتىڭ وزگەرۋىمەن كۇرەسۋگە كىشىگىرىم, بىراق ماڭىزدى ۇلەسىمىز. قازاقستان مەن ەۋرووداق كۇشتەردى بىرىكتىرە وتىرىپ, اناعۇرلىم تازا قورشاعان ورتا, سۋ جانە اۋا ءۇشىن كۇرەسكە سالماقتى ۇلەس قوسا الادى!», دەپ اتاپ ءوتتى.
ال نيدەرلاند ەلشىسى اندرە كارستەنس مۇنداي شارالار قازاقستان حالقىنىڭ كۇندەلىكتى ءومىرىن جاقسارتىپ, ەكونوميكانى تۇراقتى تۇردە ءارتاراپتاندىرۋ ءۇشىن كوبىرەك ينۆەستيتسيالار تارتۋعا مۇمكىندىك بەرەدى دەگەن پىكىر ءبىلدىردى.
