ەكولوگيالىق زيانسىز تەحنيكالار

جاقىندا ەلوردادا «استانا تازارتۋ» جشس-ءنىڭ گازبەن جانە ديزەل وتىنىمەن جۇرەتىن سوڭعى ۇلگىدەگى قۇرالدارىمەن جابدىقتالعان جاڭا مامانداندىرىلعان تەحنيكالارىنىڭ تۇساۋكەسەرى بولىپ ءوتتى. قالانىڭ ەكولوگيالىق احۋالىن جاقسارتۋ ماقساتىندا «استانا تازارتۋ» جشس-ءنىڭ تۇرمىستىق قالدىقتار مەن كۇل-قوقىس شىعاراتىن 9 تەحنيكاسى اتالمىش جۇيەمەن جابدىقتالدى. جابدىق تولىقتاي سىناقتان ءوتتى. مامانداردىڭ ايتۋىنشا, گازدى وتىن جۇيەسىن ەنگىزۋدىڭ باستى ارتىقشىلىعى – قورشاعان ورتاعا جىبەرىلەتىن ۋلى قالدىق زاتتاردىڭ مەيلىنشە تومەندەۋىنە ىقپال ەتەدى. سونىمەن قاتار, بىرتىندەپ گازدى وتىنعا اۋىسۋ جانارماي ساتىپ الۋ شىعىنىن ايتارلىقتاي ازايتادى. «ەۋروپا – گاز باللونى قۇرالىن پايدالانۋدا ءبىرىنشى ورىندا تۇر. وكىنىشكە قاراي, كەڭەستىك كەڭىستىك ەلدەرىندە ەكونوميكالىق تيىمدىلىك باسىم­دىققا الىنعان. ارينە, ول دا ماڭىزدى ەكەنىن تۇسىنەمىن. ءبىزدىڭ قۇرال ديزەل قوزعالتقىشى شىعىن­دىلارىنىڭ ەكولوگيالىق اسەرىن ايتارلىقتاي جاقسارتادى جانە ادامنىڭ دەنساۋلىعىنا زيان قالدىقتاردى ازايتادى», دەدى تۇساۋكەسەردە ءسوي­لەگەن سوزىندە «اۆتوگاز گلوبال» پرەزيدەنتى ميحايل ياكوۆەنكو. «استانا-تازارتۋ» جشس – BLUE POWER DIEZEL جۇيەسىن ەنگىزۋ ارقىلى قولدانىستاعى مامانداندىرىلعان تەحنيكالارىنا جاڭعىرتۋ جۇرگىزگەن قالاداعى بىردەن-ءبىر كوممۋنالدىق كاسىپورىن. «استانا تازارتۋ» جشس باس ديرەكتورى يۆان لاۆرينەنكو مالىمدەگەندەي, 3 ايلىق سى­­­ناق مەرزىمىندەگى ناتيجە كوڭىل كونشىتەرلىك. «ءار ماشينادان شىعاتىن ەكولوگيالىق قالدىقتار اۆتوماتتى تۇردە 0,12-دەن 0,02-گە ازايدى. ەكىنشى ءبىزدى قىزىقتىرىپ وتىرعان ماسەلە, جاڭا قوندىرعىنىڭ كاسىپورىنعا تيگىزەتىن ەكونوميكالىق تيىمدىلىگىندە بولىپ وتىر. جاڭا قوندىرعىلار كاسىپورىنعا بىرقاتار قارجى ۇنەمدەۋگە جاعداي جاسايدى. ۇنەمدەلگەن بۇل قاراجات قۇرىلعىنى ورناتۋ جۇمىسىن اقتايدى جانە پارك تەحنيكالارىن تاعى دا جاڭعىرتۋعا مۇمكىندىك بەرەدى. بيىل ءبىز وسىنداي 7 جاڭا تەحنيكا الۋدى جوسپارلاپ وتىرمىز. بۇل ارينە جۇمىسىمىزدى وڭتايلاندىرادى. جۇمىس كەستەسىندە كەدەرگىلەر بولمايدى جانە جاڭا جۇمىس ورىندارى اشىلادى», دەيدى كاسىپورىن باسشىسى. جىلقىباي جاعىپار ۇلى, «ەگەمەن قازاقستان».