جاڭادان پايدا بولعان بۇل مەملەكەتتىك قىزمەتتى سەمەي سىناق پوليگونى اۋماعىندا 1949-1990 جىلدار ارالىعىندا تۇرعان ازاماتتار پايدالانا الادى.
«مەملەكەتتىك قىزمەتتىڭ كومەگىمەن ازاماتتارعا جەڭىلدىكتەر مەن وتەماقىلار الۋ قۇقىن راستايتىن كۋالىك الۋ مۇمكىندىگى بەرىلەدى. جاڭا قىزمەت eGov.kz پورتالىندا تەگىن كورسەتىلەدى جانە 2022 جىلدان باستاپ قولجەتىمدى. قىزمەت ىسكە قوسىلعاننان بەرى 311 ازامات ونلاين رەجىمىندە كۋالىك پەن وتەماقى الۋعا ءوتىنىش بەردى. وسىنداي قىزمەت ەلىمىزدەگى حالىققا قىزمەت كورسەتۋ ورتالىعىندا دا كورسەتىلەدى. بىراق بىلتىر 7 مىڭعا جۋىق ادام قاعاز تۇرىندە ءوتىنىش بەرگەن», دەيدى «ۇلتتىق اقپاراتتىق تەحنولوگيالار» اق باسقارما توراعاسى روستيسلاۆ كونياشكين.
ونىڭ ايتۋىنشا, بۇرىن مۇنداي قىزمەت ءتۇرى قاعاز تۇرىندە عانا كورسەتىلىپ كەلگەن. كەيىن ازاماتتارعا ىڭعايلى بولۋ ءۇشىن مەملەكەتتىك ورگاندارمەن بىرلەسە وتىرىپ, قىزمەت ءتۇرى ونلاين فورماتقا كوشىرىلگەن.
قىزمەتتى پايدالانۋ ءۇشىن egov.kz پورتالىنا كىرىپ, باستى بەتتەگى «الەۋمەتتىك قامسىزداندىرۋ» ءبولىمىن اشىپ, «وتباسىلارعا كومەك» تارماعىن تاڭداۋ قاجەت. وسى ءبولىمنىڭ ىشىندە قاجەت قىزمەت ءتۇرى جازىلعان. ءارى قاراي پايدالانۋشى پورتالدا تىركەۋدەن ءوتىپ, ونلاين قىزمەتكە تاپسىرىس بەرەدى. بارلىق قاجەتتى جولدى تولتىرعاننان كەيىن ەتسق نەمەسە ەكى فاكتورلى اۋتەنتيفيكاتسيا كومەگىمەن وتىنىمگە قول قويادى.
«مەملەكەتتىك قىزمەتتى كورسەتۋ ناتيجەسى 20 جۇمىس كۇنى ىشىندە دايىن بولادى جانە پايدالانۋشىنىڭ «جەكە كابينەتىندە» حابارلاما تۇرىندە ساقتالادى. حابارلامانى العاننان كەيىن ءوتىنىش بەرۋشى تۇرعىلىقتى مەكەنجايىندا ورنالاسقان جۇمىسپەن قامتۋ جانە الەۋمەتتىك باعدارلامالار بولىمىنە بارىپ, جەكە كۋالىكتىڭ تەلنۇسقاسىن الۋى قاجەت. بىرجولعى مەملەكەتتىك اقشالاي وتەماقى وڭىرلەر, رەسپۋبليكالىق ماڭىزى بار قالالار جانە مەملەكەت استاناسى بويىنشا وتەماقى تولەۋ كەستەسىنە سايكەس جۇزەگە اسىرىلادى», دەيدى ماماندار.
