وبلىس اكىمى ءوڭىردىڭ ەكونوميكالىق كورسەتكىشتەرىن ارتتىرۋ باعىتىندا اتقارىلاتىن باستامالاردى اتاپ ءوتىپ, الداعى مىندەتتەرگە توقتالدى.
– مەملەكەت باسشىسىنىڭ «جاڭا قازاقستان: جاڭارۋ مەن جاڭعىرۋ جولى» جولداۋىندا ايتىلعانداي, حالىقتىڭ ءال-اۋقاتىن كوتەرۋ – ءبىزدىڭ ستراتەگيالىق ماقساتىمىز. ايماقتىڭ تۇيتكىلدى ماسەلەلەرىنىڭ بىرقاتارىمەن تانىسپىن, ول الدا دا سارالانادى, – دەدى نۇرلىبەك ماشبەك ۇلى.
ينۆەستيتسيا تارتۋ, سالىق بازاسىن ۇلعايتۋ, ساياسي تۇراقتىلىقتى ساقتاۋ, جاڭا جۇمىس ورىندارىن قۇرۋدان بولەك ءاربىر تەڭگەنىڭ ءتيىمدى جۇمسالۋى, ونىڭ قايتارىمىنا باسا نازار اۋدارىلادى. اگرارلىق سالاداعى پروبلەمالار دا ەسكەرىلەدى. وسىعان ارنايى توقتالعان ءوڭىر باسشىسى مۇمكىندىگىنشە كۇرىش القاپتارىن قىسقارتپاۋعا تىرىسۋ قاجەتتىگىن اتاپ ءوتتى. ازىق-ت ۇلىك تاۋارلارىنا باعانى تۇراقتاندىرۋ ماسەلەسى دە كۇن تارتىبىنەن تۇسپەيدى.
وڭىردە بولاتىن وزگەرىستەر جايى الەۋمەتتىك-ەكونوميكالىق دامۋ جاعدايىنا ارنالعان كەڭەيتىلگەن جيىندا دا ءسوز بولدى. ورىنباسارلارىنىڭ سالالارداعى نەگىزگى باسىمدىققا يە باعىتتار بويىنشا اتقارىلعان جۇمىستار جايلى بايانداماسىنان كەيىن وبلىس اكىمى ءوڭىردىڭ نەگىزگى ماكروەكونوميكالىق دامۋ كورسەتكىشتەرىنىڭ باسىم كوپشىلىگى رەسپۋبليكالىق دەڭگەيدەگى ورتاشا كورسەتكىشتەن دە تومەن ەكەنىن ەسكەرتتى جانە ينۆەستيتسيالاردى تارتۋ جۇمىسىن تەز ارادا كۇشەيتۋدى تاپسىردى.
– بىزدە ءار سالانىڭ كورسەتكىشىن بىلتىرعى دەڭگەيمەن سالىستىرىپ, كوڭىل توعايتاتىن ءبىر ادەت بار. بۇل ءوزىمىزدى ءوزىمىز الداۋ. ناتيجەنى وزگە وڭىرلەرمەن سالىستىرۋىمىز كەرەك. سوندا عانا ءىس العا باسادى, – دەدى وبلىس باسشىسى.
جيىندا ءوندىرىستى, شاعىن جانە ورتا بيزنەستى دامىتۋ, ينۆەستيتسيا تارتۋ باعىتىندا اتقارىلعان جۇمىستار تالداندى. ايماق باسشىسى اۋىل شارۋاشىلىعىنداعى پروبلەمالار مەن جەر داۋى ماسەلەسىنە ارنايى توقتالدى. شارۋا قوجالىقتارىنا بولىنەتىن ينۆەستيتسيالىق سۋبسيدياعا سۇعاناقتاردىڭ قول سۇققانىن جانە بىرنەشە اۋىلدا دۇركىن-دۇركىن كوتەرىلىپ تۇرعان جەر داۋلارىن باقىلاۋعا الۋدى تاپسىردى. ءوڭىر باسشىسى وبلىس ورتالىعىنداعى 575 كوپقاباتتى ءۇيدىڭ باسقارۋدىڭ جاڭا فورماسىنا وتۋگە دايىندىعى ءتيىستى دەڭگەيدە جۇرگىزىلمەگەنىن ايتتى. ولاردى كوندومينيۋم نىسانى رەتىندە تىركەۋ جۇمىستارىن شيراتۋ قاجەت.
كەڭەيتىلگەن جيىندا ءبىلىم, دەنساۋلىق, جۇمىسپەن قامتۋ سالالارىنداعى وزەكتى ماسەلەلەر اشىق تالقىلاندى. نۇرلىبەك نالىباەۆ انا مەن بالا ءولىمىن ازايتۋ, جاڭا مەكتەپتەر سالۋ, ناقتى جۇمىس ورىندارىن قۇرۋ باعىتىندا كەشەندى تالداۋ جۇرگىزىپ, ۇسىنىستار دايارلاۋدى قاتاڭ تاپسىردى. جيىنعا قاتىسۋشىلارعا مەملەكەتتىك اپپاراتتى وڭتايلى جانە ءتيىمدى ەتۋ ماقساتىندا باعىتتاس سالالاردى بىرىكتىرۋگە بەل بايلاپ وتىرعانىن جەتكىزدى. ايماقتاعى 24 باسقارمانىڭ 8-ءى قىسقارىپ, وبلىس اكىمدىگىنىڭ قۇرىلىمىندا 16 باسقارما قالاتىن بولدى.
بۇدان بىلاي وبلىس اكىمىنىڭ شتاتتاعى جانە شتاتتان تىس كەڭەسشىسى لاۋازىمدارى دا بولمايدى. ء«بىزدىڭ كەڭەسشىمىز – حالىق!», دەدى ايماق باسشىسى.
قىزىلوردا وبلىسى
