شىعىس – ەلىمىزدە ءسۇت وندىرۋدەن كوش باستاپ وتىرعان ءوڭىر. كەيىنگى جىلدارى ءسۇت ءوندىرۋدىڭ يننوۆاتسيالىق تەحنولوگياسى ايماقتا كەڭىنەن ەنگىزىلە باستادى. وسىدان ەكى جىل بۇرىن گلۋبوكوە اۋدانىنىڭ بوبروۆكا اۋىلىندا ىسكە قوسىلعان روبوتتاندىرىلعان ءسۇت ساۋ اپپاراتى ەندى وزگە شارۋاشىلىقتارعا دا شەت ەمەس. جۋىردا بورودۋليحا اۋدانىنداعى «ە.زايتەنوۆ» شارۋا قوجالىعىنىڭ بازاسىندا تولىق اۆتوماتتاندىرىلعان مال شارۋاشىلىعى كەشەنىنىڭ اشىلۋىنا كۋا بولدىق.
بۇل شارۋا قوجالىعى سيىردى روبوت ارقىلى ساۋاتىن وسى وڭىردەگى ەكىنشى شارۋاشىلىق. ەلىمىزدە جاڭا تەحنولوگيانى ءبىرىنشى رەت ەنگىزگەن شىعىس قازاقستان وبلىسى يننوۆاتسيالىق ساۋ اپپاراتىنىڭ سانى جاعىنان دا كوش باستاۋدا.
اۆتوماتتاندىرىلعان كەشەن مال شارۋاشىلىعىنداعى كىرىستى ارتتىرۋعا ۇلكەن مۇمكىندىك بەرەدى. سايكەسىنشە, ونداعى شىعىن كولەمى ايتارلىقتاي ازايادى. ماسەلەن, روبوتتاردىڭ كومەگىمەن ءار سيىردان جىلىنا 4,5 مىڭنان 6,5 مىڭ ليترگە دەيىن ءسۇت الىنباق.
شارۋاشىلىق جەتەكشىسى ەرلان زايتەنوۆتىڭ ايتۋىنشا, اۆتوماتتاندىرىلعان فەرمادا 30 سيىر ساۋىلادى. الداعى ۋاقىتتا جەلىنى جەر سىزعان ءىرى قارا سانىن ارتتىرۋ كوزدەلىپ وتىر. ويتكەنى, اۆتوماتتاندىرىلعان كەشەندە ىسكە قوسىلعان ءتورت اپپاراتتىڭ قۋاتى 240 سيىردى ساۋعا ەركىن جەتەدى.
«Deleval» اتتى شۆەدتىك ناۆيگاتسيالى-جىلجىمالى تەحنولوگيانىڭ جۇمىس ىستەۋ بارىسىمەن تانىسا كەلە, فەرما قىزمەتىنىڭ زاماناۋي باعىتتا قۇرىلعانىن بايقادىق. بىرىنشىدەن, جابىق كەشەننىڭ ءىشى وتە كەڭ ءارى جارىق. ەكىنشىدەن, ءسۇتتى سيىرلارعا جەم-ءشوپ سۇرلەمى مولشەرىمەن ۋاقىتىندا بەرىلەدى. ۇشىنشىدەن, مالدىڭ استىنداعى قالدىقتار جىلجىمالى تەحنولوگيا بويىنشا سىرتقا شىعارىلىپ تۇرادى. ءتورتىنشىدەن, مالدىڭ قيى ارنايى سۇزگىدەن وتكەن سوڭ تىڭايتقىش رەتىندە ەگىستىك القاپتارىنا ءجونەلتىلەدى. بەسىنشىدەن, ءار ءىرى قاراعا چيپ تاعىلعان. ساۋ ۋاقىتى كەلگەندە چيپ ارقىلى كومپيۋتەرلىك ورتالىققا دابىل بەرىلىپ, جەلىنى سىزداعان سيىر اپپارات جانىنداعى قورشاۋعا كىرگىزىلەدى. التىنشىدان, جەلىنگە ساۋ اپپاراتى لازەرلى اۆتومات ارقىلى كيگىزىلەدى دە, ساۋ جۇمىسى باستالادى.
– مەملەكەت باسشىسى نۇرسۇلتان نازارباەۆ اۋىل شارۋاشىلىعى نىساندارىنىڭ زاماناۋي جاڭا تەحنولوگيالارمەن جابدىقتالۋى جونىندە ناقتى تاپسىرمالار جۇكتەگەن بولاتىن. بۇل اۋىل شارۋاشىلىعى ونىمدەرىن ارتتىرۋعا مۇمكىندىك بەرەدى. ەلىمىزدى ازىق-ت ۇلىكپەن وتاندىق كاسىپكەرلەردىڭ وزدەرى قامتاماسىز ەتۋىنە جول اشىلۋى ءتيىس. 300 ميلليون تەڭگەگە جۋىق قارجى جۇمسالعان اۆتوماتتاندىرىلعان كەشەن الداعى ۋاقىتتا بيۋدجەت قازىناسىن تولتىرۋعا دا ۇلەس قوسادى, – دەدى ءوڭىر باسشىسى بەردىبەك ساپارباەۆ.
شارۋا قوجالىعىنىڭ اۋدان ورتالىعىندا «تەمىرلان» اتتى ءوز دۇكەنى بار. دۇكەندە تۇرعىندار اۋىل شارۋاشىلىعى ونىمدەرىن كوڭىلگە قونىمدى باعامەن ساتىپ الادى. مىسالى, 30 پايىز مايلىلىقتاعى قايماقتىڭ جارتى كيلوسى – 270, 2,5 پايىزدىق پاستەرلەنگەن ءسۇتتىڭ ءليترى – 120, 82 پايىزدىق سارى مايدىڭ كيلوسى – 1000, سيىر ەتىنىڭ كيلوسى – 1000, بالدىڭ كيلوسى – 800, ءبىرىنشى سۇرىپتاعى نان 45 تەڭگەدەن تولىپ تۇر. سونداي-اق, «ە.زايتەنوۆ» شارۋا قوجالىعى 100 ميلليون تەڭگە كولەمىندەگى جەكە قارجىسى ەسەبىنەن سەمەي قالاسىندا الەۋمەتتىك جاعىنان از قامتىلعان وتباسىلارعا ارنالعان ازىق-ت ۇلىك دۇكەنى قۇرىلىسىن جۇرگىزبەك.
دۋمان اناش,
«ەگەمەن قازاقستان».
شىعىس قازاقستان وبلىسى,
بورودۋليحا اۋدانى.
