«بۇگىن ەلىمىزدىڭ پرەزيدەنتى, «Amanat» پارتياسىنىڭ توراعاسى قاسىم-جومارت توقاەۆقا پارتيانى جاڭعىرتۋ باعدارلاماسىن ىسكە اسىرۋ بويىنشا مالىمەت, اقپارات بەردىك. ەڭ الدىمەن «Amanat» پارتياسىنىڭ كەزەكتەن تىس سەزىندە بەرگەن تاپسىرمالارىنىڭ ورىندالۋى بويىنشا تولىق اقپارات جەتىكىزىلدى. اسىرەسە, وسى ءبىر ايدىڭ توڭىرەگىندە «Amanat» پارتياسىنىڭ ورتالىق اپپاراتى قازاقستاننىڭ ءتورت ايماعىنا شىعىپ, بەلسەندى پارتيا مۇشەلەرىمەن, باستاۋىش پارتيا ۇيىمدارىنىڭ وكىلدەرىمەن, زيالى قاۋىم وكىلدەرىمەن, جاستارمەن كەزدەستى. سول كەزدەسۋلەردە كوتەرىلگەن ماسەلەلەردى بۇگىن پارتيا توراعاسىنا جەتكىزدىك», دەدى اسحات ورالوۆ اقوردا ءباسپاسوز قىزمەتىنىڭ Telegram-ىندا جاريالانعان ۆيدەودا.
ونىڭ اتاپ وتۋىنشە, مەملەكەت باسشىسىنىڭ پارتيانىڭ كەزەكتەن تىس سەزىندە بەرگەن تاپسىرمالارىن ساپالى ورىنداۋ ماقساتىندا «Talqylau» سۇحبات الاڭى ىسكە قوسىلدى.
«كوپتەگەن ءىس-شارالارىمىز ەڭ الدىمەن ايماقتاردا وتەدى دەپ جوسپارلادىق. اسىرەسە, وبلىستارداعى, قالالارداعى, اۋداندارداعى فيليالدارىمىزدىڭ بەلسەندىلىگىن ارتتىرامىز دەپ كوزدەپ وتىرمىز. قوعامدىق كەڭەستەر بويىنشا دا جۇمىستار اتقارىلاتىن بولادى. ەڭ الدىمەن ولاردىڭ سانى 1700-دەن 1 مىڭعا قىسقارتىلدى. قىسقارتۋ تەك ورتالىق اپپاراتتا عانا ەمەس وبلىستاردا 12-دەن 8-گە, اۋدانداردا 9-دان 5-كە قىسقارادى. بۇل جەرگىلىكتى مەملەكەتتىك مەكەمەلەرمەن بىرلەسىپ, جۇمىستى ساپالى ورىنداۋ ماقساتىندا قابىلدانىپ جاتقان شەشىمدەر دەپ ويلاۋعا بولادى», دەدى پارتيانىڭ اتقارۋشى حاتشىسى.
ايتا كەتەيىك, مەملەكەت باسشىسى قاسىم-جومارت توقاەۆ «Amanat» پارتياسىنىڭ اتقارۋشى حاتشىسى اسحات ورالوۆتى قابىلداعان ەدى.
