پارلامەنتتە قىلمىستىق كودەكس جوباسى ماقۇلداندى

بۇگىن, 9 ءساۋىر كۇنى  پارلامەنت ماجىلىسىندە كەزەكتى جالپى وتىرىس بولدى. ونى ءماجىلىستىڭ جاڭا توراعاسى قابيبوللا جاقىپوۆ اشىپ, جۇرگىزىپ وتىردى. بۇل تۋرالى Egemen.kz ءتىلشىسى حابارلادى. كۇن ءتارتىبى بويىنشا سەگىز ماسەلە قارالدى. سونىڭ ەڭ ءبىرىنشىسى پرەزيدەنت اكىمشىلىگىنىڭ باسشىسى بولىپ تاعايىندالعان ن.نىعماتۋليننىڭ دەپۋتاتتىق وكىلەتتىگىن مەرزىمىنەن بۇرىن توقتاتۋعا ارنالدى. دەپۋتاتتار ءبىراۋىزدان ونىڭ دەپۋتاتتىعىن توقتاتۋ تۋرالى قاۋلىنى قولدادى. ودان كەيىن ءماجىلىس قورجىنىنا تۇسكەن بىرنەشە زاڭ جوباسى بويىنشا قورىتىندى ازىرلەۋ ماسەلەلەرى قاراستىرىلدى. بارلىق ۇسىنىلعان زاڭ جوبالارى بويىنشا قورىتىندى ازىرلەۋگە كەلىسىم بەرىلدى. سونىڭ ىشىندە «رۇقساتتار جانە حابارلامالار تۋرالى», كەيبىر زاڭنامالىق اكتىلەرگە ەكسترەميزم جانە تەرروريزمگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە تاعى باسقا زاڭ جوبالارى بار. سونىمەن بىرگە, قازاقستان رەسپۋبليكاسىنىڭ قىلمىستىق كودەكسىنىڭ جوباسى مەن كەيبىر زاڭنامالىق اكتىلەرگە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ جونىندەگى زاڭ جوبالارى ەكىنشى وقىلىمدا ماقۇلداندى. كۇن تارتىبىندەگى ماسەلەلەر قارالىپ بولعان سوڭ دەپۋتاتتاردىڭ ورتالىق اتقارۋ ورگاندارىنا باعىتتالعان دەپۋتاتتىق ساۋالدارى جاريالاندى. جاقسىباي سامرات. دەرەككوز: Egemen.kz. فوتو: Total.kz.