قوعامدىق كەلىسىمدى جانە ساياسي تۇراقتىلىقتى قامتاماسىز ەتۋ – قازاقستاننىڭ تاۋەلسىز مەملەكەت رەتىندەگى دامۋىنىڭ اسا ماڭىزدى شارتى بولىپ تابىلادى.
باتىر بابامىز باۋىرجان مومىش ۇلى ايتقانداي «تارتىپكە باعىنعان قۇل بولمايدى». ەلىمىزدە قوعامدىق تۇراقتىلىقتىق ساقتالۋى كەمەل بولاشاقتىڭ كەپىلى دەسەك, ارتىق ەمەس.
ولاي بولسا, وبلىسىمىزدا قوعامدىق تۇراقتىلىق پەن ءتارتىپتىڭ ساقتالۋىنا مەملەكەتتىك ورگاندار مەن قاتار ونىڭ ءاربىر تۇرعىنى ءوز ۇلەسىن قوسۋى قاجەت.
بۇقارالىق اقپارات قۇرالدارىنان كورىپ جۇرگەندەي كەيىنگى جىلدارى ەلىمىزدە جەكەلەگەن ازاماتتار مەن توپتاردىڭ زاڭسىز ميتينگى, شەرۋلەر وتكىزىپ, ناتيجەسىندە ءتيىستى جاۋاپقا تارتىلىپ جۇرگەنى بەلگىلى.
ەلىمىزدىڭ ىشكى تۇتاستىعىن بۇزىپ, ەل بىرلىگىن بۇلدىرگىسى كەلەتىن كۇشتەردىڭ سوزدەرىنە قۇلاق اسىپ, ايتاقتاۋىنا ىلەسەتىن جانداردا از ەمەس.
وسىنداي كەلەڭسىز جاعدايلارعا تاپ بولماۋ ءۇشىن تۇرعىندار وزدەرىنىڭ بەيبىت جينالىستار مەن ميتينگىلەر وتكىزۋ ءتارتىبىن جانە كونستيتۋتسيالىق قۇقىقتارى مەن قاتار زاڭمەن بەلگىلەنگەن مىندەتتەرىن ءبىلىپ جۇرگەنى ابزال.
قازاقستان رەسپۋبليكاسى كونستيتۋتسياسىنىڭ 32-بابىنا سايكەس, قازاقستان رەسپۋبليكاسىنىڭ ازاماتتارى بەيبىت ءارى قارۋسىز جينالۋعا, جينالىستار, ميتينگىلەر مەن دەمونستراتسيالار, شەرۋلەر وتكىزۋگە جانە توسقاۋىلدارعا تۇرۋعا حاقىلى. بۇل قۇقىقتى پايدالانۋ مەملەكەتتىك قاۋىپسىزدىك, قوعامدىق ءتارتىپ, دەنساۋلىق ساقتاۋ, باسقا ادامداردىڭ قۇقىقتارى مەن بوستاندىقتارىن قورعاۋ مۇددەلەرى ءۇشىن زاڭمەن شەكتەلۋى مۇمكىن.
قازاقستان رەسپۋبليكاسىنىڭ «قازاقستان رەسپۋبليكاسىندا بەيبىت جينالىستار, ميتينگىلەر, شەرۋلەر, پيكەتتەر جانە دەمونستراتسيالار ۇيىمداستىرۋ مەن وتكىزۋ ءتارتىبى تۋرالى» زاڭى 2, 3 جانە 4-باپتارىنىڭ تالاپتارىنا سايكەس, جينالىس, ميتينگ, شەرۋ, پيكەت نەمەسە دەمونستراتسيانى تەك جەرگىلىكتى اتقارۋشى ورگاننىڭ رۇقساتى نەگىزىندە وتكىزۋگە بولادى.
جينالىس, ميتينگ, شەرۋ, پيكەت نەمەسە دەمونستراتسيا وتكىزۋ تۋرالى ءوتىنىش ونى وتكىزۋدىڭ بەلگىلەنگەن داتاسىنان كەمىندە ون كۇن بۇرىن جازباشا نىساندا جەرگىلىكتى اتقارۋشى ورگانعا بەرىلەدى. وتىنىشتە شارانى وتكىزۋ ماقساتى, نىسانى, وتكىزىلەتىن جەرى نەمەسە قوزعالىس مارشرۋتتارى, ونىڭ باستالاتىن جانە اياقتالاتىن ۋاقىتى, قاتىسۋشىلاردىڭ ىقتيمال سانى, ۋاكىلدەردىڭ (ۇيىمداستىرۋشىلاردىڭ) جانە قوعامدىق ءتارتىپتىڭ ساقتالۋىنا جاۋاپتى ادامداردىڭ تەگى, اتى, اكەسىنىڭ اتى, ولاردىڭ تۇراتىن جانە جۇمىس ىستەيتىن جەرى, ءوتىنىشتىڭ بەرىلگەن داتاسى كورسەتىلەدى.
جەرگىلىكتى اتقارۋشى ورگانى ءوتىنىشتى قارايدى جانە وتىنىشتە كورسەتىلگەن شارانىڭ وتكىزىلەتىن ۋاقىتىنان كەمىندە بەس كۇن بۇرىن ۋاكىلدەرگە (ۇيىمداستىرۋشىلارعا) قابىلدانعان شەشىم تۋرالى حابارلايدى.
ەگەر ءوتىنىش بەرىلمەگەن بولسا نەمەسە تىيىم سالۋ تۋرالى شەشىم شىعارىلسا, سونداي-اق ازاماتتاردىڭ ءومىرى مەن دەنساۋلىعىنا قاۋىپ تونەتىن, قوعامدىق ءتارتىپ بۇزىلاتىن جاعدايدا جينالىستار, ميتينگىلەر, شەرۋلەر, پيكەتتەر مەن دەمونستراتسيالار جەرگىلىكتى اتقارۋشى ورگان وكىلىنىڭ تالاپ ەتۋى بويىنشا ءسوزسىز توقتاتىلۋعا ءتيىس. جەرگىلىكتى اتقارۋشى ورگان وكىلىنىڭ تالابىن ورىنداۋدان باس تارتىلعان جاعدايدا ونىڭ نۇسقاۋى بويىنشا ىشكى ىستەر ورگاندارى جينالىستى, ميتينگىنى, شەرۋدى, پيكەت قويۋدى جانە دەمونستراتسيانى توقتاتۋ جونىندە قاجەتتى شارالار قولدانادى.
سونىمەن بىرگە, جينالىستاردى, ميتينگىلەردi, پيكەتتەردi, شەرۋلەردi جانە دەمونستراتسيالاردى ۇيىمداستىرۋ نەمەسە وتكiزۋ ءتارتiبi تۋرالى قازاقستان رەسپۋبليكاسى زاڭدارىن بۇزعانى ءۇشىن «اكىمشىلىك قۇقىق بۇزۋشىلىق تۋرالى» كودەكستىڭ 373-بابىندا جانە ەگەردە بۇل ارەكەتتەر ازاماتتار مەن ۇيىمداردىڭ قۇقىقتارى مەن زاڭدى مۇددەلەرىنە ەلەۋلى زيان كەلگەن جاعدايدا قىلمىستىق كودەكستىڭ 334-بابىندا قىلمىستىق جاۋاپكەرشىلىك قاراستىرىلعان.
سوندىقتان, جينالىستار, ميتينگىلەر, شەرۋلەر, پيكەتتەر مەن دەمونستراتسيالار وتكىزگەن جاعدايدا اتالعان زاڭ تالاپتارىن قاتاڭ ساقتاۋ قاجەتتىگىن ەسكە سالامىن.
رۋسلان جاقسىلىقوۆ,
قىزىلوردا وبلىستىق پروكۋراتۋراسىنىڭ ءبولىم پروكۋرورى, 2 سىنىپتى زاڭگەر.
