ەرتەدەن بەلگىلى, وڭتۇستىك ءوڭىرىنىڭ پەرزەنتى كينو تۇسىرسە, تەرەڭ كادر تۇكپىرىندە كورىنەر-كورىنبەس جاڭعاق اعاشى ءوسىپ تۇرادى, ال كوركەم پروزاعا قالام تارتسا, كىتابىنان بىلىنەر-بىلىنبەس ءۇندى شايىنىڭ تاڭعاجايىپ ءيسى كەلەدى.
بۇل الاپ قۇدايدىڭ نازارى تۇسكەن, كوڭىلى اۋعان جەر, باق قونعان بەرەكەلى مەكەن, باقىتتى جۇرت ءومىر سۇرەتىن ايماق – قاشاندا مامىراجاي جاز قۇشاعىندا, قاشاندا ىستىق جالىنى بەت قارىعان قالىڭ پەشتىڭ ماڭى, شاقىرايعان كۇن استىندا.
شىم ەلىنىڭ بوساعاسى ءبىر بوسامايدى. ءتورى بوس جاتپايدى. تويى قىزىق-دۋمانعا ۇلاسقان ەر كوڭىلدى, ەر مىنەزدى جومارت حالىق, ءانى بيگە جالعاسقان مەرەكەلى جۇرت, قۇمىرسقا يلەۋىندەي قۇرىلىسى كوپ, ءۇيىلىپ-توگىلىپ جاتقان جۇمىسى كوپ, مەيماندوس, تۋىسشىل قازاق.
قازاقتىڭ بەينەتقورى. داستارقان مەن وت اراسىنان تاباق ۇزىلمەيدى. قالامى توسەلگەن قاس تالانت اڭگىمەلەرىن وقىساڭ, كوز الدىڭا وسىنداي سۋرەتتەر, ويىڭا وسىنداي ويلار كەلەدى.
ساكەن سىبانباي شىعارمالارىندا قىس جوق. پەيىشتىڭ سەگىز قاقپاسىنىڭ ءبىرى شىمكەنتتەن باستالاتىنداي. بۇل ءوڭىر يمان نۇرىنا تولى. اۋليە-انبيەلەر كوپتىگىنەن شىعار.
اۆتور وقىرمان نازارىنا ۇسىنعان ءار تۋىندىسىندا – جارقىراعان كۇن, جايما-شۋاق جاز مەزگىلى. كۇلكى كوپ. باقىتتى جۇرت قالىڭ.
قاز-قالپىندا قاعازعا تۇسىرىلگەن اۋىل ۋاقيعالارىندا شەك جوق. بىتپەيدى. ەستەلىك رەتىندە, ەرتەگى كۇيىندە. ومىردەي قىسقا, تىرشىلىكتەي ۇزىن.
شاي ۇستىندە شەجىرەلەر تۇگەندەلەدى. تاريحتار قايتالانادى. جالعان ءسوز اشكەرەلەنىپ, شىندىق تانىلادى.
فابۋلادان فينال, ستسەناريدەن كۇرمەۋ كورىنەدى. ادەبي ءتىلدى ەركىن مەڭگەرگەن اۆتور ەپيزودتاردى ورنالاستىرعاندا دا, سيۋجەت قۇرعاندا دا كۇڭگىرت ويلارعا جولامايدى. شىعارماسىنا ءار بەرۋ ماقساتىندا سويلەمدەرىن قولدان كۇردەلەندىرمەيدى.
كومپوزيتسيالىق قۇرىلىمى قانداي جەڭىل بولسا, سيۋجەتتىك جەلىسى دە سونداي قاراپايىم. كەيىپكەرلەرى, ءتىپتى تۋىس, جاقىندىعى بار.
فينال شەشىمىن شىتىرمان جەلىگە بايلاپ, قيىنداتۋعا قۇشتار ەمەس. سويلەمدەرىنە تەرەڭ ءمان-ماعىنا, كۇردەلى وي-پايىم جۇكتەمەيدى. قاجەتى قانشا... وبرازدارى كەسەك, ەستە قالاتىنداي, ۇمىتىلمايتىنداي كوزگە ىستىق كوركەم بەينەلەر.
اۆتور ءبىر تۋىندىسى ىشىندە بىرنەشە ۋاقيعانىڭ باسىن قۇراپ, شەبەر قيۋلاستىرا بىلەدى.
اۋىلدىڭ وبرازى انداعايلاپ كورىنەدى: ء«بىر شاۋگىم شاي».
قايران, جاز ءيسى! كىتاپ ساعىنىشىمىزدى وياتادى. بۇرق-سارق قايناپ جاتقان ساماۋىر شوعىنان, بۇرقىراعان شايدان, سامال لەبىنەن, اتقىلاعان قاسقا بۇلاقتان جاز ءيسى اڭقىپ, كوكىرەگىڭە تولادى, كوڭىلىڭدى شابىتتاندىرادى. جاز ءيسى.
شىعارما اتاۋلارى دا شىنايى: «كەرەمەت كۇن», ء«ومىر ءوتىپ بارادى», ء«ۇمىت ءۇيى». اۆتور جازعانىنا سەندىرەدى, كۇشى وسىندا.
ءتىلى جاتىق, شۇرايلى. ءمۇلت كەتپەيدى. وندىققا تيگىزىپ وتىرادى. بولاشاقتا اۆتوردان ءىرى شىعارمالار دا كۇتەمىز.
ديدار امانتاي
