قامدانعان قاپى قالمايدى

2016 جىلى ريو-دە-جانەيرودا وتەتىن وليمپيا ويىندارىنا وراي, قازاقستاندىق سپورتشىلاردىڭ دايىندىعىنا باسا نازار اۋدارۋ قاجەت. سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ توراعاسى تيمۋر ق ۇلىباەۆ جۇمىس كەڭەسىندە وسىنداي تاپسىرما بەردى. جينالىسقا كۇرەس, دزيۋدو, تاەك­­ۆوندو (WTF), اۋىر اتلەتيكا فە­دە­راتسيالارىنىڭ جەتەكشىلەرى مەن باپكەرلەر قۇرامى قاتىستى. «ءتورت جىلدا ءبىر رەت وتەتىن بايراقتى باسەكەگە نەبارى ەكى جىل عانا قالدى. سوندىقتان دا سىزدەر وتاندىق سپورتشىلاردى وليمپيادا ويىندارىنا مەيلىنشە مىقتاپ دايىنداۋلارىڭىز قاجەت», دەدى كونفەدەراتسيا توراعاسى. وتىرىس بارىسىندا كونفە­دەراتسيا قۇرامىنا كىرەتىن سپورت تۇرلەرى بويىنشا ۇلتتىق قۇرا­ما كوماندالارىنىڭ باس جاتتىق­­­تىرۋشىلارى ەسەپ بەرىپ, الداعى جوسپارلارىن ورتاعا سالدى. ال فەدەراتسيالار پرەزيدەنتتەرى بيىل قازاقستاندا وتەتىن كۇرەس تۇرلەرىنەن ازيا چەمپيوناتىن (23-27 ءساۋىر), اۋىر اتلەتيكادان ليتسەنزيالىق الەم چەمپيوناتىن (4-16 قاراشا), تاەكۆوندودان (WTF) بۇكىلالەمدىك گران-پري جارىسى (29-31 تامىز) جانە دزيۋدودان بولاتىن الەمدىك گران-پري ءتۋرنيرىن (قازان ايى) وتكىزۋدىڭ دايىندىق بارىسىن جەتكىزدى. سونداي-اق, جيىن بارىسىندا ۇلت­تىق قۇراما كوماندالاردى جاتتىعۋ جانە جارىس بارىسىندا كەشەندى-عىلىمي توپتاردىڭ ماماندارىمەن قامتاماسىز ەتۋ ماسەلەلەرى دە قارالدى. فەدەراتسيالارعا ايماقتاردا مامانداندىرىلعان مەكتەپ-ينتەرناتتار مەن كوللەدجدەردىڭ ماتەريالدىق بازالارىن نىعايتۋ, سول وقۋ وردالارىنداعى باپكەر-ۇستازدار قاۋىمىنىڭ بىلىكتىلىكتەرىن ارتتىرۋ ارقىلى بۇقارالىق جانە جوعارعى جەتىستىكتەر سپورتىن دامى­تۋعا باسا نازار اۋدارۋ تاپسىرىلدى. مۇنداي ءىس-شارالار دەنى ساۋ ۇرپاقتى قالىپتاستىرۋعا جانە ۇلتتىق قۇرامالارعا قاجەتتى كادرلىق رەزەرۆتى دايىنداۋعا سەپتىگىن تيگىزبەك. بۇل ءوز كەزەگىندە قازاقستاننىڭ الەمدىك سپورت ارەناسىندا بۇدان دا تابىستى ونەر كورسەتۋىنە مۇرىندىق بولارى ءسوزسىز. جىگەر ازبەرگەنوۆ.