بۇرىنعى كەڭەس وداعى قۇرامىندا بولعان مەملەكەتتەر اراسىندا رەسەي وزگەلەردەن كوشىلگەرى تۇر. الەم چەمپيوناتىندا ولار 60 جۇلدە الدى. ونىڭ 24-ءى التىن, 10-ى كۇمىس جانە 26-سى قولا مەدال. سول 11 جارىستىڭ بەسەۋىندە رەسەيلىكتەر جالپى ەسەپتە كوش باستاسا (2001, 2005, 2010, 2014, 2019), ءبىر مارتە ەكىنشى (2006) جانە ەكى رەت (2002, 2012) ءۇشىنشى ورىندى يەلەندى.
ەكىنشى ورىندا – قازاقستان قۇراماسى. ءبىزدىڭ قىزدار ءوز تاريحىندا 18 مارتە جەڭىس تۇعىرىنا كوتەرىلدى. انىقتاپ ايتساق, 5 التىن, 4 كۇمىس جانە 9 قولانى ولجالادى. العاشقى بولىپ قالىڭ جانكۇيەرلەرگە مەدالدىڭ سىڭعىرىن ەستىرتكەن نازگۇل بورانباەۆا. 46 كيلو سالماق دارەجەسىندە باق سىناعان ەلوردالىق قىز 2006 جىلى نيۋ-دەليدە قولا جۇلدەنى يەلەندى. جالپى, بۇل وتباسى جايىندا ۇزاق اڭگىمەلەۋگە بولادى. اكەسى سەرىك كيكبوكستان قازاقستاننىڭ ەڭبەك سىڭىرگەن جاتتىقتىرۋشىسى. بورانباەۆانىڭ وزىنەن بولەك, تۋعان ەكى اپكەسى دە سپورتتىڭ وسى تۇرىمەن شۇعىلدانىپ, حالىقارالىق ارەنالاردا ەلەۋلى تابىستارعا قول جەتكىزدى. نازگۇلدىڭ كۇيەۋى قانات ءابۋتالىپوۆتىڭ دە ەسىمى جانكۇيەرلەرگە جاقسى تانىس. ول – بوكستان قازاقستاننىڭ بىرنەشە دۇركىن چەمپيونى, ازيا بىرىنشىلىگىنىڭ جۇلدەگەرى, دۇنيەجۇزىلىك بوكس سەرياسى (WSB) دوداسىنىڭ جەڭىمپازى, بەيجىڭ مەن لوندون وليمپيادالارىنا قاتىسۋشى.
2008 جىلى نينبودا 70 كيلو سالماقتا ەلەنا كولتسوۆا قولاعا قول سوزسا, 2010 جىلى بريدجتاۋننان ەكى سپورتشىمىز ولجالى ورالدى. مارينا ۆولنوۆا (81 كيلو) ەكىنشى جانە نازگۇل بورانباەۆا (48 كيلو) ءۇشىنشى ورىندى ەنشىلەدى. 2012 جىلى تسينحۋانداودا دا ءدال سونداي ناتيجەگە قول جەتكىزدىك. جۇلدىز ماماتقۇلوۆا (+81 كيلو) كۇمىس جانە نازىم قىزايباي (48 كيلو) قولا مەدالدى مويىندارىنا ءىلدى.
2014 جىلى قوس قازاق قىزىنىڭ ايشىقتى ونەرىنە قۇلشىنا قول سوقتىق. چەدجۋدەگى جارىستا نازىم قىزايباي الدىنا جان سالماي, التىننان القا تاقتى. وسىلايشا, ونىڭ ەسىمى قازاقستاننان شىققان تۇڭعىش الەم چەمپيونى رەتىندە تاريحتا قالدى. 81 كيلو سالماقتا سىنعا تۇسكەن ءلاززات كۇنگەيباەۆانىڭ دا سونداي مۇمكىندىگى بولدى. الايدا ول اقتىق ايقاسقا دەيىن القىنباي جەتكەنىمەن, شەشۋشى تۇستا رەسەيلىك زەمفيرا ماگومەداليەۆاعا ەسە جىبەرىپ, كۇمىس مەدالدى قاناعات تۇتتى. وسى قوس جۇلدەنىڭ ارقاسىندا جەرلەستەرىمىز كوماندالىق ەسەپتە ءتورتىنشى ورىندى يەلەندى.
2016 جىلى تورتكۇل دۇنيەنىڭ مىقتىلارى استانادا باس قوستى. بۇل جارىستا 4 التىن جانە 2 قولا مەدالدى ولجالاعان قازاقستان قۇراماسى جالپى ەسەپتە كوش باستادى. اتاپ ايتساق, نازىم قىزايباي قاتارىنان ەكىنشى رەت الەم چەمپيونى اتاندى. ونىڭ جەڭىستى جولىن دينا جولامان (54 كيلو), ۆالەنتينا حالزوۆا (69 كيلو) جانە ءلاززات كۇنگەيباەۆا (+81 كيلو) جالعاستىردى. ال جاينا شەكەربەكوۆا (51 كيلو) مەن ايجان قوجابەكوۆا (57 كيلو) ۇزدىك ۇشتىكتى تۇيىندەدى.
ءوز جەرىمىزدەگى ايقىن جەڭىس ءبىزدىڭ قىزدارىمىزدى جىگەرلەندىرە تۇسەتىن شىعار دەپ ويلاعان ەدىك, بىراق قاتەلەسكەن ەكەنبىز. سوڭعى ەكى جارىستاعى ناتيجەمىز وسى ءسوزىمىزدىڭ ايقىن دالەلى. 2018 جىلى نيۋ-دەليدە جاينا شەكەربەكوۆا (51 كيلو) ەكىنشى, ال كارينا يبراگيموۆا (60 كيلو) ءۇشىنشى ساتىعا تابان تىرەدى. وسى كورسەتكىشپەن «توپ-10» كوماندانىڭ قاتارىنا ازەر ىلىكسەك, 2019 جىلى ۇلان-ۋدەدە تەك ميلانا سافرونوۆا (64 كيلو) مەن دينا يسلامبەكوۆانىڭ (+81 كيلو) جۇلدەگەرلەر ساناتىنا قوسىلۋعا كۇش-جىگەرلەرى جەتتى.
وليمپيا ويىندارىندا بۇرىنعى «باۋىرلاس» رەسپۋبليكالاردىڭ تەك ۇشەۋىنە عانا جۇلدە الۋ باقىتى بۇيىردى. ولار – رەسەي, قازاقستان جانە تاجىكستان. 2012 جىلى لوندوندا رەسەيدىڭ ەكى بوكسشىسى فينالعا شىعىپ, ەكەۋى دە ۇتىلدى. سوفيا وچيگاۆا (60 كيلو) يرلانديالىق كەتي تەيلوردان, نادەجدا تورلوپوۆا (75 كيلو) امەريكالىق كلارەسسي شيلدستەن جەڭىلدى. قازاقستاندىق مارينا ۆولنوۆا (75 كيلو) مەن تاجىكستاندىق ماۆزۋنا چوريەۆا (60 كيلو) ءۇشىنشى ساتىعا جايعاستى.
2016 جىلى ريو-دە-جانەيرودا الاۋى تۇتانعان وليمپيادادا 75 كيلو سالماقتا كۇش سىناسقان داريعا شاكىموۆا قولا مەدالدى موينىنا ىلسە, رەسەيلىك اناستاسيا بەلياكوۆا (60 كيلو) ءدال سول مەجەدەن كورىندى. 2021 جىلى توكيوداعى جارىستا پوستكەڭەستىك ەلدەر اراسىندا رەسەيدىڭ تۋى استىندا ونەر كورسەتكەن داعىستاندىق زەمفيرا ماگومەداليەۆا ءۇشىنشى ورىندى يەلەندى. ال وزگە كوماندالار تورتجىلدىقتىڭ باستى دوداسىنان قۇرالاقان قايتتى.
الەم چەمپيوناتتارىنىڭ ناتيجەسى
(1993-2019 جىلدار ارالىعى)
|
ورىن |
كوماندالار |
التىن |
كۇمىس |
قولا |
بارلىعى |
|
1. |
رەسەي |
24 |
10 |
26 |
60 |
|
2. |
قازاقستان |
5 |
4 |
9 |
18 |
|
3. |
ۋكراينا |
3 |
7 |
10 |
20 |
|
4. |
بەلارۋس |
1 |
1 |
2 |
4 |
|
5. |
ازەربايجان |
0 |
2 |
1 |
3 |
|
6-7. |
مولدوۆا, تاجىكستان |
0 |
0 |
1 |
1 |
وليمپيا ويىندارىنىڭ ناتيجەسى
(1996-2021 جىلدار ارالىعى)
|
ورىن |
كوماندالار |
التىن |
كۇمىس |
قولا |
بارلىعى |
|
1. |
رەسەي |
0 |
3 |
1 |
4 |
|
2. |
قازاقستان |
0 |
0 |
2 |
2 |
|
3. |
تاجىكستان |
0 |
0 |
1 |
1 |
