«مەملەكەت باسشىسى قاسىم-جومارت توقاەۆ ءوزىنىڭ سوڭعى جولداۋىندا پرەزيدەنتكە جاقىن ادامداردى كادرلىق ىرىكتەۋ ماسەلەسىن بولەك اتاپ ءوتتى. قاسىم-جومارت توقاەۆ ادامنىڭ جانە ازاماتتىڭ قۇقىقتارى مەن بوستاندىقتارىنىڭ كەپىلى بولىپ تابىلاتىنىن ەسكەرە وتىرىپ, مەملەكەت باسشىسىنىڭ جاقىن تۋىستارىنىڭ مەملەكەتتىك جانە كۆازيمەملەكەتتىك قۇرىلىمداردا باسشى لاۋازىمدارعا ورنالاسۋىنا كونستيتۋتسيالىق دەڭگەيدە تىيىم سالۋ جونىندە ۇسىنىس جاريالادى», دەدى مينستر ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.
وسى رەتتە ول زاڭناماعا سايكەس بىزدە جاقىن تۋىستارعا كىمدەر جاتقىزىلعانى جانە پرەزيدەنتتىڭ جاقىن تۋىستارى قانداي لاۋازىمداردى اتقارا المايتىنى تۋرالى ماسەلەلەرگە تولىعىراق توقتالدى.
«وسىلايشا زاڭنامادا جاقىن تۋىستارعا اتا-انالار, بالالار, اسىراپ الۋشىلار, اسىراپ الىنعاندار, اتا-اناسى ءبىر جانە اتا-اناسى بولەك اعا-ىنىلەرى مەن اپا-سىڭلىلەرى, اتاسى, اجەسى, نەمەرەلەرى جاتادى. سونىمەن قاتار سىبايلاس جەمقورلىققا قارسى ءىس-قيمىل تۋرالى زاڭناما دا جەكجاتتار, ياعني ەرلى-زايىپتىلاردىڭ جاقىن تۋىستارى ءۇشىن شەكتەۋلەر بەلگىلەيدى. ءوز كەزەگىندە پرەزيدەنت جارلىعىمەن ساياسي جانە اكىمشىلىك مەملەكەتتىك قىزمەتشىلەر لاۋازىمدارىنىڭ ءتىزىلىمى ايقىندالىپ, ولارعا مينيسترلەر, ولاردىڭ ورىنباسارلارى, اكىمدەر, مەملەكەتتىك ورگانداردىڭ باسشىلارى جانە باسقالار جاتقىزىلعان», دەپ اتاپ ءوتتى ق. مۋسين.
ونىڭ اتاپ وتۋىنشە, كۆازيمەملەكەتتىك سەكتورعا مەملەكەت قاتىسۋشى بولىپ تابىلاتىن ۇيىمدار جاتادى.
«وسىلايشا زاڭنامالىق دەڭگەيدە ءتيىستى تىيىمدار بەلگىلەنگەننەن كەيىن, مىسالى, پرەزيدەنتتىڭ اعاسى, اپكەسى, بالالارى «سامۇرىق-قازىنا» نەمەسە «بايتەرەك» سياقتى ۇلتتىق كومپانيالاردا باسشىلىق قىزمەتكە ورنالاسا المايدى», دەدى ول.
