وزبەكستاندا دۇنيەگە كەلگەن 27 جاستاعى راحمونوۆ اتالعان رەيتينگتە ەكىنشى ورىندا تۇر. ول ءوزىنىڭ توعىز قارسىلاسىن ءبىرىنشى راۋندتا ەسىنەن تاندىرسا, بەسەۋىن ەكىنشى كەزەڭدە ويسىراتا ۇتتى. تەك وسىدان ءتورت جىل بۇرىن استانادا وتكەن جارىستا وزبەكستاندىق فاريدۋن وديلوۆتىڭ عانا ءبىراز ۋاقىت بويى شاۆقاتتىڭ ەكپىندى شابۋىلىنا تويتارىس بەرۋگە شاماسى جەتتى. بىراق ءۇشىنشى راۋند بەل ورتاعا تاياعاندا قازاق سپورتشىسى ونى ۇرىپ جىقتى.
قازىرگى كەزدە قانداسىمىز ءوز سالماعى بويىنشا UFC-رەيتينگىندە 15-ورىندى يەلەنۋدە. ول وسى پروموۋشەندەگى ءۇش كەزدەسۋىندە دە قارسىلاستارىن باس كوتەرتپەي ۇتتى. بيىلعى جىلدىڭ ماۋسىم ايىندا جەرلەسىمىز ۇزدىكتەر تىزىمىندە 10-ساتىعا جايعاسقان امەريكالىق نيل مەگنيمەن ايقاسادى. اقش-تىڭ ءاپايتوسىن جەڭگەن جاعدايدا شاۆقات راحمونوۆتىڭ بەدەلى كۇرت ءوسىپ, رەيتينگتە دە بىرنەشە ساتىعا جوعارىلايتىنى انىق.
جوعارىدا اتالعان رەيتينگتە توم اسپينالل كوش باستاپ كەلەدى. 28 جاستاعى ۇلىبريتانيا وكىلىنىڭ وسى سپورت ءتۇرىن سەرىك ەتكەلى سەگىز جىلعا جۋىقتادى. سول ارالىقتا 14 مارتە وكتاگونعا شىعىپ, 12 باسەكەدە ونىڭ مەرەيى ۇستەم بولدى. توم UFC-دەگى بارلىق بەس كەزدەسۋىن مەرزىمىنەن بۇرىن اياقتادى. ول دجەيك كولە, الان بۋدو, اندرەي ورلوۆسكي, سەرگەي سپيۆاك جانە الەكساندر ۆولوۆ سىندى ساڭلاقتاردىڭ تاس-تالقانىن شىعاردى. الىپتاردىڭ رەيتينگىندە اسپينالل التىنشى ورىندى ەنشىلەۋدە.
ءۇشىنشى ورىندى وار وكىلى دريكۋس ديۋ پلەسسي (16-2-0) يەلەنسە, شوتلانديالىق پول كرەيگ (16-4-1) پەن يسپانيالىق حوەل الۆارەس (19-3-0) ءتورتىنشى جانە بەسىنشى ساتىلارعا تابان تىرەدى. بۇل جىگىتتەردىڭ بارلىعىنىڭ سپورتتىق كارەراسىندا جەڭىلىستەر بولعانىمەن, UFC جارىستارىندا ولار ەشكىمگە ەسە جىبەرگەن ەمەس.
