555 بەتتەن تۇراتىن قۇراندى 1977 جىلى عالىم-دارىگەر ەرمەنتاي ىسلام ۇلى سەمەيدەگى دوسىنا كەلگەن ساپارىندا تاپقان. بۇل قۇندى جادىگەردى 14 ءساۋىر كۇنى الماتى قالاسىنان ارنايى كەلىپ, اباي ەلىنىڭ تۋماسى, تەحنيكا عىلىمدارىنىڭ دوكتورى, حالىقارالىق ەكولوگيا جانە تىرشىلىك قاۋىپسىزدىگى اكادەمياسىنىڭ اكادەميگى باقداۋلەت قۇمار اباي مۋزەيىنە تاپسىردى.
ب.كاكىم ۇلىنىڭ ايتۋى بويىنشا ە.سلامنىڭ ماسكەۋدەگى ي.م.سەچەنوۆ اتىنداعى №1 مەديتسينالىق ينستيتۋتىنىڭ اسپيرانتۋراسىندا بىرگە وقىعان ورىنباسار بەيسەنبين دەگەن دوسى سول جىلدارى سەمەي مەديتسينالىق ينستيتۋتىنىڭ نەفرولوگيا بويىنشا كافەدرا مەڭگەرۋشىسى قىزمەتىن اتقارعان. اقشوقىدا وتكەن دوسىنىڭ ۇيلەنۋ تويىنا الماتى قالاسىنان كەلگەن ە.سلام قۇنانباي قاجىنىڭ قورىمى بارىن ەستىپ, قۇران وقىپ قايتۋعا زيرات باسىنا بارادى. جەرگىلىكتى كىرپىشتەن قالانعان قورىمدى اينالا ءجۇرىپ, ءۇش جاق قابىرعاسى قۇلاعانىن بايقايدى. قۇلاماعان سولتۇستىك جاق ۇزىن قابىرعانىڭ جوعارعى جاعىندا تاۋشالاي قالانعان قوبديشا ءتارىزدى تەسىكتىڭ اۋزىن كورگەن ەكەن. سول جەرگە قولىن سوزىپ كورىپ, ىشىنەن قالىڭ كىتاپتى بايقايدى. «سىرتقى بەتتەرى قاتتى, شەتتەرى دىمقىلداۋ سارعايعان قۇران كىتابىن كورىپ, قاتتى تولقىدىم», دەپ ءوز ەستەلىكتەرىمەن بولىسكەن ەكەن. اق ورامالعا وراپ الماتىعا الىپ كەتكەن بۇل قاسيەتتى كىتاپتى 45 جىلعا جۋىق ءوز جەكە ارحيۆىندە ساقتاعان.
2021 جىلى عالىمدار جينالعان تويدا باقداۋلەت كاكىم ۇلىمەن كەزدەسىپ, وسى سىرىمەن بولىسكەن. سول ساتتە ۇزاق جىلدار ساقتالعان قۇندى جادىگەردى امانات ەتىپ تاپسىرىپ, اباي ەلىنە قايتارۋىن وتىنگەن ەكەن.
قولىنا تۇسكەن كىتاپتى مۋزەيگە تاپسىرماس بۇرىن ب.قۇمار زەرتتەۋ جۇمىستارىن جۇرگىزىپ, قايدان, قاشان شىققانىن انىقتاپ الۋدى ءجون ساناپتى. وسى ورايدا قۇران عارىپتەرىن تەرەڭ زەرتتەپ شۇعىلدانعان ءال-فارابي اتىنداعى قازاق ۇلتتىق ۋنيۆەرسيتەتىنىڭ شىعىستانۋ فاكۋلتەتىنە قاراستى «جازبا جادىگەر رۋحاني مۇرا» عىلىمي-زەرتتەۋ ورتالىعىنىڭ ديرەكتورى, فيلولوگيا عىلىمدارىنىڭ كانديداتى, دوتسەنت زۋبايدا شادقام جانە «تاياۋ شىعىس جانە وڭتۇستىك ازيا» كافەدراسىنىڭ دوتسەنتى شىنار كاليەۆا ۇلكەن قولداۋ بىلدىرگەن. سونداي-اق زەرتتەۋ بارىسىندا كىتاپ ىشىندە بەت كولەمى كىشى باسقا قۇراننىڭ 14 بەتى دە بولعانى انىقتالعان.
عالىم 19 عاسىردا شىققان بۇل كىتاپتى اباي مۋزەيىنە تاريحشى-عالىمداردىڭ جانە باق وكىلدەرىنىڭ قاتىسۋىمەن تابىستاپ, مۋزەي اۋلاسىنا الماتى قالاسىنان ارنايى اكەلگەن اعاش كوشەتتەرىن وتىرعىزدى.
اتا-بابادان قالعان باي مۇرامىزدىڭ, حاكىم ابايدىڭ ءومىرى مەن شىعارماشىلىعىنا بايلانىستى قۇندى جادىگەرلەرىمىزدىڭ تاريحىنان سىر شەرتەتىن دۇنيەلەردى جيناقتاپ, بولاشاق ۇرپاققا ناسيحاتتاۋدا اباي مۋزەيىنىڭ اتقاراتىن ءرولى ەرەكشە. الداعى ۋاقىتتا دا اباي مۋزەيى تاراپىنان اۋقىمدى زەرتتەۋ جۇمىستارى جۇرگىزىلەتىن بولادى.
اراي تالعاتقىزى
اباي مۋزەيىنىڭ ءباسپاسوز قىزمەتى
