برازيليانىڭ شىعىسىندا ورنالاسقان ۆيتوريا قالاسىندا تۇراتىن فالكاولار اۋلەتى 17 پەرزەنتتى باعىپ-قاعىپ ءوسىردى. بىراق ولاردىڭ ومىرلەرى وڭاي بولعان جوق. جوقشىلىق پەن كەدەيشىلىكتىڭ ازابىن مولىنان تارتقان وتباسى مۇشەلەرىنىڭ بارلىعى دا كۇنكورىستىڭ قامى ءۇشىن قارا جۇمىسقا ەرتە جەگىلدى. وتاعاسى تۋرو مارەنو فالكاونىڭ ءوزى دە كەزىندە مىقتى بوكسشى بولعان كورىنەدى. بوس ۋاقىتىندا ول ۇلدارىن اۋلاعا جيناپ, ولارعا جۇدىرىقتاسۋ ونەرىنىڭ قىر-سىرىن ۇيرەتتى.
ەسكيۆا 1989 جىلدىڭ 12 جەلتوقسانىندا دۇنيەگە كەلدى. اۋەلى ول اۋەسقويلار اراسىندا ەلەۋلى تابىستارعا قول جەتكىزىپ, جەرگىلىكتى جانكۇيەرلەردىڭ كوزايىمىنا اينالدى. بوزبالا شاعىندا-اق ەلىنىڭ ءبىرىنشى ءنومىرلى بوكسشىسى اتانىپ, قۇرلىقتىق دەڭگەيدەگى دودالاردا دارالانا باستادى. 2011 جىلى فالكاو باكۋدە شىمىلدىعى تۇرىلگەن الەم چەمپيوناتىندا 75 كيلو سالماقتا سىنعا ءتۇسىپ, قولا مەدالدى موينىنا ءىلدى. باستاپقى باسەكەلەردە سەنەگالدىق مامادۋ فالل (25:9), اۋستراليالىق روب يانكوۆسكي (15:9), ۇلىبريتانيالىق ەنتوني وگوگو (17:12) جانە قازاقستاندىق دانابەك سۋجانوۆتى (13:0) سان سوقتىرعان ول جارتىلاي فينالدا جاپونيالىق ريوتا مۋراتادان (11:24) جەڭىلدى.
2012 جىلى برازيليانىڭ بەتكەۇستارى لوندوندا الاۋى تۇتانعان وليمپيا ويىندارىنا اتتاندى. تۇماندى البيون ەلىندە دە ول ءوزىن جاقسى قىرىنان كورسەتتى. العاشقى اينالىمداردا ازەربايجاندىق سۇلتان ميگيدينوۆ (24:11) پەن ماجارستاندىق زولتان حارچتى (14:10) جولىنان ىعىستىرسا, جارتىلاي فينالدا جەرگىلىكتى بوكسشى ەنتوني وگوگودان (19:9) ايلاسىن اسىردى. فينالدا ءوزىنىڭ سىرالعى قارسىلاسى ريوتا مۋراتامەن قايتا قولعاپ ءتۇيىستىردى. اسا شيەلەنىستى وتكەن باسەكەنىڭ تاعدىرىن ءبىر عانا ۇپاي شەشتى. ەسەپ – 13:14. سول جالعىز عانا ۇپاي فالكاونى عالامدىق دودانىڭ باس جۇلدەسىنەن ايىردى.
كەلەسى جىلى ەسكيۆا الماتىدا بوي كورسەتتى. الاتاۋ باۋرايىندا وتكەن الەم چەمپيوناتىندا برازيليالىق بوكسشى شابىسىنان جاڭىلدى. 1/8 فينالدا ول قازاققا جيەن بولىپ كەلەتىن رەسەيدىڭ تانىمال بىلعارى قولعاپ شەبەرى ارتەم چەبوتارەۆكە ەسە جىبەرىپ, ەلىنە ەڭسەسى ءتۇسىپ ورالدى. ال بۋكمەكەرلەر باستاپقىدا وسى جارىستىڭ باستى فاۆوريتتەرىنىڭ ءبىرى رەتىندە ءدال وسى فالكاونىڭ ەسىمىن اتاعان ەدى.
الماتىداعى ساتسىزدىكتەن كەيىن ول قوماقتى قارجى تابۋدى كوزدەپ, كاسىپقوي رينگتە كۇش سىناسۋعا بەل بۋدى. تۇساۋكەسەر كەزدەسۋىن 2015 جىلدىڭ 15 اقپانىندا امەريكالىق دجوشۋا روبەرتسونعا قارسى وتكىزىپ, ونى ءتورتىنشى راۋندتا ۇرىپ جىقتى. سول كەزدەن بەرى برازيليانىڭ بەتكەۇستارى 29 رەت شارشى الاڭعا كوتەرىلىپ, بارلىعىندا جەڭىسكە جەتتى. 20 قارسىلاسىن ەسىنەن تاندىردى. ەسكيۆا ءوز جەكپە-جەكتەرىنىڭ دەنىن اقش-تا وتكىزەدى. سونداي-اق ءۇش مارتە ءوز وتانىندا جۇدىرىقتاسىپ, تاعى ءبىر رەت ماكاودا ايقاستى.
ەسكيۆا فالكاو گەننادي گولوۆكيندى جەكپە-جەككە شاقىرعانى جايىندا ءبىز جوعارىدا ايتتىق. الايدا بۇل ۇسىنىس وتانداسىمىزدى قىزىقتىرا ما, الدە جوق پا, بۇل جاعى بىزگە بەيمالىم. ويتكەنى قازىرگى كەزدە GGG مەكسيكالىق ساۋل الۆارەسپەن ايقاسۋدى كوزدەيدى. راسىندا دا بۇل كۇندەرى قوس ساڭلاقتىڭ تريلوگياسىن جەر-جاھاننىڭ ميلليونداعان جانكۇيەرى تاعاتسىزدانا كۇتىپ وتىر. ءدال وسى جەكپە-جەكتە ورتا سالماقتاعى الەمنىڭ ەڭ مىقتى كاسىپقوي بوكسشىسى كىم ەكەنى انىقتالادى. جانە دە بۇل باسەكەنىڭ كوممەرتسيالىق تۇرعىدان دا بەرەرى كوپ. GGG مەن «كانەلو» اراسىنداعى كەزدەسۋدى ۇيىمداستىرۋ ارقىلى وسى ءىستىڭ باسى-قاسىندا جۇرگەن كوپتەگەن پىسىقاي ازاماتتىڭ بايلىققا بەلشەلەرىنەن باتاتىنى انىق. جەڭىسكە جەتكەن بوكسشى عانا ەمەس, ءتىپتى جەڭىلگەن سپورتشىنىڭ ءوزى دە قىرۋار قارجىنى قالتاعا باسادى.
دەسەك تە بۇل جەكپە-جەكتىڭ قاي كەزدە وتەتىنىن ءدال قازىر ەشكىم ءدوپ باسىپ ايتا المايدى. سەبەبى ازىرگە قوس تاراپ ورتاق مامىلەگە كەلەتىن ەمەس. شاماسى, ولار «سول جارىستان تۇسەتىن اقشانى قالاي بولىسەمىز؟» دەگەن ماسەلەنىڭ باسىن شەشە الماي جاتقان كورىندى. ەگەر جوعارىداعى اڭگىمە تاعى دا ۇزاققا سوزىلاتىن بولسا, وندا الداعى ۋاقىتتا گەننادي گولوۆكيننىڭ ەسكيۆا فالكاومەن جۇدىرىقتاسۋى دا ابدەن مۇمكىن.
تاعى ءبىر ايتا كەتەرلىك دەرەك, ەسكيۆانىڭ تۋعان اعاسى ياماگۋچي فالكاو دا تالاي بيىك بەلەستى باعىندىرعان بەلدى بوكسشىلاردىڭ ءبىرى. كەزىندە ول 81 كيلو سالماق دارەجەسىندە كۇش سىناسىپ, برازيليادا ەشكىمدى بەت قاراتقان جوق. لوندون وليمپياداسىنىڭ قولا جانە پانامەريكا ويىندارىنىڭ كۇمىس جۇلدەگەرى اتاندى. كاسىپقويلار اراسىندا 19 جەكپە-جەك وتكىزگەن ياماگۋچي تەك ءبىر رەت ۇتىلدى. 16 مارتە جەڭىسكە جەتىپ, ءبىر رەت تەڭ ءتۇستى. ال تاعى ءبىر باسەكەنىڭ ناتيجەسى ەسەپكە الىنبادى.
