«تۇركىستانعا اعىن سۋ جەتكىزۋ جولدارى تابىلىپ, ماڭىزدى جوبالار جۇزەگە اسىپ جاتىر. ەسكەك ەسۋ كانالى سۋ سپورتىن دامىتۋعا تىڭ سەرپىن بەرەدى. وڭىردە ەسكەك ەسۋ سپورتىنان مىقتى كوماندا بار. قازاقتىڭ جاستارى تۇركىستاندا شەبەرلىكتەرىن شىڭداپ, حالىقارالىق دودالارعا قاتىساتىن بولادى. بۇل جوباعا رەسپۋبليكالىق دەڭگەيدە كوڭىل ءبولىنىپ وتىر. سوندىقتان ساپالى ءارى زامان تالابىنا ساي بولۋى ءتيىس», دەدى ومىرزاق شوكەەۆ.
100 گەكتارداي اۋماقتى الىپ جاتقان بازادا ەسكەك ەسۋ, اكادەميالىق ەسۋ جانە وزگە دە سپورت تۇرلەرى قانات جايادى. سونىمەن بىرگە بۇل نىسان تۋريستەردى تارتاتىن ورتالىققا دا اينالماق. كاسىبي سپورتپەن قاتار كانالدا قايىقپەن سەرۋەندەپ, دەمالىس وتكىزۋگە بولادى. «كەڭساي-قوسقورعان» سۋ قويماسىنان سۋ كەلىپ, جوبا جۇزەگە اسادى. ال ەسكەك ەسۋ بازاسىنداعى سۋ تۇركىستان قالاسىنىڭ كليماتىن وزگەرتۋ, جاسىل القاپتى كوبەيتۋگە دە قولدانىلادى.
تۇركىستانىڭ جازى وتە ىستىق كەلەدى. بۇل — جاعاجاي ءتۋريزمىن دامىتۋعا مۇمكىندىك بەرەدى. بۇرىن قالا اۋماعىندا بىرنەشە باسسەيننەن باسقا شومىلاتىن جەر تاپشى بولاتىن. ەندى شاھار جاڭا جاساندى كولمەن جانە جاعاجايمەن قامتىلادى. قالادا «تۇركىستان» تۋريستىك-رەكرەاتسيالىق ورتالىعىنىڭ قۇرىلىسى جالعاسىپ جاتىر. جاساندى كولدىڭ دامبالارى ورنالاستىرىلىپ, بەتون قۇيۋ جۇمىسى اياقتالعان. تۋريستىك ورتالىق ماڭى اباتتاندىرىلىپ, اعاشتار ەگىلەدى. جاعاجايعا قۇم توسەلىپ, دەمالىسقا ارنالعان نىساندار سالىنادى. وبلىس اكىمى مەردىگەرلەر مەن جاۋاپتى باسشىلارعا قۇرىلىستى ساپالى ءارى ۋاقىتىلى تاپسىرۋدى جۇكتەدى.
