قالالىق پوليتسيا دەپارتامەنتىنىڭ حابارلاۋىنشا, كوشەدەگى جانە قايتالاناتىن قىلمىس تا باسەڭدەگەن. بارلىق كىسى ءولتىرۋ, قاراقشىلىق, ادام ولىمىمەن اياقتالعان اۋىر دەنە جاراقاتتارى, اۆتوكولىك ۇرلىعى اشىلدى. ەسىرتكىنى جارنامالاۋ, وتكىزۋ جانە ەلوردا ارقىلى تاسىمالداۋ فاكتىلەرىن انىقتاۋعا باسا نازار اۋدارىلعان.
«سينتەتيكالىق ەسىرتكى تۇرلەرىمەن بايلانىستى 38 قىلمىس انىقتالدى, 26 كيلوگرامنان استام سينتەتيكا تاركىلەندى, 3 ەسىرتكى زەرتحاناسى قىزمەتىنىڭ جولى كەسىلدى جانە 49 ەسىرتكى سايتتارى بۇعاتتالدى. بارلىعى 176 ەسىرتكى قىلمىسى انىقتالدى», دەپ اتاپ ءوتتى ۆەدومستۆو باسشىسى مارات تولەباەۆ.
ول پوليتسيا قىزمەتىنىڭ اشىقتىعى مەن ايقىندىعىن قامتاماسىز ەتۋ, سەرۆيستىك مودەلگە كوشۋ جايىن اڭگىمەلەدى. الماتى جانە سارىارقا اۋداندارىندا «پوليتسيانىڭ قازاقستاندىق سەرۆيستىك مودەلى» پيلوتتىق جوبالارى ىسكە اسۋدا. پيلوتتىق جوبالار ىسكە قوسىلعالى بەرى ۋچاسكەلىك ينسپەكتورلاردى تانۋ دەڭگەيى 3 ەسەگە جۋىق وسكەن.
«جۇرتقا جاقىن پوليتسەي» قاعيداتى جۇمىسقا ەنگىزىلۋدە, بۇل قوعامدىق ورىنداردا قىزمەتكەرلەردىڭ تۇراقتى تۇردە بولۋىن قامتاماسىز ەتەدى. وتكەن جىلى قالا بويىنشا مودۋلدىك تيپتەگى 10 ستاتسيونارلىق پوليتسيا بەكەتى ورناتىلعان. ادامدار كوپ جينالاتىن جەرلەردە دابىل سيگنالىن بەرۋ جانە پوليتسيانى شۇعىل شاقىرۋ ءۇشىن 13 «SOS» باتىرماسى ورناتىلعان.
«حالىقارالىق تاجىريبەنى ەسكەرە وتىرىپ, ەلوردادا جول قاۋىپسىزدىگى جونىندەگى كەشەندى جوسپار ىسكە اسۋدا. قالا جولدارىندا قوسىمشا باعدارشامدار, جوبالانعان جاياۋ جۇرگىنشىلەر وتكەلى سالىندى, جارىقتاندىرىلدى, قوزعالىس باعىتىن ۇيلەستىرەتىن جول بەلگىلەرى ورناتىلدى. ناتيجەسىندە جولدارداعى ءولىم دەڭگەيى تومەندەدى», دەدى م. تولەباەۆ.
