كەشەلى بەرى الەۋمەتتىك جەلىلەر مەن بۇقارالىق اقپارات قۇرالدارىندا جاڭادان قۇرىلاتىن اباي وبلىسىنىڭ ورتالىعىنا اينالاتىن سەمەيدەگى گەودەزيا جانە كارتوگرافيا كوللەدجىنىڭ عيماراتى قۇقىق قورعاۋ ورگاندارىنا بەرىلەتىندىگى جايلى حابار تارادى. شقو ءبىلىم باسقارماسى بۇعان قاتىستى رەسمي مالىمدەمە جاسادى.
ء«وڭىردىڭ اباي جانە شىعىس قازاقستان وبلىستارى بولىپ ەكىگە بولىنۋىنە بايلانىستى ءبىلىم باسقارماسى تەحنيكالىق جانە كاسىپتىك ءبىلىم بەرۋ جۇيەسىن ودان ءارى جاڭعىرتۋ ماقساتىندا ۆەدومستۆولىق باعىنىستى مەكەمەلەرگە تالداۋ جاساپ جاتىر. وسى جۇمىس اياسىندا سەمەي قالاسىنداعى كوللەدج عيماراتتارىنىڭ ماتەريالدىق-تەحنيكالىق بازاسىنا مونيتورينگ جۇرگىزىلىپ جاتىر. بۇگىنگى تاڭدا كوللەدجدەردى جابۋ, عيماراتتاردى الىپ قويۋ ماسەلەسى تالقىلانىپ جاتقان جوق», دەلىنگەن اقپاراتتا.
ۆەدومستۆو دەرەگىنشە, سەمەيدەگى تجكب جۇيەسىندەگى ءبىلىم وردالارى دايىنداپ جاتقان ماماندىقتار وبلىستىڭ دا, رەسپۋبليكانىڭ دا ەڭبەك نارىعىندا سۇرانىسقا يە.
«كوللەدجدەردىڭ ءوز سالالارىندا الدىڭعى قاتارداعى مامانداردى دايارلاۋدا كوپ جىلدىق تاجىريبەسى بار. بۇل كوللەدجدەردىڭ تۇلەكتەرى وبلىستاعى جانە رەسپۋبليكاداعى كاسىپورىندارعا جۇمىسقا ورنالاسادى. سەمەيدەگى بارلىق كوللەدج ستۋدەنتتەرى ادەتتەگىدەي وقۋىن جالعاستىرىپ, وقىعان ماماندىعى بويىنشا وقۋ ورنىن بىتىرگەنى تۋرالى ديپلوم الادى. مۇعالىمدەردىڭ, ستۋدەنتتەردىڭ جانە ولاردىڭ اتا-انالارىنىڭ بۇل تۋرالى الاڭداۋىنا ەش نەگىز جوق. ماسەلە باقىلاۋدا», دەلىنگەن حابارلامادا.
