شەكەمتاس ءوندىرۋ تسەحىندا بۇرىن 8 كۇيدىرۋ ماشيناسى بار بولسا, ەندى ولاردىڭ سانى 10-عا جەتىپ وتىر. جاڭعىرتۋ جۇمىستارى قوس جابدىقتىڭ جۇمىس قۋاتىن قالپىنا كەلتىرىپ, ونىمدىلىگىن ارتتىرىپتى. اتقارىلعان جۇمىس كولەمى اۋقىمدى. قالپىنا كەلتىرۋ باعدارلاماسى №9 جانە №10 كۇيدىرۋ ماشينالارىن عانا ەمەس, سونىمەن قاتار ىسكە قوسىلعان كۇيدىرۋ, كۇيدىرۋ-سۇرىپتاۋ تەحنولوگيالىق ۋچاسكەلەرىن دە قامتىپتى. جالپى, جوندەۋ جۇمىستارى قۇرىلىس, مەحانيكالىق جانە ەلەكتر باعىتتارىندا جۇرگەن.
– جابدىقتىڭ تەحنيكالىق جاي-كۇيى ونىمدىلىككە تىكەلەي اسەر ەتەدى. جوندەلگەن كۇيدىرۋ ماشينالارى ساعاتىنا شامامەن 93 توننا كۇيدىرىلگەن شەكەمتاس وندىرەتىن بولدى. كونسەرۆاتسيادان بۇرىن اتالعان كورسەتكىش 84 توننادان اسپايتىن. جابدىقتى جوندەۋ نەگىزگى تەحنولوگيالىق جانە قوسالقى جابدىقتاردا قاتار جۇرگىزىلدى. جاڭا ەلەكتر قوزعالتقىشتارى, ءورت سوندىرگىشتەر مەن تارتقىش قوندىرعىلاردىڭ جەتەكتەرىن ىسكە قوسۋ جانە باسقارۋ جۇيەلەرى ورناتىلعان. جوعارى ۆولتتى جەلى تولىعىمەن اۋىستىرىلدى. قازىر ماشينانىڭ ونىمىدىلىگى جوعارى, شىعىنى تومەن. جاقسى جۇمىس ىستەپ تۇر, – دەيدى ونەركاسىپ كەشەنى تەحنيكالىق ءبولىمىنىڭ جىلۋ-تەحنيكا ينجەنەرى ماكسيم كارەۆ.
قايتا قۇرۋ وندىرىستىك الاڭداردىڭ جارىقتاندىرۋ جۇيەسىنە دە اسەر ەتىپتى. قىزمەتكەرلەر جۇرەتىن جولدارعا قۋات ۇنەمدەيتىن شامدار ورناتىلعان. كەڭىستىك نەعۇرلىم جارىق بولسا, سوعۇرلىم قاۋىپسىز جانە قىزمەتكەرلەردىڭ دەنساۋلىعىنا زيان كەلتىرمەيدى. جاڭعىرتۋ جولىنداعى تاعى ءبىر قادام – كۇيدىرۋ ماشيناسىنىڭ جۇمىسى كەزىندە ادامي فاكتوردى ازايتاتىن تەحنولوگيالىق پروتسەستى باسقارۋدىڭ اۆتوماتتاندىرىلعان جۇيەسىن ەنگىزۋ. بارلىق پروتسەسس پارامەترلەرى بار كۇيدىرۋ ماشيناسىنىڭ «جاندى مودەلى» وپەراتور بولمەسىندە ورناتىلعان كومپيۋتەر مونيتورىندا ۇسىنىلعان. جۇيە بىرلەستىكتىڭ وندىرىستىك جاعدايلارىنا بەيىمدەلگەن جانە كۇيدىرۋ ماشيناسى جابدىقتارىنىڭ بارلىق كەشەنىنىڭ جۇمىسىن تۇراقتاندىرۋعا باعىتتالعان.
– باسقارۋ ءپۋلتىنىڭ وپەراتورلارى تاۋلىك بويى جۇمىس ىستەيدى. ولاردىڭ باستى مىندەتى – باقىلاۋ-ولشەۋ اسپاپتارىنىڭ كومەگىمەن تەمىر كەنى شەكەمتاستارىن كۇيدىرۋ. تەحنولوگيالىق پروتسەستەگى نەگىزگى پارامەترلەردەن اۋىتقۋ كەزىندە وپەراتور ولاردى جويۋ ءۇشىن جەدەل شارالار قابىلدايدى. تۇتىنۋشىلاردىڭ تالاپتارىن قاناعاتتاندىراتىن ساپالى شەكەمتاس شىعارۋ – سوكولوۆ-سارىباي تاۋ-كەن بايىتۋ وندىرىستىك بىرلەستىگىندەگى شەكەمتاس ءوندىرۋ تسەحىنىڭ نەگىزگى مىندەتى. كۇيدىرۋ ماشينالارىن كۇردەلى جوندەۋ ونىمدەرىمىزدىڭ باسەكەگە قابىلەتتىلىگىن ارتتىرۋعا سەپ بولادى. سوندىقتان كاسىپورىن شىعارىلاتىن ءونىمنىڭ وزىندىك قۇنىن تومەندەتۋگە, نەگىزگى تەحنولوگيالىق جابدىقتىڭ ونىمدىلىگىن ارتتىرۋعا جانە ەڭبەك جاعدايلارىن جاقسارتۋعا باعىتتالعان جوبالارعا تۇراقتى ينۆەستيتسيا قۇيىپ كەلەدى, – دەيدى ماكسيم كارەۆ.
