«قالا بويىنشا ءبىزدىڭ باسقارماعا باعىنىستى 17 سپورت مەكەمەسى جۇمىس ىستەيدى. ونىڭ ىشىندە 11-ءى - بالالار مەن جاسوسپىرىمدەرگە ارنالعان سپورت مەكتەپتەرى. سونىمەن قاتار وليمپيادالىق جانە وليمپيادالىق ەمەس سپورت تۇرلەرى بويىنشا سپورت ديرەكتسيالارى, وليمپيادا رەزەرۆىن دايارلاۋ ورتالىعى, «داۋلەت» سپورت كەشەنى جانە باسقالار بار», دەدى الماس اباەۆ قالالىق ءماسليحاتتىڭ تۇراقتى كوميسسياسىنىڭ وتىرىسىندا.
ونىڭ ايتۋىنشا, بۇگىنگى كۇنى ەلوردادا 13 041 سپورتشى بار.
«بيىل 1 قاڭتارداعى بەكىتىلگەن بيۋدجەتكە سايكەس سپورتتى دامىتۋعا 11,3 ملرد تەڭگە قارالعان. ونىڭ ىشىندە مەملەكەتتىك سپورت تاپسىرىسىنا - 1,3 ملرد تەڭگە. قالعان سوما باسقارماعا باعىنىستى مەكەمەلەرگە تارالعان. وسى ورايدا سپورتتى ساپالى ءارى كاسىبي تۇردە دامىتا ءتۇسۋ ءۇشىن قوسىمشا قارجى ءبولۋدى سۇرايمىز. اتاپ ايتقاندا قالالىق, رەسپۋبليكالىق, حالىقارالىق سپورت جارىستارىنا قاتىسۋ ءۇشىن جانە سپورتشىلاردىڭ دايىندىق بازاسىن جەتىلدىرە ءتۇسۋ ءۇشىن قوسىمشا قاراجات كەرەك. ونىمەن قوسا سپورتشىلاردىڭ جاتتىعۋ زالدارىن ءتيىستى قۇرال-جابدىقپەن قامتۋ ماسەلەسى كۇن تارتىبىندە تۇر. وسىعان وراي بيۋدجەتتەن قوسىمشا 15,9 ملرد تەڭگە ءبولۋدى سۇرايمىز», دەدى الماس اباەۆ.
ايانا توعانبەك
