ينفوگرافيكانى جاساعان امانگەلدى قياس, «ەQ»
پرەزيدەنت توقاەۆ قاڭتارداعى وقيعالار بەلگىلى ءبىر دارەجەدە ساياسي جانە ەكونوميكالىق قىزمەتتىڭ ىشكى توقىراۋى مەن مونوپوليالانۋدىڭ سالدارى ەكەنىن دە مويىندادى. حالىققا جولداۋىندا: «توڭكەرىس جاساۋعا ۇمتىلعانداردىڭ اراسىندا بەلگىلى ادامدار بولدى. جوعارى لاۋازىم يەلەرى مەملەكەتكە ساتقىندىق جاسادى», دەگەن ول ەلدە باستالعان رەفورمالار وزدەرىنىڭ زاڭسىز ارەكەتتەرىن جالعاستىرۋعا تىرىسقان ىقپالدى ادامداردىڭ نارازىلىعىن تۋدىرعانىن اتاپ ءوتتى.
قاسىم-جومارت توقاەۆ قازاقستاننىڭ ساياسي جۇيەسىنىڭ كەمشىلىكتەرى تۋرالى اشىق ايتۋدى جالعاستىرا كەلىپ, قوعامنىڭ ەلدەگى تۇبەگەيلى وزگەرىستەر تۋرالى تالابىن قولدايتىنىن ءبىلدىردى. اتاپ ايتقاندا, ول پرەزيدەنتتىڭ قولىندا بيلىكتىڭ شامادان تىس شوعىرلانۋىنا نەگىزدەلگەن باسقارۋ جۇيەسىن اتاپ ءوتىپ, مۇنى «تۇبەگەيلى دۇرىس ەمەس» دەدى. جاعدايدى تۇزەتۋ ءۇشىن ول پارلامەنتتىڭ ءرولىن كۇشەيتۋگە, اتقارۋشى بيلىكتى بيلەۋشى پارتيادان بولۋگە, سايلاۋ جۇيەسىندەگى وزگەرىستەرمەن قاتار ساياسي پارتيالار قۇرۋ پروتسەسىن ودان ءارى جەڭىلدەتۋگە جانە ەڭ باستىسى, ازاماتتار تىكەلەي جۇگىنە الاتىن كونستيتۋتسيالىق سوت قۇرۋعا شاقىردى. بۇل قادامدار جۇزەگە اسقان جاعدايدا قازاقستاندى دەموكراتيالىق باعىتقا اينالدىرۋعا مۇمكىندىك بەرەدى. بىراق پرەزيدەنت اتاپ كورسەتكەن بۇل تالاپ-مىندەتتەر ناقتى ىسكە اسىرىلعاندا عانا ناقتى ناتيجەلەرگە قول جەتكىزۋگە بولادى. بۇل مىندەتتەر مەملەكەتتىك قىزمەتشىلەردىڭ مەنتاليتەتىندەگى وزگەرىستەرمەن بىرگە جۇرسە, ونى ەلدىڭ جوعارى باسشىلىعى قامتاماسىز ەتۋى كەرەك. پرەزيدەنت جاريالاعان جوعارى باسشىلىقتىڭ وتباسىلارىن ەكونوميكالىق قىزمەتتەن ءبولۋ جونىندەگى قادامداردى قازاقستاندىق قوعام وڭ قابىلدادى. سونداي-اق بيلىكتىڭ شوعىرلانۋى جوعارى لاۋازىمدى ادامداردىڭ وتباسى مۇشەلەرىنىڭ, سونداي-اق وليگارحيالىق توپتاردىڭ ىقپالىن كۇشەيتتى دەپ تانۋ دا جۇرتشىلىقتىڭ وي-پىكىرىن ءدوپ باسقانى انىق. بولاشاقتا پرەزيدەنت توقاەۆ سىبايلاس جەمقورلىققا قارسى كۇرەستىڭ ناقتى تەتىكتەرىن جوعارى دەڭگەيدە ۇستانۋى كەرەك. بۇل جونىندە ول ءوزى دە ناقتى قادامدارىن ايقىنداپ كورسەتىپ بەرگەن بولاتىن.
سۆانتە كورنەلل,
ورتالىق ازيا جانە كاۆكاز ينستيتۋتىنىڭ زەرتتەۋ جونىندەگى ديرەكتورى (شۆەتسيا)
