تۇتىنۋشىلىق پاتريوتيزم – وتاندىق ءونىمدى تۇتىنۋ ارقىلى ىشكى نارىقتى قولداۋ. ياعني تىعىرىققا تىرەلگەن ەكونوميكاعا تىرەك بولۋ, دەمەۋ. مۇنى ەكونوميكانىڭ جازىلماعان زاڭى, قاعازعا تۇسپەگەن قاعيداسى دەسە دە بولادى. البەتتە, ول اركىمنىڭ سانا-سەزىمىنە بايلانىستى جانە مۇنداي پاتريوتيزم كوپ جاعدايدا حالىق كۇندەلىكتى تۇتىناتىن ازىق-ت ۇلىككە قاتىستى قولدانىلادى.
ايتالىق, دۇكەندە تۇتىنۋشىعا كەرەك تاۋاردىڭ ەكى ءتۇرى قاتار تۇر. ءبىرى – جارناماسى جەر جارعان شەتەلدىك برەند, ەكىنشىسى – اتى الىسقا تاراماعان وتاندىق ءونىم. العاشقىسىن تاڭداسا شەتەلدىڭ, ەكىنشىسىن تاڭداسا ءوز ەلىنىڭ ەكونوميكاسىنا ۇلەس قوسادى. تاڭداۋ تۇتىنۋشىنىڭ ءوز ەركىندە. وعان ەشكىم «مىنانى ال» دەپ ماجبۇرلەي المايدى. ءبارىن اركىمنىڭ ىشكى تۇيسىگى, سانا-سەزىمى شەشەدى. تولەگەن اقشام سىرتقا كەتپەي, ءوز ەلىمىزدە قالسىن, وتاندىق وندىرۋشىلەرگە ءتۇسسىن, ەلدىڭ ەكونوميكاسىنا جۇمىس ىستەسىن دەگەندەر وتاندىق ءونىمدى تاڭداۋى مۇمكىن. مىنە, تۇتىنۋشىلىق پاتريوتيزم دەگەن – سول.
ەۋروپا ەلدەرىنىڭ كوبى ءدال وسى تۇتىنۋشىلىق پاتريوتيزم ارقىلى ىشكى نارىقتى, وتاندىق ءوندىرىستى, جالپى ەكونوميكانى العا باستىرىپ وتىر. الايدا الەمنىڭ وسىناۋ وزىق تاجىريبەسى ءبىزدىڭ ەلدە كەڭ تارالماعان. سوندا قازاقستاندىقتاردىڭ ءپاتريوتيزمى تومەن بولعانى ما؟ مۇمكىن, ارينە. بىراق بۇل ءۇشىن تۇتىنۋشىلارعا وكپە ايتۋدىڭ ءجونى جوق.
بىزدىڭشە, گاپتىڭ ءبارى ساپا مەن باعادان شىعىپ وتىر. جەرگىلىكتى كومپانيالار ساپاسى شەتەلدىك تاۋاردان كەم تۇسپەيتىن ءونىم ۇسىنسا, تۇتىنۋشىلار وتاندىق ءونىمدى ويلانباي-اق الارى انىق. دەمەك ءبىز ىشكى نارىققا ساپالى ءونىم ۇسىنا الماي وتىرمىز نەمەسە بىزدەگى ساپالى ءونىمنىڭ كولەمى تىم از. ال تۇتىنۋشىلار وتاندىق ءونىم ەكەن دەپ ساپاسىز تاۋاردى الۋعا مىندەتتى ەمەس.
شەتەلدىك ساپامەن تەڭەسۋ قيىن ەكەنىن مويىنداۋ كەرەك. ەندەشە بۇقارا حالىقتى وتاندىق ءونىمدى ساتىپ الۋعا ىنتالاندىرۋدىڭ بىردەن-ءبىر جولى – باعانى تومەندەتۋ. ايلىعىن شايلىعىنا جەتكىزە الماي جۇرگەن تۇتىنۋشىلار ءدال وسى تۇرعىدان وتاندىق تاۋاردى تاڭداۋى مۇمكىن. بىراق بىزدەگى وتاندىق ونىمدەردىڭ باعاسى يمپورتتىق تاۋاردان اسىپ تۇسپەسە, كەم ەمەس. ويتكەنى جەرگىلىكتى كومپانيالار شىعاراتىن تاۋاردىڭ وزىندىك قۇنى قىمبات. ولار سول سەبەپتى باعانى تومەندەتە المايدى. تومەندەتسە, شىعىنعا باتادى. مۇنداي جاعدايدا تاۋار ءوندىرۋدىڭ, بيزنەس باستاۋدىڭ قاجەتى شامالى.
دەمەك ۇكىمەت ەلدەگى تۇتىنۋشىلىق ءپاتريوتيزمدى قولداۋعا ءتيىستى جاعداي جاساي الماي وتىر. سوندىقتان ۇكىمەت مۇشەلەرى مەن تاۋار وندىرۋشىلەردىڭ بۇقارا حالىقتان تۇتىنۋشىلىق ءپاتريوتيزمدى تالاپ ەتەتىن دە ءجونى جوق. سوندا نە ىستەۋ كەرەك؟ بىزدىڭشە, مۇنداي پاتريوتيزم تومەنگى تاپتان ەمەس, جوعارعى جاقتان باستالۋى قاجەت. ءبىرىنشى كەزەكتە شەتەلدەن كەلەتىن ءونىمدى شەكتەۋ كەرەك. ماسەلەن, بىلتىر قازاقستانعا سىرتتان 4,9 ملرد دوللاردىڭ ازىق-ت ۇلىگى جەتكىزىلدى. ونىڭ جارتىسىنان كوبى رەسەيدەن اكەلىنگەن. دەمەك ءبىزدىڭ ەلدىڭ ازىق-ت ۇلىك قاۋىپسىزدىگى دۇرىس قورعالماعان. شەتەلگە تاۋەلدىمىز. مۇنداي تاۋەلدىلىك تۇتىنۋشىلىق ءپاتريوتيزمدى ورىستەتە المايدى.
تۇتىنۋشىلىق ءپاتريوتيزمدى دامىتۋ ءۇشىن ۇكىمەت ناقتى قادامدارعا بارۋعا ءتيىس. ايتالىق, ساۋدا ورىندارىنداعى شەتەلدىك جانە وتاندىق تاۋارلاردىڭ ارا قاتىناسىن رەتتەۋ ماڭىزدى. ماسەلەن, ساۋدا سورەلەرىندەگى تاۋاردىڭ 80 پايىزى وتاندىق, قالعان 20 پايىزى يمپورتتىق ونىمنەن تۇرۋعا ءتيىس دەگەن تالاپ قويۋعا بولادى.
قازاقستاندا ساپالى تاۋار وندىرەتىن كومپانيالار جەتەرلىك. بىراق ولاردىڭ ءونىمى بارىنە بىردەي قولجەتىمدى ەمەس. ياعني شىعاراتىن كولەمى از نەمەسە مۇنداي ونىمدەر ساتىلاتىن ساۋدا جەلىلەرى اسا كوپ ەمەس. ءىرى مەگاپوليستەردىڭ تۇرعىندارى تۇتىناتىن وتاندىق ساپالى ازىق-ت ۇلىك وزگە ايماقتاردا مۇلدەم كەزدەسپەۋى مۇمكىن. سوندىقتان وسىعان دا نازار اۋدارىپ قويعان ارتىق بولمايدى.
ءبىزدىڭ تاراپىمىزدان جىبەرىلگەن تاعى ءبىر كەمشىلىك – تۇتىنۋشىلىق يدەولوگيانىڭ جوقتىعى. حالىقتى حاباردار ەتۋ, ىنتالاندىرۋ, جاڭاشىلدىقتى ءتۇسىندىرۋ, وتاندىق ءونىمدى ناسيحاتتاۋ, دارىپتەۋ جۇمىستارى كەمشىن ءتۇسىپ جاتىر. وسى باعىتتاعى جۇمىستاردى جۇيەلى تۇردە جۇرگىزۋ ماڭىزدى.
تۇتىنۋشىلىق پاتريوتيزمگە اشەيىن تەرمين رەتىندە قاراۋدىڭ قاجەتى شامالى جانە ونى قارا بۇلت ۇيىرىلگەن شاقتا عانا ويعا الۋ دۇرىس ەمەس. ول الەمنىڭ دامىعان ەلدەرىندەگىدەي, قازاقستاندا دا ەكونوميكانى العا سۇيرەر ناقتى تەتىككە, ىشكى نارىقتى دامىتۋدىڭ نەگىزگى ستراتەگياسىنا اينالۋى كەرەك. سوندا عانا ۇپايىمىز تۇگەل بولماق.
