فۋتبول: التى ويىندا – التى گول

بۇگىن, 5 ءساۋىر كۇنى فۋتبولدان قازاقستان چەمپيوناتىنىڭ پرەمەر-ليگاسى 4-تۋرىنىڭ ويىندارى وينالدى. وسى التى ويىندا قارسىلاستار ءبىر-بىرلەرىنىڭ قاقپالارىن التى رەت قانا نىساناعا ءدال الدى. بۇل تۋرالى Egemen.kz حابارلادى. تۋر ويىندارىن سەمەيدە ساعات 15:00-دە الاڭعا شىققان جەرگىلىكتى «سپارتاك» جانە «شاحتەر» (قاراعاندى) كوماندالارى اشتى. قورىتىندىدا 1:0 ەسەبىمەن اياقتالعان ماتچتىڭ تاعدىرىن شەشكەن جالعىز گولدى 28-مينۋتتا قوناقتاردىڭ قورعاۋشىسى نيكولا ۆاسيلەۆيچ بۇرىشتامادان بەرىلگەن دوپتى باسىمەن ۇرۋ ارقىلى سالدى. ال ءبىرىنشى تايمنىڭ سوڭىنا قاراي دورەكى ويىنى ءۇشىن «شاحتەردىڭ» كەلەسى قورعاۋشىسى – پورتۋگال ياگو فەرناندەس الاڭنان قۋىلدى. ارادا بىرنەشە مينۋت وتكەننەن كەيىن ويىننىڭ باس تورەشىسى الەكساندر گاۋزەر سەمەيلىك جارتىلاي قورعاۋشى باۋىرجان تۇرىسبەككە دە «قىزىل قاعاز» كورسەتتى. بۇدان ءبىر ساعات كەيىن (16:00) باستالعان ءۇش ويىننىڭ بىرەۋىندە عانا گول سوعىلدى. جانە ول تابلودا ءبىر سانىن ەمەس, ءۇش تسيفرىن كورسەتىپ جاندى. شىمكەنتتە وتكەن بۇل كەزدەسۋدە «ورداباسى» قوستانايدىڭ «توبىلىن» قابىلدادى. الاڭ يەلەرى جوعارىدا ايتىلعان ءۇش دوپتى دا ءوز ەسەپتەرىنە جازدى – 3:0! ويىنداعى ەسەپتى ابدۋللا دياكاتە 31-مينۋتتا اشتى. ال كەلەسى تايم شابۋىلشى ەدين يۋنۋزوۆيچ ءۇشىن جۇلدىزى تۋعان مەزەت بولدى. ول مەيماندار داربازاسىنا 69 جانە 83-مينۋتتاردا ەكى دوپ سالىپ ۇلگەردى. ايتقانداي, شىمكەنتتىكتەردى بۇل ماتچقا جاڭا باس جاتتىقتىرۋشى – ليتۆان مامانى ساۋليۋس شيرمياليس ءبىرىنشى رەت باستاپ شىقتى. ونىڭ كومانداداعى دەبيۋتى وسىلاي تابىستى اياقتالدى. وسى ۋاقىتتاردا وينالعان كەلەسى ەكى كەزدەسۋ – «اتىراۋ» - «اقتوبە», «جەتىسۋ» (تالدىقورعان) - «ەرتىس» (پاۆلودار) ارالارىنداعى ويىندا ەسەپ اشىلعان جوق. بۇدان كەيىن, ساعات 17:00-دە باستالعان ەكى ويىن دا 1:0 ەسەبىمەن اياقتالدى. ولاردىڭ بىرىندە الاڭ يەلەرى باسىم تۇسسە, ەكىنشىسىندە قوناقتاردىڭ جولى بولىپ كەتتى. استانانىڭ «استانا» كومانداسى ءوز الاڭىندا تارازدىڭ «تارازىن» قابىلداپ, جەڭىسكە جەتتى. مۇندا الاڭعا 63-مينۋتتا شىققان باۋىرجان جولشيەۆ ەكى مينۋتتان كەيىن كوزگە ءتۇستى. ال وڭتۇستىك استانانىڭ «قايراتى» (سۋرەتتە) جەڭىستى قىزىلوردادا جەرگىلىكتى «قايساردان» ويىن بىتۋگە 2 مينۋت قالعاندا تارتىپ اكەتتى. گولدى اسلان داراباەۆ ءتۇسىردى. ءسويتىپ, بيىلعى ماۋسىمدا الماتىلىقتار ءبىرىنشى رەت جەڭىسكە جەتسە, قىزىلوردالىقتار ەكىنشى مارتە جەڭىلىسكە ۇشىرادى. وسى ويىنداردان كەيىن «استانا» 10 ۇپايمەن توپ باسىن جەكە-دارا باستادى. ەكىنشى ورىندا «اقتوبە» كەلە جاتسا, ءۇشىنشى بەلەستەن «جەتىسۋ» كورىندى. بۇدان ءارى جاساقتار مىناداي رەتپەن ورنالاستى: 4.»اتىراۋ», 5. «شاحتەر», 6. «ورداباسى», 7. «ەرتىس», 8. «قايسار», 9. «توبىل», 10. «قايرات», 11. «سپارتاك», 12. «تاراز». كەلەسى تۋردىڭ ويىندارى 9 ءساۋىر كۇنى وينالادى. دامير قوجامقۇل. دەرەككوز: Egemen.kz. فوتو: vesti.kz.