كەلىسسوزدەردىڭ نەگىزگى تاقىرىبى ەلىمىزدىڭ وڭتۇستىگىندە ۋران وندىرەتىن KATCO بىرلەسكەن قازاقستاندىق-فرانتسۋز كاسىپورنىنىڭ جۇمىسىنا ارنالدى. تسيفرلاندىرۋدى بارىنشا جەتىلدىرىپ, شەشىم قابىلداۋ پروتسەسىن جەڭىلدەتۋ قاجەتتىلىگى اتاپ ءوتىلدى. ورانو ايماقتا KATCO ونەركاسىپتىك نىساندارىن پايدالانۋ ءۇشىن 12 مۆت كۇن ەلەكتر ستانتسياسىن سالۋدى ۇسىنادى. بۇل «سامۇرىق-قازىنا» اق تومەن ساتىلى كومىرتەكتى يگەرۋگە ارنالعان جوسپارىنا تولىق كەلەتىن جوبا.
سونىمەن قاتار تاراپتار كۇكىرت قىشقىلىن ءوندىرۋ جوباسىن جۇزەگە اسىرۋ پەرسپەكتيۆالارىن, سونداي-اق ورانونىڭ شەتەلدىك جوبالارىنا بىرلەسكەن ينۆەستيتسيا تارتۋ مۇمكىندىكتەرىن دە تالقىلادى.
فرانتسۋز تاراپى قازاقستاندا تازا ەنەرگيا كوزى رەتىندە اتوم ەلەكتر ستانتسياسىن سالۋ جوسپارىنا ۇلكەن قىزىعۋشىلىق تانىتتى.
«قازىر بۇل باستاما پىسىقتالۋدا, سوڭعى شەشىم ءالى قابىلدانعان جوق. قالاي بولعاندا دا, ءبىز ەنەرگيا كوزدەرىن ارتاراپتاندىرۋعا جانە تەڭگەرىمدى ەنەرگەتيكالىق تۇراقتىلىقتى قۇرۋعا نيەتتىمىز. ماقساتىمىز يادرولىق قانا ەمەس, سونىمەن بىرگە گاز جانە جاڭارتىلاتىن قۋات كوزدەرىن دامىتۋ», دەپ اتاپ ءوتتى «سامۇرىق-قازىنا» اق باسقارما توراعاسى الماسادام ساتقاليەۆ.
