توقسانىنشى جىلداردىڭ سوڭىندا جاپونيانىڭ دزيۋدوشىلارى قارقىنىن كۇرت كۇشەيتىپ, وراسان زور تابىستارعا قول جەتكىزە باستادى. 1999 جىلى انگليانىڭ بيرمينگەم قالاسىندا جالاۋى جەلبىرەگەن الەم چەمپيوناتىندا ولار ءتورت التىندى يەلەنىپ, جالپىكوماندالىق ەسەپتە كوش باستادى. سودان كەيىن ۇزاق ۋاقىت بويى كۇنشىعىس ەلىنىڭ قىزدارى تىزگىندى ەشكىمگە بەرمەدى. تەك ءبىر-ەكى جارىستا عانا فرانتسيا بالۋاندارىنىڭ جاپونداردى جەڭۋگە كۇش-جىگەرلەرىنىڭ جەتكەنىن ايتا كەتۋگە ءتيىسپىز.
بىردەن ايتا كەتەيىك, بۇرىندارى كسرو قۇرامىندا بولعان مەملەكەتتەردىڭ ەشقايسىسى الەم چەمپيوناتتارىندا اۋىز تولتىرىپ ايتارلىقتاي تابىسقا جەتە العان جوق. ەڭ مىقتى دەگەن ۋكراينانىڭ ءوزى نەبارى ءتورت جۇلدەگە يەلىك ەتتى. ولاردىڭ قورجىنىنداعى ەكى التىندى دا داريا بيلوديد ەنشىلەدى. اتالعان ەلدىڭ استاناسى – كيەۆتە بالۋاندار وتباسىندا دۇنيەگە كەلگەن ول العاش رەت 2018 جىلى باكۋدە توپ جاردى. بۇل بەلەستى داريا 18 جاسىندا باعىندىردى. وسىلايشا, ونىڭ ەسىمى دزيۋدوشى قىزدار اراسىنداعى ەڭ جاس الەم چەمپيونى رەتىندە تاريحتا قالدى. بيلوديد سول ناتيجەسىن 2019 جىلى توكيودا قايتالادى. 2009 جىلى روتتەردامدا يرينا پريششەپانىڭ دا باس جۇلدەنى ولجالاۋعا مۇمكىندىگى بولعان ەدى. الايدا فينالدا ول نيدەرلاندتىق مارحيندە ۆەرۆەركتەن ۇتىلىپ, كۇمىس مەدالدى قاناعات تۇتتى. تاعى ءبىر جۇلدە تاتيانا بەلياەۆانىڭ ەنشىسىندە. ول 1995 جىلى وتكەن جارىستا ءۇشىنشى ورىنعا تابان تىرەدى.
رەسەي قۇراماسىنىڭ قورجىنىندا 11 مەدال بار. بىراق التىن مەدال جوق. سول سەبەپتى دە ولار ۋكراينادان كەيىنگى ساتىعا جايعاستى. رەسەيلىكتەر اراسىنان التىن تۇعىرعا ەڭ جاقىن بولعان ناتاليا كۋزيۋتينا ەدى. وعان دەيىن دۇنيەجۇزىلىك دودالاردا ءۇش رەت قولا مەدالدى يەلەنگەن بريانسكىنىڭ تۋماسى 2019 جىلى توكيودا وتە تاماشا ونەر كورسەتىپ, اقتىق سىنعا دەيىن القىنباي جەتتى. الايدا فينالدا ول جاپونيانىڭ داڭقتى دزيۋدوشىسى ۋتا ابەدەن ايلاسىن اسىرا المادى.
ءۇشىنشى ورىنداعى ازەربايجاندا ءۇش قولا مەدال بار. ءتورتىنشى جانە بەسىنشى ساتىلاردا – قازاقستان مەن بەلارۋس. جەرلەستەرىمىز ەكى رەت جەڭىس تۇعىرىنا كوتەرىلسە, بەلورۋسسيالىقتار ءبىر رەت جۇلدەگەرلەر ساناتىنا قوسىلدى. مىنە, بۇرىنعى «باۋىرلاس» رەسپۋبليكالار اراسىنان بار-جوعى بەس كومانداعا عانا الەم چەمپيوناتىنىڭ جۇلدەسى بۇيىرعان ەكەن.
بۇرىنعى كسرو-نىڭ قۇرامىندا بولعان مەملەكەت وكىلدەرى اراسىنان ايەلدەر دزيۋدوسىنان بىردە-ءبىر وليمپيادا چەمپيونى شىققان جوق. ءتىپتى, جۇلدە العان بالۋانداردىڭ وزدەرى ساناۋلى عانا. اتاپ ايتساق, 2000 جىلى سيدنەيدە رەسەيلىك ليۋبوۆ برۋلەتوۆا كۇمىس السا, 2004 جىلى ونىڭ وتانداسى تەا دونگۋزاشۆيلي قولاعا قول سوزدى. 2016 جىلى ريو-دە-جانەيرودا قازاقستاندىق وتگونتسەتسەگ گالبادراح پەن رەسەيلىك ناتاليا كۋزيۋتينا ءۇشىنشى ساتىعا جايعاستى. 2021 جىلى توكيودا ۋكراينالىق داريا بيلوديد, رەسەيلىك مادينا تايمازوۆا جانە ازەربايجاندىق يرينا كيندزەرسكايا ۇزدىك ۇشتىكتى قورىتىندىلادى.
قازاقستاننىڭ ايەلدەر دزيۋدوسىنىڭ حالىقارالىق ارەنادا مەرەيىن ۇستەم ەتكەن وتگونتسەتسەگ گالبادراح ەكەنى بارشاعا ءمالىم. 2015 جىلى ءبىزدىڭ ەلدىڭ ازاماتتىعىن العان موڭعول قىزى اينالدىرعان بەس-التى جىل ارالىعىندا كوپتەگەن بەلەستى باعىندىردى. ول قازاقستاندىق دزيۋدوشى قىزدار اراسىنان العاشقى بولىپ وليمپيا ويىندارى مەن الەم چەمپيوناتىندا جۇلدەگەرلەر قاتارىنان كورىندى. ونىڭ بۇل كورسەتكىشىن ازىرگە بىردە-ءبىر جەرلەسىمىز قايتالاي العان جوق. ودان بولەك, وتگونتسەتسەگتىڭ ازيا چەمپيونى, قۇرلىق بىرىنشىلىگىنىڭ كۇمىس جۇلدەگەرى, ازيا ويىندارى مەن دۇنيەجۇزىلىك ۋنيۆەرسيادانىڭ قولا جۇلدەگەرى دەگەن اتاقتارى تاعى بار. سونىمەن قاتار ول گران-پري, گراند-سلەم تۋرنيرلەرىندە توپ جاردى. ءبىر سوزبەن ايتساق, وسى سپورت ءتۇرىن سەرىك ەتكەن قىزدار اراسىنداعى ازىرگە ەڭ ۇزدىك كورسەتكىشتەرىمىز ءدال وسى گالبادراحقا تيەسىلى. سوندىقتان دا بىلتىر سپورتتىق كارەراسىن اياقتاعان 30 جاستاعى موڭعول بالۋانىنا العىستان باسقا ايتارىمىز جوق.
وليمپيا ويىندارىنىڭ ناتيجەسى
(1996-2021 جىلدار ارالىعى)
|
ورىن |
كوماندالار |
التىن |
كۇمىس |
قولا |
بارلىعى |
|
1. |
رەسەي |
0 |
1 |
3 |
4 |
|
2-4 |
ۋكراينا |
0 |
0 |
1 |
1 |
|
2-4 |
قازاقستان |
0 |
0 |
1 |
1 |
|
2-4 |
ازەربايجان |
0 |
0 |
1 |
1 |
الەم چەمپيوناتتارىنىڭ ناتيجەسى
(1993-2021 جىلدار ارالىعى)
|
ورىن |
كوماندالار |
التىن |
كۇمىس |
قولا |
بارلىعى |
|
1. |
ۋكراينا |
2 |
1 |
1 |
4 |
|
2. |
رەسەي |
0 |
1 |
10 |
11 |
|
3. |
ازەربايجان |
0 |
0 |
3 |
3 |
|
4. |
قازاقستان |
0 |
0 |
2 |
2 |
|
5. |
بەلارۋس |
0 |
0 |
1 |
1 |
