«ەلىمىزدەگى بارشا مۇسىلمان قاۋىمدى قاسيەتتى رامازان ايىنىڭ باستالۋىمەن قۇتتىقتايمىن! رامازان – توزىمدىلىكتىڭ, بەرەكەنىڭ جانە رۋحاني جاڭارۋدىڭ ايى. شىن مانىندە, وسى وتىز كۇندە سابىرلىق, كەشىرىمدىلىك, مەيىرىمدىلىك سياقتى اسىل قاسيەتتەر كەڭىنەن دارىپتەلەدى. كومەككە ءزارۋ جاندارعا دەمەۋ بولاتىن ىزگى امالدار دا وسى ايدا كوبىرەك قولعا الىنادى. سوندىقتان رامازاندى حالىقتىڭ ىرىسىن ارتتىرىپ, ىنتىماعىن نىعايتاتىن اي دەپ قابىلدايمىز», دەپ جازدى سەنات توراعاسى ءوزىنىڭ Facebook پاراقشاسىندا.
سونىمەن قاتار ول پاندەمياعا بايلانىستى سوڭعى ەكى جىل ىشىندە ورازا كەزىندە ءتۇرلى شەكتەۋلەردىڭ بولعانىن ايتتى.
«بيىل ىندەتتىڭ بەتى قايتىپ, مەشىتتەرگە ەمىن-ەركىن بارۋعا مۇمكىندىك تۋىپ وتىر. بۇل قازاقستاندىق مۇسىلماندار ءۇشىن ۇلكەن قۋانىش ەكەنى ءسوزسىز. قاسيەتتى ايدىڭ كەلۋىمەن قۇتتىقتاي وتىرىپ, نيەت ەتكەن جاندارعا ۇستاعان ورازالارىڭىز قابىل بولسىن دەيمىن. ءار شاڭىراققا شاتتىق, اماندىق جانە بەرەكە تىلەيمىن. ەلىمىز امان, جۇرتىمىز تىنىش بولسىن. ورازا قابىل بولسىن!», دەدى ماۋلەن اشىمباەۆ.
