قۇرمەتتى تۇلەكتەر!
ەكى ايدان كەيىن مەكتەپتى اياقتاپ, جاڭا ومىرگە قادام باسقالى وتىرسىزدار.
مەكتەپ قابىرعاسىندا جۇرگەندە ۇستازدارىڭىز سىزدەرگە ءبىلىم مەن تاربيەنى قاتار ۇيرەتتى. اتا-انالارىڭىز دا ۇنەمى كەڭەستەرىن ايتىپ, دۇرىس جول سىلتەپ وتىردى. ەندى بويلارىڭىزعا سىڭگەن وسى قاسيەتتەردى پايدالانىپ, ومىرلەرىڭىزدەگى جاۋاپتى شەشىمدى قابىلدايسىزدار.
ارينە, سىزدەر ءۇشىن العاشقى ماڭىزدى ەمتيحاننىڭ ءبىرى - ول ۇبت. بىراق ۇبت ومىردەگى ەڭ جەڭىل, وڭاي سىناقتىڭ ءبىرى ەكەنىن ايتقىم كەلەدى.
وقۋشىلاردىڭ ۇبت-دان قيىندىقسىز ءوتۋى ءۇشىن قوسىمشا شارالاردى قابىلدادىق.
1. ۇبت-نى ەلەكتروندى فورماتقا كوشىرىپ, ونى بارىنشا ءادىل ەتتىك. ورناتىلعان كامەرالار, پروكتورينگ جانە ترانسلياتسيا جۇيەسى تۇلەكتەرگە كەدەرگى كەلتىرمەۋى كەرەك. سەبەبى بۇل شارا ۇبت-نىڭ ءادىل جانە اشىق ءوتۋى ءۇشىن ەنگىزىلدى.
2. ۇبت جىلىنا ءبىر رەت ەمەس, 4 رەت وتكىزىلەدى. بۇل جۇمىسقا ارىپتەستەرىمىز كوپ كۇش-جىگەر جۇمساسا دا, بىراق ول تۇلەكتەردىڭ كۇيزەلىسىن ازايتىپ, ۋنيۆەرسيتەتكە تۇسۋىنە بىرنەشە مۇمكىندىك بەرەتىنىن بىلەمىز.
3. ەرەكشە قاجەتتىلىكتەرى بار بالالارعا دا ارنايى جاعداي جاسالدى. بيىلدان باستاپ ولارعا تاپسىرمالاردى ورىنداۋ ءۇشىن قوسىمشا 40 مينۋت ءبولىندى. سونداي-اق تاپسىرمالار سۋرەتسىز, سىزبالارسىز جانە دياگراممالارسىز بەرىلدى.
4. ەندى تەست تاپسىرۋشىلارعا كالكۋلياتورلاردى تۇراقتى تۇردە پايدالانۋعا رۇقسات ەتىلەدى.
5. بيىل سىزدەرگە ۇبت ۇپايلارى عانا ەمەس, سونىمەن قاتار ءار ءپان بويىنشا ناتيجەلەردىڭ تاقىرىپتىق تالداۋى بەرىلەدى. بۇل سىزدەردىڭ ءالسىز تۇستارىڭىزدى تالداۋعا جانە بىلىمدەرىڭىزدى جەتىلدىرۋگە كومەكتەسەدى.
6. پرەزيدەنتتىڭ قولداۋىنىڭ ارقاسىندا گرانتقا تۇسۋگە مۇمكىندىك ارتىپ وتىر. بيىل قوسىمشا 15 مىڭ گرانت ءبولىنىپ, ستيپەنديا مولشەرى 15 پايىزعا ءوستى.
7. جاقسى جاڭالىق تا بار. ينستاگرامدا مەنى بەلگىلەپ, گرانتقا ءتۇسۋ ءۇشىن ءبىر ەمەس, ەكى رەت ۇبت تاپسىرۋ تۋرالى ءوتىنىش جازىپ جۇرگەندەرىڭىزدى بىلەمىن. شەشىم قابىلداۋ كەزىندە ءبىز وقۋشىلاردىڭ ۇسىنىسىن, قىزىعۋشىلىعىن نازاردان شىعارماۋعا تىرىسامىز. سول سەبەپتى وسى جولى دا سىزدەردىڭ ۇسىنىستارىڭىز بويىنشا شەشىم قابىلدادىق. ياعني ەندى سىزدەر ەكى رەت ۇبت تاپسىرىپ, گرانتقا تۇسۋگە مۇمكىندىك الاسىزدار. بۇل شارا ەموتسيونالدى سترەسس دەڭگەيىن تومەندەتەتىنىنە سەنىمىمىز مول.
قىمباتتى تۇلەكتەر! ۇبت سىناعىنان سۇرىنبەي وتۋلەرىڭىزگە تىلەكتەسپىن. بىلىمدەرىڭىزدىڭ ارقاسىندا جوعارى ناتيجەگە قول جەتكىزىپ, گرانتقا يە بولىڭىزدار! بارشاڭىزعا ساتتىلىك تىلەيمىن!
قادىرلى دوستار! «قانداي ۋنيۆەرسيتەتتى تاڭداپ, قايدا وقىعان دۇرىس؟»- دەپ تە ويلاپ جۇرگەن بولارسىزدار؟
وسى رەتتە بىرنەشە كەڭەسىممەن ءبولىسۋدى ءجون ساناپ وتىرمىن:
ءبىرىنشى. جوو-نىڭ جۇمىس بەرۋشىلەر رەيتينگىندەگى ورنىمەن, كادر قۇرامىمەن, وقۋ جاعدايلارىمەن تانىسىڭىز.
ەكىنشى. قانداي باعدارلاما بويىنشا وقۋ جۇرگىزىلەتىنىن قاراڭىز. سونداي-اق ماماندىقتاردىڭ اتاۋى بىردەي ەستىلىپ, بىراق مازمۇنى ايتارلىقتاي وزگەشە بولۋى مۇمكىن. سول سەبەپتى ۇزدىك الەمدىك تاجىريبەگە سۇيەنە وتىرىپ, ۋنيۆەرسيتەتتەردىڭ بارلىق باعدارلاماسىنىڭ ءتىزىلىمىن جاسادىق. ەندى ول بارىنە قولجەتىمدى.
ءۇشىنشى. ۋنيۆەرسيتەتتىڭ بەدەلىن باعالاڭىز. قازىر جوو-لار ءوز ۇلگىسىندەگى ديپلومداردى بەرەدى. دەگەنمەن ۋنيۆەرسيتەت بەرەتىن ديپلومنىڭ قاعازىنان بۇرىن, ونىڭ قانداي ماماندى دايىنداپ شىعاراتىنى ماڭىزعا يە.
ءتورتىنشى. ۋنيۆەرسيتەتتىڭ اككرەديتاتسياسىنا نازار اۋدارىڭىز. ەگەر ول ەڭ مىقتى اككرەديتتەۋ ۇيىمدارىنان وتسە, وندا ساپانىڭ بولاتىنىنا سەنۋگە بولادى.
بەسىنشى. ۋنيۆەرسيتەتتى تاڭداۋ كەزىندە ءسىزدى كۇماندى ارزان وقۋ نەمەسە ساباققا قاتىسپاۋ مۇمكىندىگى سياقتى ويلار قىزىقتىرماۋى ماڭىزدى. سەبەبى جۇمىس بەرۋشىلەر ديپلومدى جارامسىز دەپ تانىپ, قاراجاتىڭىز بەن ۋاقىتىڭىز بوسقا شىعىن بولۋى مۇمكىن.
التىنشى. قازاقستاندىق جوو-نى تاڭداۋعا كەڭەس بەرەمىن. ءبىزدىڭ ۋنيۆەرسيتەتتەردىڭ ساپاسى كورشى ەلدەردىڭ كوپتەگەن ۋنيۆەرسيتەتىنەن اسىپ تۇسەتىنىن سەنىممەن ايتا الامىن.
ەندى بولاشاق ماماندىقتى تاڭداۋعا قاتىستى دا ايتا كەتەيىن. جيناعان بالل كولەمىنە نەمەسە باسقا ءبىر فاكتورلارعا بايلانىستى قابىلدانعان شەشىم قاتە ەكەنىن ەستە ساقتاڭىز.
وقۋ مەن كاسىپتىڭ 3 ءتۇرى ۇلكەن الەۋەتكە يە دەپ ويلايمىن:
1. جاس مۇعالىم. قازىر بۇل ماماندىق تۇراقتىلىقتىڭ كەپىلىنە اينالدى.
ەلىمىزدە جاقسى مۇعالىمدەرگە سۇرانىس وتە جوعارى. قازىر جالاقى دا, دامۋ مەن مانساپتىق ءوسۋ مۇمكىندىكتەرىنە دە جاعداي جاسالعان. سونىمەن قاتار وسى باعىتقا 9,5 مىڭ گرانت ءبولىنىپ, ەڭ جوعارى ستيپەنديا تاعايىندالادى, ودان بولەك, جالاقى جىل سايىن 25 پايىزعا ءوسىپ وتىرادى.
2. جاس ينجەنەر. پرەزيدەنت تەحنيكالىق ماماندىقتاردىڭ ماڭىزدىلىعىن اتاپ وتكەن بولاتىن. مىقتى ينجەنەر بولساڭىز, وندا ءسىز كەز كەلگەن جەردە باسەكەگە قابىلەتتى بولاسىز. وزدەرىڭىز بىلەتىندەي, جۇزدەگەن جاس قازاقستاندىق Google, Amazon جانە الەمگە ايگىلى باسقا دا كومپانيالاردا جۇمىس ىستەيدى.
3. جاس عالىم. قازاقستان عىلىمى قارقىندى دامىپ كەلەدى. وتاندىق عالىمدار QazVac ۆاكتسيناسىن جاسادى. سونداي-اق جاس عالىمدار بۇكىل الەم بويىنشا عىلىمي جارىستاردا الدىڭعى ورىنداردا. ولاردىڭ جوبالارىنا شەتەلدىك كومپانيالار سەرىكتەستىك ۇسىنىپ ءجۇر. ودان بولەك, ءبىز عالىمدارعا بارىنشا قولايلى جاعداي جاساپ جاتىرمىز. اتاپ ايتقاندا, عىلىمي گرانتتار ءبولۋ, شەتەلدىك عىلىمي ورتالىقتاردا تاعىلىمدامادان ءوتۋ جانە ت.ب. سىزدەردىڭ ارالارىڭىزدان دا ساتباەۆ ءىسىن جالعاستىرۋشى مىقتى عالىم شىعۋى ابدەن مۇمكىن.
قۇرمەتتى تۇلەكتەر!
سىزدەرگە جاڭا قازاقستاندى قۇرۋعا تاماشا مۇمكىندىك بەرىلىپ وتىر.
سىزدەردىڭ يدەيالارىڭىز, ماقساتتارىڭىز بەن تالپىنىستارىڭىزدىڭ ارقاسىندا ەلىمىز ودان ءارى دامي تۇسەتىنىنە سەنىمدىمىن.
قانداي جاعداي بولسىن, جوعارى كاسىبي ماماندار ارقاشان سۇرانىسقا يە. وسىنى ەستەن شىعارماڭىزدار.
ەڭبەكقورلىق پەن سۇيىكتى ىسپەن اينالىسۋعا دەگەن تالپىنىس بولسا, تەمىرجولشى بولىپ تا جۇلدىز اتانۋعا بولادى.
وزىڭىزگە جانە كۇش-جىگەرىڭىزگە سەنىڭىز. ءبىلىمنىڭ اسۋلارىن باعىندىرىپ, ىزدەنۋدەن تالماڭىز. ۋاقىتتى بوسقا وتكىزبەۋگە تىرىسىڭىز. ونى جاڭا ءبىلىم مەن داعدىنى ۇيرەنۋگە جۇمساڭىز.
باستىسى ءومىر جولىڭىزدا قانداي قيىندىقتار تۋىنداسا دا, ونىڭ بارلىعىن جەڭۋگە بولاتىنىن ءاردايىم ەسىڭىزدە ۇستاڭىز.
