بۇگىندە ەلىمىزدە, سونداي-اق شەتەلدەردە ءبىلىم الىپ جاتقان جاستار العان ءبىلىمى ارقىلى ەلىمىزدىڭ تاياۋ جىلدارداعى دامۋىنا سەرپىن بەرەتىن رۋحاني, مادەني ءارى ەكونوميكالىق كەلەشەگى زور الەۋەتكە يە.
جاستار قاي سالادا بولسىن جىلدامدىق, تسيفرلى سەرپىلىستەر مەن ءداستۇرلى ءبىلىمدى ۇشتاستىرا وتىرىپ, يننوۆاتسيالىق جەتىستىكتەردى ءىس جۇزىنە اسىرۋعا دايىن. بۇل باعىتتا بولاشاعىن شەتەلدەردەن ىزدەپ ەلدەن كەتىپ جاتقان جاستارعا كوڭىل ءبولۋ, سونىمەن بىرگە الداعى ەكى-ءۇش جىلدا جوعارى ءبىلىم مەن تەحنيكالىق كاسىپتىك ءبىلىم ورىندارىن بىتىرەتىن جاستاردىڭ الەۋمەتتىك احۋالىنا كوڭىل ءبولۋ, ولاردى تۇراقتى جۇمىسپەن قامتاماسىز ەتۋ ۋاقىت كۇتتىرمەيدى.
سونىمەن بىرگە ءبىلىمدى جاستاردىڭ شەتەلدىڭ ۇزدىك وقۋ ورىندارى عانا ەمەس, وندىرىستىك ورتالىقتارىندا تاجىريبەدەن وتكىزىپ, وسى بىلىكتەرىن ەلىمىزدىڭ دامۋىنا باعىتتاۋ شارالارى دا كەشەندى جۇزەگە اسۋعا ءتيىس دەپ بىلەمىن.
كەيىنگى جىلدارى تەحنوكرات جاستاردى وقىتۋ, تاربيەلەۋ ماسەلەسى ءجيى كوتەرىلىپ ءجۇر. وسى ورايدا تەحنيكالىق ءبىلىم بەرۋ ورىندارىن ءتامامدايتىن تۇلەكتەردىڭ جۇمىسقا ورنالاسۋى, ولاردىڭ كاسىبي تاجىريبە الاڭدارىندا بىلىكتىلىكتەن وتۋىنە نازار اۋدارۋ دا ماڭىزدى ماسەلە.
سونىمەن قاتار ەلىمىزدەگى بارلىق وقۋ ورنى تۇلەكتەرىنىڭ فورۋمدارىن, ديسكۋسسيا الاڭدارىن ءجيى ۇيىمداستىرىپ وتىرۋ جاستاردىڭ بولاشاققا دەگەن نىق ءارى سەنىمدى قادام جاساۋىنا ىقپال ەتۋگە قىزمەت ەتەتىنى ءسوزسىز.
مەملەكەت باسشىسى قاسىم-جومارت توقاەۆ جاستارعا ۇلكەن ءۇمىت ارتا وتىرىپ, ۇلتتىق عىلىم اكادەمياسى مەن عىلىمي-زەرتتەۋ ينستيتۋتتارى عالىمدارىنىڭ بەلسەندىلىگىنە سەنىممەن قارايدى.
ەكونوميكالىق, الەۋمەتتىك سەكتوردا قوردالانعان ماسەلەلەردىڭ شەشىمىن تابۋى ناقتى ءىس پەن كاسىبي باعدارعا بايلانىستى ەكەنى بەلگىلى. وسىعان وراي جاستاردىڭ كاسىبي ءوسۋى, بىلىكتى مامان دەڭگەيىنە جەتۋىن ماقسات ەتەتىن ورتالىقتاردىڭ جوعارى وقۋ ورىندارى جانىندا بەلسەندى جۇمىس ىستەگەنى ماڭىزدى. ول بەلگىلى ءبىر دارەجەدەگى جاس مامانداردى عانا ەمەس, كرەاتيۆتى ويى ۇشقىر كەز كەلگەن جاستىڭ تاجىريبە الاڭىنا اينالۋعا ءتيىس دەپ بىلەمىن.
وتانسۇيگىشتىك, ۇلتتىق قۇندىلىقتاردى نىعايتۋ جولىنداعى مەملەكەتتىك باعدارلامالاردى جۇزەگە اسىرۋدا جاستاردى شەت قالدىرماي, تاربيە وشاقتارىنىڭ بارلىق دەڭگەيىندە باستى بايلىعىمىز – تاۋەلسىزدىگىمىزدىڭ تۇعىرىن ساقتاۋ مەن ۇلتتىق بىرەگەيلىكتى نىعايتۋ, ەلىمىزدىڭ جاڭارۋىنا باعىتتالعان جوبالاردى جۇزەگە اسىرۋدىڭ ماڭىزدى ەكەندىگىنە باۋلۋ, زاماناۋي جەتىستىكتەردى ەل دامۋىنىڭ كەلەشەگى جولىندا جۇزەگە اسىرۋدىڭ ماڭىزدىلىعىن ءتۇسىندىرۋ قوعامدىق ءومىردىڭ بارلىق سالاسىنا قاتىستى بولۋى قاجەت.
تيمۋر اپەنديەۆ,
ش.ءۋاليحانوۆ اتىنداعى تاريح جانە ەتنولوگيا ينستيتۋتى
تاريحي دەموگرافيا جانە قازاقستان حالقى اسسامبلەياسى ءبولىمىنىڭ مەڭگەرۋشىسى
